Ifyo Baibolo yasuka ici cipusho

Ee. Lesa alasakamana ababomfi bakwe abalwala. Baibolo ilanda pa babomfi bakwe aba cishinka, ati: “Yehova akamwafwa ilyo ali pa busanshi bwa kulwala kwakwe.” (Amalumbo 41:3) Nga mwalilwa ubulwele ubushipola, ifi twalalandapo fitatu kuti fyamwafwa ukushipikisha:

  1. Mulelomba amaka ya kumwafwa ukushipikisha. Kuti mwapokelela “umutende wa kwa Lesa uwacila amatontonkanyo yonse” uukalenga ukuti mwilasakamikwa sana lelo mukaleshipikisha.Abena Filipi 4:6, 7.

  2. Mwilaaba sana no bulanda. Baibolo itila: “Umutima wa nsansa muti uusuma, lelo umutima uwa bulanda umya ifupa.” (Amapinda 17:22) Muleba ne mipuulwe, pantu ukucita ifi kuti kwalenga mwilasakamikwa sana kabili kuti mwalaumfwako na bwino.

  3. Mulecetekela ifyo Lesa alaya. Ukucetekela ifikacitika ku ntanshi kuti kwalenga mwaba aba nsansa nelyo cingati mwalilwala ubulwele ubushipola. (Abena Roma 12:12) Baibolo yalilanda pa nshita ilyo ‘kushakabe umwikashi uukatila: “Nindwala.”’ (Esaya 33:24) Iyo inshita, Lesa akondapa amalwele yonse ayashipola ayo abasambilila sana ifya cipatala bafilwa ukundapa. Ku ca kumwenako, Baibolo yalilondolola ifyo ubukote bukapwa. Itila: “Lekeni umubili wakwe uleleme ukucila uwa mwaice; abwelele na ku nshiku sha bulumendo bwakwe.Yobo 33:25.

Moneni ukuti: Nangu ca kuti Inte sha kwa Yehova balishiba kuti Lesa alabafwa, na lyo line nga balilwala ubulwele ubushipola balaya ku cipatala. (Marko 2:17) Fwe Nte sha kwa Yehova tatweba abantu umuti bafwile ukubomfya nga balwala, lelo umuntu umwine e ufwile ukusala ifyo alefwaya ukumundapa.