Dakul na magkailusyon an nag-iibanan nguna bago magpakasal. Ginigibo iyan kan iba huling gusto nindang maaraman kun baga bagay talaga sinda sa kada saro. Naglalaom man sinda na makakatabang iyan na magkaigwa nin mapangganang pag-aguman. Marahay na ideya daw na mag-live-in nguna bago magpakasal?

Sa artikulong ini

•  Ano an sinasabi kan Bibliya?

•  Magigin mas andam daw kamo sa pag-aguman kun ma-live-in nguna kamo?

•  Magigin mas andam daw kamo sa pinansiyal kun ma-live-in nguna kamo?

•  Malilikayan mo daw na magpakasal sa salang tawo kun ma-live-in nguna kamo?

•  Igwa daw nin mas marahay na opsiyon?

 Ano an sinasabi kan Bibliya?

•   Kinokondenar kan Bibliya an pag-sex kan bakong mag-agom. Halimbawa, sinasabi kaiyan: “Maglikay sa seksuwal na imoralidad.” (1 Tesalonica 4:3; 1 Corinto 6:18) Kaiba diyan an pag-sex nin magka-live-in dawa pa kun may plano sindang magpakasal. a Nakakatabang an mga pamantayan kan Bibliya na malikayan kan magkailusyon an pagbados na dai pa kasal asin an iba pang problema na resulta kan pag-live-in nguna bago magpakasal.

•   Hali sa Diyos an areglo nin pag-aguman. Kan punan niya iyan, sinabi niya: “Babayaan kan lalaki an saiyang ama saka an saiyang ina asin magdadanay siyang kaibanan kan saiyang agom, asin sinda magigin sarong laman.” (Genesis 2:24) An pag-utob sa sumpaan bilang mag-agom iyo an pinakamarahay na pundasyon para sa sarong masarig asin pano nin pagkamuot na pamilya.

 Magigin mas andam daw kamo sa pag-aguman kun ma-live-in nguna kamo?

 An sabi kan iba, iyo. Iniisip ninda na mantang magkaibanan nindang ginigibo an mga gibuhon sa harong saka namamasdan an mga ugali kan kada saro, nakakakua sinda nin eksperyensiya na makakatabang na marhay sa pag-ibanan ninda pag mag-agom na sinda. Pero, mahalagang marhay an pag-utob sa sinumpaan para magin mapanggana an pag-aguman.

 Paano makakanuod an magkailusyon na magdanay na magkaibanan, marahay man o bako an sitwasyon? An simbag diyan bako na purbaran nguna nindang mag-ibanan, na iniisip na sa panahon na iyan ano man na oras puwedeng putulon kan siisay man sa sainda an relasyon ninda. Imbes, magkukusog an relasyon ninda kun pareho sindang determinadong utubon an sumpaan ninda sa lambang saro saka nagtitinabangan na solusyunan an mga problema.

 Tandaan: An pag-live-in bakong pag-andam para sa pag-aguman. Imbes, tibaad pag-andam pa ngani iyan para sa pagsuwayan.

 Prinsipyo sa Bibliya: “Ano man an itinatanom nin sarong tawo, ini man an saiyang aanihon.”—Galacia 6:7.

 Magigin mas andam daw kamo sa pinansiyal kun ma-live-in nguna kamo?

 An sabi kan iba, iyo. Uyon sa sarong surbey na ginibo kan Pew Research Center sa Estados Unidos, mga 40% nin mga adulto an nag-live-in dahil gusto nindang makatipid. Pero kan haloy-haloy na sindang nag-iibanan, dakul sa sainda an nagsabi na problema sa pinansiyal an sarong panginot na dahilan kun taano ta dai pa sinda handang magpakasal.

 May iba pang bakong marahay na mga resulta an pag-live-in bago magpakasal, lalo na sa mga babayi. Halimbawa, pag naputol na an relasyon, sa mga babayi sa parati nawawalat an responsabilidad na magpadakula kan mga aki.

 Tandaan: Mas dakul an puwedeng magin bakong marahay na resulta kan pag-live-in kisa sa inaasahan na mga pakinabang kaiyan.

 Prinsipyo sa Bibliya: “Ako, si Jehova, an saimong Diyos, an Saro na nagtutukdo sa saimo tanganing makinabang ka.”—Isaias 48:17.

 Malilikayan mo daw na magpakasal sa salang tawo kun ma-live-in nguna kamo?

 An sabi kan iba, iyo. Pero, “sa parati dai naiisip kan mga nagli-live-in bago magpakasal na mas masasakitan sindang makipagsuwayan dahil diyan,” an sabi kan librong Fighting for Your Marriage. Taano? Huling dawa ngani madiskubre nindang may seryosong mga bagay palan sindang dai ninda mapagkakauyunan, dai sinda nagsusuwayan dahil may mga obligasyon sinda na sa saindang duwa. Halimbawa, tibaad may mga pet sinda, banga sa arkila kan harong, nagbados nin dai inaasahan, o iba pa. b Huli kaiyan, “may mga tawong gusto na kutanang makipagsuwayan bago magpakasal pero nagdesisyon na magpakasal na lang ta mas pasil sa sainda na ipagpadagos na sana an napunan ninda,” an sabi pa kan Fighting for Your Marriage.

 Tandaan: Imbes na makatabang saimo na makagibo nin marahay na desisyon, an pag-live-in puwede pa nganing makapadipisil na tapuson an bakong marahay na relasyon.

 Prinsipyo sa Bibliya: “An saro na alisto an isip nahihiling an peligro asin minatago, pero an daing eksperyensiya minadiretso sana asin sinasapar an mga konsekwensiya.”—Talinhaga 22:3.

 Igwa daw nin mas marahay na opsiyon?

 Puwede nindong malikayan an mga peligrong dara kan pag-live-in nguna bago magpakasal asin magin mas posible na magkaigwa nin mapangganang pag-aguman. Paano? Kun susunudon nanggad nindo an pamantayan kan Bibliya para sa pag-aguman. Bistuhon ngunang marhay an tawong gusto mong pakasalan bago kamo mag-ibanan bilang mag-agom. Pinakamarahay kun an pipilion mong magin agom kapareho mo nin mga prinsipyo sa buhay asin mga paniniwala, na iyo an mas importante kisa sa seksuwal na atraksiyon.

 May mga sadol an Bibliya na makakatabang saindo na magin maugma asin masarig an saindong pag-ibanan bilang mag-agom. c Halimbawa, may mga prinsipyo sa Bibliya na makakatabang saimo na . . .

•   malikayan na dai magin maimbod sa agom

•   magkaigwa kan mga kuwalidad para magin marahay na agom

•   turutimbangon kun baga ipapadagos mo pa an saindong relasyon base sa bakong marahay na mga kuwalidad na tibaad mahiling mo sa saiya mantang magkailusyon pa sana kamo

 Para sa dagdag na impormasyon manungod sa mga temang ini, hilingon an seksiyon na “Pag-aguman Asin Pamilya” sa jw.org.

 Prinsipyo sa Bibliya: “An bilog na Kasuratan ipinasabong nin Diyos asin kapaki-pakinabang sa pagtukdo.”—2 Timoteo 3:16.