Kun Paano Mamibi—An Ama Niyamo Daw an Pinakamarahay na Paagi?
An simbag kan Bibliya
An pamibing ini ni Jesus nagtatao nin giya sa sato kun paano kita dapat mamibi asin kun ano an mga dapat tang ipamibi. Ini an isinimbag niya sa pakiulay kan saiyang mga disipulo: “Kagurangnan, tukduan mo kami kun paano mamibi.” (Lucas 11:1) Alagad, bako sana an Ama Niyamo, o Pamibi kan Kagurangan, an pamibing inaako nin Diyos. a Imbes, itinao ini ni Jesus bilang halimbawa nin mga pamibing dinadangog nin Diyos.
Sa artikulong ini
Ano an laog kan Ama Niyamo?
Sa nagkapirang traduksiyon nin Bibliya, magkakalain an pagkasambit sa Ama Niyamo na nasa Mateo 6:9-13. Uni an duwang halimbawa.
Bagong Kinaban na Traduksiyon: “Ama niyamo na nasa langit, pakangbanalon an pangaran mo. Dumatong lugod an Kahadian mo. Mangyari lugod an kabutan mo, kun paano sa langit, siring man sa daga. Itao mo samuya ngunyan an samong kakanon para sa aldaw na ini; asin patawadon mo kami sa samuyang mga kasalan, kun paanong nagpatawad man kami sa mga nagkasala sa samo. Asin dai mo kami pagpabayaan na madaog nin sugot, kundi iligtas mo kami sa saro na maraot.”
Magna Banal na Kasuratan (BIC): “Mamibi gñani kamo nin siring: Ama niamo, na yaon ka sa lagñit. Sasambahon an gñaran mo. Dumatong logod an kahadean mo. Guibohon an boot mo, digdi sa daga nin siring sa lagñit. Itao mo samo gñunian an samong kakanon sa aroaldao. Asin ipatawad mo samo an samong magña kasalan siring na kamo nagpatawad sa magña may sala samo. Asin dai mo kami darahon sa sugot, kundi iligtas mo kami sa maraot.” b
Ano an kahulugan kan Ama Niyamo?
An mga itinukdo ni Jesus kauyon kan gabos na iba pang mga katukduan sa Bibliya, kaya siguradong makakatabang an iba pang mga parte kaini na masabutan an kahulugan kan Ama Niyamo.
“Ama niyamo na nasa langit”
Tama sanang apudon an Diyos na satong “Ama” dahil linalang niya kita asin tinawan nin buhay.—Isaias 64:8.
“Pakangbanalon an pangaran mo”
An pangaran nin Diyos, na Jehova, dapat na tawan nin onra saka ibilang na banal, o sagrado. Nakakatabang an mga tawo na mapakangbanal an pangaran nin Diyos pag ipinapahayag ninda an manungod sa saiyang mga kuwalidad asin ipinapamidbid an saiyang mga katuyuhan.—Salmo 83:18; Isaias 6:3.
“Dumatong lugod an Kahadian mo”
An Kahadian nin Diyos sarong gobyerno sa langit na si Jesus an Hadi. Itinukdo sa sato ni Jesus na ipamibi na mamahala na an gobyernong iyan sa bilog na daga.—Daniel 2:44; Kapahayagan 11:15.
“Mangyari lugod an kabutan mo, kun paano sa langit, siring man sa daga”
Kun paanong mayo nin karatan asin kagadanan sa langit, kabutan nin Diyos para sa daga na mag-istar diyan an mga tawo sagkod lamang nin may katuninungan asin katiwasayan.—Salmo 37:11, 29.
“Itao mo samuya ngunyan an samong kakanon para sa aldaw na ini”
An tinapay sarong panginot na kakanon kan panahon ni Jesus. Dapat na tandaan niyato na nakadepende kita sa satuyang Kaglalang para sa mga bagay na kaipuhan ta para mabuhay.—Gibo 17:24, 25.
“Patawadon mo kami sa samuyang mga kasalan, kun paanong nagpatawad man kami sa mga nagkasala sa samo”
An gabos na tawo nagkakasala asin nangangaipo nin pagpapatawad. Pero kun gusto niyatong makamtan an pagpapatawad nin Diyos, dapat na andam kitang patawadon an iba sa mga kasalan ninda sato.—Mateo 6:14, 15.
“Dai mo kami pagpabayaan na madaog nin sugot, kundi iligtas mo kami sa saro na maraot”
Dai lamang kita tinetentaran kan Diyos na Jehova na gumibo nin sala. (Santiago 1:13) Pero tinetentaran kita kan “saro na maraot,” si Satanas na Diyablo—inaapod man na “an Paratentar.” (1 Juan 5:19; Mateo 4:1-4) Hinahagad ta ki Jehova na tabangan kitang dai madaog pag nasusugutan kitang suwayon siya.
An Ama Niyamo lang daw an solamenteng paagi para mamibi?
