An simbag kan Bibliya

 Gusto nin Diyos na tawan kita nin “magayon na puturo asin paglaom,” a an sabi kan Bibliya. (Jeremias 29:11) Sa katunayan, an sarong dahilan kun taano ta itinao sato nin Diyos an Bibliya iyo na “paagi sa karangahan hali sa Kasuratan magkaigwa kita nin paglaom.” (Roma 15:4) Arog kan maaaraman ta, an marahay na paggiya kan Bibliya makakatao sa sato nin paglaom sa buhay o makakatabang na magin positibo kita sa aroaldaw, asin an mga panuga kaiyan nagtatao sa sato nin magayunon na paglaom sa maabot na panahon.

Sa artikulong ini

•  Paano kita tinatabangan kan Bibliya na magin positibo?

•  Anong paglaom an itinatao kan Bibliya sa gabos na tawo?

•  Mga teksto sa Bibliya manungod sa paglaom

 Paano kita tinatabangan kan Bibliya na magin positibo?

 Tinatawan kita kaiyan nin praktikal na mga paagi na makakatabang sa sato na magin maugma sa buhay. Pag-isipan an nagkapirang halimbawa kaiyan.

•   Mag-asa sa Bibliya para sa praktikal na paggiya. Sinasabi kan Salmo 119:105: “An saimong tataramon lampara sa bitis ko, asin liwanag para sa dalan ko.” Duwang bagay an puwedeng magibo nin makusog na liwanag. Nakakatabang iyan na malinaw tang mahiling an dalan na nasa inutan ta, saka pati man an mas nasa inutan pa. Sa kaagid na paagi, makakatabang sa sato an praktikal na mga prinsipyo sa Bibliya na magin mahusay kita sa pag-atubang sa satong mga problema ngunyan, kaya nagigin positibo kita sa aroaldaw. An mga katukduan sa Bibliya nakakapabalik kan satong kusog asin “nakakapaugma sa puso.” (Salmo 19:7, 8) Kasabay kaiyan, ihinahayag kan Bibliya an manungod sa magayunon na katuyuhan nin Diyos para sa puturo kan katawuhan asin kan daga. An paglaom na iyan makakatao sa sato nin nagdadanay na kaugmahan asin pagkakontento.

•   Tugutan an iba na tabangan ka. Pag garo baga mayo nang paglaom an sitwasyon ta, tibaad an tendensiya ta magrayo sa satong mga kapamilya o amigo. Sinasabi sa sato kan Bibliya na bako iyan madunong, huling puwede iyan na magresulta sa bakong marahay na mga desisyon asin paggawi. (Talinhaga 18:1) Makakatabang an satong mga kapamilya na magin balanse kita sa mga bagay-bagay. Tibaad makatao man sinda nin kapaki-pakinabang na mga suhestiyon kun paano maaatubang an sarong masakit na sitwasyon. (Talinhaga 11:14) Asin dawa ngani dai ninda magibo an mga iyan, maski paano mararanga asin mapapagian ninda an pagmati ta, na makakatao sa sato nin kusog na makapagpadagos sagkod na magrahay na an satong sitwasyon.—Talinhaga 12:25.

•   Mamibi sa Diyos. Sinasabi kan Bibliya: “Ipasa mo ki Jehova an saimong pasan, asin aalalayan ka niya. Dai niya nuarin man tutugutan na matumba an saro na matanos.” b (Salmo 55:22) Kaya angay sanang apudon si Jehova bilang “an Diyos na nagtatao nin paglaom.” (Roma 15:13) Puwede mong ipamibi sa saiya an manungod sa “gabos [mong] kahaditan,” na nagtitiwala na nagmamakulog siya saimo. (1 Pedro 5:7) Sa katunayan, sinasabi kan Bibliya: “Paparigunon niya kamo, papakusugon niya kamo, ibubugtak niya kamo sa masarig na pundasyon.”—1 Pedro 5:10.

•   Tugutan na mapakusog kan mga pagbalo an saimong paglaom. Nangangako an Bibliya: “An saro na naghihimati sa [Diyos] maistar sa katiwasayan asin dai mapupurisaw nin grabeng takot sa kapahamakan.” (Talinhaga 1:33) Kan radason nin bagyo an harong ni Margaret na taga Australia, nawara an dakul sa mga pagsadiri niya. Pero imbes na magpadaog sa namamatian niyang kawaran nin paglaom, may mahalaga siyang nanudan—na an materyal na mga pagsadiri puwedeng madalion sanang mawara. Puon kaidto, nagin mas determinado siyang magpokus sa mga bagay na tunay na mahalaga—an saiyang pamilya saka mga amigo, an saiyang relasyon sa Diyos, asin an paglaom na nasa Bibliya.—Salmo 37:34; Santiago 4:8.

 Anong paglaom an itinatao kan Bibliya sa gabos na tawo?

 Nangangako an Bibliya nin sarong magayunon na puturo para sa mga tawo asin sa daga. Asin madali na iyan na mag-abot. Sa katunayan, an mga problemang napapaatubang ngunyan sa katawuhan nagpapahiling na nabubuhay na kita sa “huring mga aldaw” kan kinaban na ini. (2 Timoteo 3:1-5) Dai na mahahaloy, mapapasairarom na sa kontrol nin Diyos an mga bagay-bagay digdi sa daga asin hahalion niya an inhustisya saka pagsakit. Gigibuhon niya iyan paagi sa sarong gobyerno na mamamahala sa bilog na kinaban—an Kahadian nin Diyos. (Daniel 2:44; Kapahayagan 11:15) An langitnon na gobyernong iyan an nasa isip ni Jesus kan sambiton niya sa saiyang modelong pamibi: “Dumatong lugod an Kahadian mo. Mangyari lugod an kabutan mo . . . sa daga.”—Mateo 6:9, 10.

 Malinaw na sinasambit sa Bibliya an kabutan nin Diyos para sa katawuhan. Mangnuhon an nagkapira sa mga problemang hahalion kan Kahadian nin Diyos:

•   Mayo na nin magugutom. “An daga mismo magtatao kan bunga kaiyan.”—Salmo 67:6.

•   Mayo na nin magkakahilang. “Mayo nin residente na masabi: ‘May hilang ako.’ ”—Isaias 33:24.

•   Mayo na nin kagadanan. “Papahidon [nin Diyos] an gabos na luha sa . . . mga mata [kan katawuhan], asin mawawara na an kagadanan, pati pagmundo, pagtangis, asin kulog. An dating mga bagay nakalihis na.”—Kapahayagan 21:3, 4.