Icasuko ca mu Baibolo

 Ilingi tulatontonkanya pa mulandu abantu bafwila, maka maka nga ca kuti ufwile muntu twatemwa. Baibolo itila: “Awe ulubola ululeta imfwa lubembu.”—1 Abena Korinti 15:56.

Cinshi abantu bonse babela ababembu kabili cinshi tufwila?

 Abantu bakubalilapo, Adamu na Efa, balifwile pantu balibembukile Lesa. (Ukutendeka 3:17-19) Lesa uo babembukiile, e “ntulo ya bumi,” kanshi e calengele ukuti bafwe.—Amalumbo 36:9; Ukutendeka 2:17.

 Adamu alyambukisheko abana bakwe bonse ulubembu na mafya yabako pa mulandu wa lubembu. Baibolo ilanda ukuti: “Filya ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” (Abena Roma 5:12) Abantu bonse balafwa pantu bonse babembu.—Abena Roma 3:23.

Ifyo Lesa akafumyapo imfwa

 Lesa alilaya ukuti kukaba inshita ilyo “akamina imfwa umuyayaya.” (Esaya 25:8) Pa kufumyapo imfwa, akabalilapo ukufumyapo ulubembu pantu e lulenga abantu ukulafwa. Lesa akafumyapo imfwa ukubomfya Yesu Kristu, ‘uusenda ulubembu lwa ba mu calo’—Yohane 1:29; 1 Yohane 1:7.