Itinao ni Jesus an Ama Niyamo bilang halimbawa. Kaya dai ini dapat pauruutrong sambiton nin termino por termino. Bago mismo itinao ni Jesus an Ama Niyamo, nagpatanid siya: “Pag namimibi, dai nindo pagparauruutruhon an iyo man sanang mga tataramon.” (Mateo 6:7) Kan magtao siya nin sarong modelong pamibi sa iba pang pagkakataon, naggamit siya nin ibang mga tataramon.—Lucas 11:2-4.
An pinakamarahay na paagi nin pagpamibi iyo an paggamit nin udok sa pusong mga tataramon na hali sa puso.—Salmo 62:8.
Paano kita dapat mamibi?
An Ama Niyamo sarong marahay na halimbawa sa kun paano mamibi sa paaging dadangugon nin Diyos. Mangnuhon kun paano iyan kauyon kan iba pang mga teksto sa Bibliya manungod sa pamibi.
Sa Diyos sana mamibi
Teksto: “Sa gabos na bagay paagi sa pamibi asin pagngayo-ngayo na may kaibang pasasalamat, ipaaram nindo sa Diyos an saindong mga kahagadan.”—Filipos 4:6.
Kahulugan: Dapat na sa Diyos kita mamibi—bako ki Jesus, Maria, o mga santo. Paagi sa pambukas na mga tataramon na “Ama niyamo,” tinutukduan kita kan pamibing iyan ni Jesus na sa Diyos na Jehova sana kita dapat mamibi.
Ipamibi an mga bagay na kauyon kan kabutan nin Diyos
Teksto: “Ano man na hagadon ta kauyon kan saiyang kabutan, dinadangog niya kita.”—1 Juan 5:14.
Kahulugan: Puwede tang ipamibi an ano man na bagay na kauyon kan kabutan nin Diyos. Para masabutan niyato kun gurano kaimportante an kabutan nin Diyos, iiniba ni Jesus sa Ama niyamo an ekspresyon na “mangyari lugod an kabutan mo.” Maaaraman ta an manungod sa kabutan nin Diyos para sa daga asin sa mga tawo paagi sa pag-adal kan Bibliya.
Ipamibi an manungod sa mga ikinakahadit mo
Teksto: “Ipasa mo ki Jehova an saimong pasan, asin aalalayan ka niya.”—Salmo 55:22.
Kahulugan: Interesado si Jehova manungod sa mga ikinakahadit ta. Kun paanong iiniba ni Jesus sa Ama Niyamo an nagkapirang personal na pakiulay, puwede man kitang mamibi para sa materyal na mga pangangaipo ta sa aroaldaw, paggiya pag naggigibo nin importanteng mga desisyon, tabang pag nasa masakit na panahon, asin kapatawadan sa satong mga kasalan. c
a Halimbawa, nagsambit si Jesus asin an mga disipulo niya nin iba pang mga pamibi na an mga tataramon na ginamit bakong eksaktong kapareho kan sa modelong pamibing ini.—Lucas 23:34; Filipos 1:9.
b An Banal na Kasuratan nagtapos paagi sa mga tataramon na: “Huli ta siamo an kahadean, asin an kapangyarihan, patin an kamurawayan, sagkod noarin man. Auot pa.” An kapahayagan na ini nin pag-umaw sa Diyos, na mahihiling man sa nagkapirang iba pang Bibliya, inaapod man na doxology. Alagad, ini an sabi sa The Jerome Biblical Commentary: “An doxology . . . mayo sa pinakamasasarigan [na mga manuskrito].”
c May mga tawong nakagibo nin kasalan na gustong maghagad nin tawad sa Diyos, pero dahil sa grabeng pagkakonsiyensiya, dai ninda magibong mamibi. Pero ini an pakiulay ni Jehova sa sainda: “Husayon niyato an mga bagay-bagay sa pag-ultanan ta.” (Isaias 1:18) Dai niya babaliwalaon an siisay man na sinserong naghahagad nin tawad sa saiya.
Puwede Mo Man Magustuhan
AN TORRENGBANTAYAN
Taano ta Kaipuhan na Mamibi?
Pagmati mo daw dai dinadangog nin Diyos an mga pamibi mo? Kun iyo, bako sana ika an nakakamati kaiyan.
MAHALAGANG MGA TUKDO KAN BIBLIYA
Dinadangog Daw nin Diyos an Gabos na Pamibi?
Paano kun makasadiri an pamibi nin saro? Paano kun minamaltrato kan saro an saiyang agom, tapos mamimibi siya na bendisyunan siya nin Diyos?
AN TORRENGBANTAYAN
Taano ta Bakong Gabos na Pamibi Sinisimbag nin Diyos?
Sinasabi kan Bibliya an klase nin mga pamibi na sisimbagon nin Diyos asin an dai niya sisimbagon.
AN TORRENGBANTAYAN
“Mapasamuya an Kahadian Mo”—Sarong Pamibi na Inuuruutro nin Minilyon na Tawo
Anong mga hapot manungod sa Kahadian nin Diyos an kaipuhan na masimbag para masabutan ta an kahulugan kan pamibing ini?
MANUNGOD SAMO
Mag-atender sa Pagtiripon
Aramon an manungod sa samong mga pagtiripon. Maghanap nin pagtiripon na harani sa lugar mo.