An simbag kan Bibliya

 Nagtutubod an mga Kristiyano na nagadan si Jesus para sa mga kasalan kan katawuhan. (1 Pedro 3:18) Pero tanganing maligtas, urog pa sa pagtubod na si Jesus an Paraligtas an kaipuhan. Aram kan mga demonyo na si Jesus “an Aki nin Diyos,” pero imbes na maligtas, lalaglagon sinda.—Lucas 4:41; Judas 6.

•  Ano an kaipuhan kong gibuhon para maligtas?

•  Makakatabang daw an “Pamibi nin Makasalan”?

•  Sain hali an “Pamibi nin Makasalan”?

 Ano an kaipuhan kong gibuhon para maligtas?

•   Dapat na magtubod ka na itinao ni Jesus an buhay niya para sa satong mga kasalan. (Gibo 16:30, 31; 1 Juan 2:2) Kaiba digdi an pagtubod na talagang nabuhay si Jesus asin na tama an gabos na sinasabi kan Bibliya manungod saiya.

•   Pag-adalan kun ano talaga an itinutukdo kan Bibliya. (2 Timoteo 3:15) Mababasa sa Bibliya na sinabi ni apostol Pablo asin ni Silas sa sarong guwardiya kan presuhan: “Magtubod ka sa Kagurangnan na Jesus, asin maliligtas ka.” Dangan, pinunan nindang tukduan kan “tataramon ni Jehova” a an guwardiya kan presuhan. (Gibo 16:31, 32) Ipinaparisa kaiyan na dai masasabing nagtutubod ki Jesus an guwardiya kan presuhan kun dai niya nasasabutan an panginot na mga katukduan kan Tataramon nin Diyos. Kaipuhan niya nin tamang kaaraman na nakabasar sa Kasuratan.—1 Timoteo 2:3, 4.

•   Magsulsol. (Gibo 3:19) Dapat mo man pagsulsulan, o ikamundong marhay, an salang mga kaisipan saka paggawi mo kaidto. Mahihiling kan iba an saimong pagsulsol pag dai mo na ginigibo an mga bagay na habo nin Diyos asin ginigibo mo na an “mga gibong angay sa pagsulsol.”—Gibo 26:20.

•   Magpabawtismo. (Mateo 28:19) Sinabi ni Jesus na dapat bawtismuhan an mga gustong magin disipulo niya. Binawtismuhan an guwardiya sa presuhan na sinambit subago. (Gibo 16:33) Pagkatapos man na tukduan ni apostol Pedro kan katotoohan manungod ki Jesus an sarong dakulang grupo, “binawtismuhan idtong mga maugmang nag-ako kan saiyang tataramon.”—Gibo 2:40, 41.

•   Magsunod sa mga instruksiyon ni Jesus. (Hebreo 5:9) Paagi sa saindang pamumuhay, ipinapahiling kan mga ‘nag-uutob kan gabos na bagay’ na mga parasunod niya sinda. (Mateo 28:20) Nagigin sindang “mga parautob . . . kan tataramon asin bakong mga paradangog sana.”—Santiago 1:22.

•   Magtagal sagkod sa katapusan. (Marcos 13:13) Para maligtas, an mga disipulo ni Jesus “kaipuhan . . . nin pakatagal.” (Hebreo 10:36) Halimbawa, padagos na sinunod na marhay ni apostol Pablo an mga katukduan ni Jesus asin nagdanay siyang maimbod sa Diyos. Iyan an nagin buhay niya puon kan magin Kristiyano siya sagkod sa kagadanan niya.—1 Corinto 9:27.

 Makakatabang daw an “Pamibi nin Makasalan”?

 Sa nagkapirang relihiyon, may sinasambit sindang partikular na mga pamibi arog kan “Pamibi nin Makasalan.” Sa parati, an mga namimibi kaiyan inaadmitir an pagigin makasalan ninda asin ipinapahayag an saindang pagtubod na nagadan si Jesus para sa saindang mga kasalan. Inaarang man ninda na mapasapuso ninda si Jesus o na maglaog siya sa saindang buhay. Pero an Bibliya dai nagsasambit nin ano man na “Pamibi nin Makasalan” asin dai man iyan nagrerekomendar na gumibo asin magtuom nin arog kaiyan na pamibi.

 May mga naniniwala na pag an sarong tawo makapahayag na nin “Pamibi nin Makasalan,” sigurado nang makakamtan niya an daing sagkod na kaligtasan. Pero mayo man nin pamibi na makakagarantiya nin kaligtasan. Saka bako kitang perpekto kaya padagos kitang nasasala. (1 Juan 1:8) Iyan an dahilan kun taano ta tinukduan ni Jesus an mga parasunod niya na regular na mamibi para sa kapatawadan nin mga kasalan. (Lucas 11:2, 4) Dugang pa, may mga Kristiyano ngani na magkakamit kutana nin daing sagkod na kaligtasan pero naiwara an paglaom na iyan dahil tinalikdan ninda an Diyos.—Hebreo 6:4-6; 2 Pedro 2:20, 21.

 Sain hali an “Pamibi nin Makasalan”?

 Dai nagkakauruyon an mga historyador sa pinaghalian kan “Pamibi nin Makasalan.” May mga nagsasabi na nagpuon an tradisyon na ini kan panahon kan Reporma Protestante. An iba man nagsasabi na nagpuon na gamiton kan mga tawo an “Pamibi nin Makasalan” kan may mangyaring mga pagbabago sa relihiyon kan ika-18 asin ika-19 siglo. Ano man an pinaghalian kaiyan, bako iyan kauyon kan Kasuratan. An totoo ngani, kontra iyan sa itinutukdo kan Bibliya.