Icasuko ca mu Baibolo

Ee, kuti asumina. Ifyo Yesu alandile filanga ukuti Umwina Kristu kuti asumina ukumundapa. Atile “abatuntulu tabakabila kondapa, kano abalwele.” (Mateo 9:12) Nangu ca kuti mu Baibolo te mwakusambilila ifya kundapa abantu, mwaliba amashiwi ayengatungulula abafwaya ukucita ifyo Lesa afwaya.

Amepusho mulingile ukuyipusha

1. Bushe ninjishiba ifibimbilwemo muli iyi inshila yakundapilwamo? Baibolo itweba ukuti tufwile ukufwailisha pa kuti twishibe ifishinka ukucila ‘ukutetekela fye fyonse ifyo twaumfwa.Amapinda 14:15.

2. Bushe kuti naipushako badokota abalekanalekana abaishiba ukundapa ubu bulwele? Kuti cawama sana ukumonana na “bapanda amano abengi,” maka maka nga mulwele ubulwele ubukalamba.Amapinda 15:22

3. Bushe uyu musango wa kundapilamo kuti walenga napula mwi funde lya kwa Lesa ilya “kutaluka . . . ku mulopa”?Imilimo 15:20.

4. Bushe balapupa imipashi muli uku ukundapwa? Baibolo yalikaanya “ukupupa imipashi.” (Galatia 5:19-21) Pa kwishiba nga ca kuti balapupa imipashi, kuit mwatontokanya pali aya mepusho:

  • Bushe uyu dokota alomfwana ne mipashi?

  • Bushe namubimbwa ukubuka e co balemwena ukuti nabamulowa nelyo imipashi ya fikolwe naifulwa?

  • Bushe pa kubomfya umuti kulaba ukubomfya ifishimba nelyo ukucita fimo ifilanga ukuti mulepupa imipashi?

5. Bushe ndabika sana amano ku bumi bwandi? Baibolo itufunda ukuti: “Lekeni abantu bonse beshibe ukuti muli ba mutembo.” (Abena Filipi 4:5) Ukuba no mutembo kukalenga mukalebika amano ku “fyacilapo ukucindama,” pamo nga ifya kwa Lesa.Abena Filipi 1:10; Mateo 5:3.