Icasuko ca mu Baibolo

Armagedone ni nkondo ya kulekeleshako umo Lesa akalwisha amabuteko ya bantunse. Aya amabuteko na bantu abayatungilila tabafwaya ukutekwa na Lesa. (Amalumbo 2:2) Inkondo ya Armagedone ikonaula amabuteko yonse aya bantunse.—Daniele 2:44.

Ishiwi lya kuti “Armagedone” lisangwa fye umuku umo mu Baibolo, pa Ukusokolola 16:16. Baibolo yalisobela mu Ukusokolola ukuti pa “cifulo iciitwa mu ciHebere Armagedone,” “ishamfumu sha ba pano isonde shonse” shikalonganikwa “ku nkondo ya bushiku bukalamba ubwa kwa Lesa Wa Maka Yonse.”—Ukusokolola 16:14.

Ni bani bakalwa inkondo ya Armagedone? Yesu Kristu ne fibumbwa fya ku muulu e bakacimfya abalwani ba kwa Lesa. (Ukusokolola 19:11-16, 19-21) Pa balwani ba kwa Lesa paba na bakaana ubutungulushi bwa kwa Lesa e lyo na bashicindika ishina lyakwe.—Esekiele 39:7.

Bushe inkondo ya Armagedone ikabela ku Middle East (Asia)? Iyo. Inkondo ya Armagedone tayakabe pa cifulo fye cimo, lelo ikaba pa calo conse.—Yeremia 25:32-34; Esekiele 39:17-20.

Ishiwi lya kuti Armagedone, nelyo “Har-magedone” (mu ciHebere Har Meghiddhonʹ), lipilibula “Ulupili lwa Megido.” Megido wali musumba uwali mu citungu ca Israele. Kale muli ici citungu e mo balelwila inkondo umo abalelwisha abanabo balecimfya umupwilapo. Inkondo shimo pali ishi shalilembwa na mu Baibolo. (Abapingushi 5:19, 20; 2 Ishamfumu 9:27; 23:29) Na lyo line, Armagedone te cifulo icabela mupepi na Megido. Takwaba ulupili ulukalamba ku Megido apo abantu abo Lesa akalwisha bengalongana, kabili nangu fye mu ni Mupokapoka wa Yesreele onse fye te kuti mwingile abantu bonse abo Lesa akonaula. Kanshi Armagedone ni nkondo ya kulekeleshako umo Lesa akalwisha bonse abakaana ukuteka kwakwe.

Bushe inkondo ya Armagedone ikaba shani? Nangu ca kuti tatwaishiba ifyo Lesa akabomfya pa konaula abantu, twalishiba ukutila kuti abomfya ifyo abomfeshepo kale pamo nga imfula ya mabwe, icinkukuma, ilyeshi, umulilo ne libwe lya mingu, inkuba, na malwele. (Yobo 38:22, 23; Esekiele 38:19, 22; Habakuki 3:10, 11; Sekaria 14:12) Inkondo ikafulunganya abalwani ba kwa Lesa bamo ica kuti bakatendeka ukwipayana, na lyo line bakeshiba ukuti Lesa e ulebakanda.—Esekiele 38:21, 23; Sekaria 14:13.

Bushe icalo cikonaulwa pa Armagedone? Armagedone tayakonaule cino calo, pantu icalo e co Lesa apeela abantu ukwikalamo umuyayaya. (Amalumbo 37:29; 96:10; Lukala Milandu 1:4) Na kuba Armagedone tayakeshile ukonaula abantu, lelo ikapususha abantu abengi pantu kukaba “ibumba likalamba” ilya babomfi ba kwa Lesa ilikapusuka.Ukusokolola 7:9, 14; Amalumbo 37:34.

Lelo Baibolo nga yalanda ati icalo, limo ninshi ilelanda pa bantu ababipa abashumfwila Lesa. (1 Yohane 2:15-17) Kanshi aba bantu e “calo cili ku mpela” ico Armagedone ikonaula.—Mateo 24:3.

Ni lilali kukaba inkondo ya Armagedone? Ilyo Yesu alandile pa “bucushi bukalamba” ubukatwalilila ukufika pa Armagedone, atile: “Ulwa bushiku bulya ne nshita takuli uwaishiba, nangu ni bamalaika ba mu muulu nangu Mwana, kano fye Tata.” (Mateo 24:21, 36) Na lyo line, ifyo Baibolo ilanda filanga ukuti Armagedone ikabako mu nshita ya kubapo kwa kwa Yesu ukwatendeke mu 1914.—Mateo 24:37-39.