An simbag kan Bibliya

 Kabutan nin Diyos na mamidbid mo siya, magin harani saiya, saka mamutan asin paglingkudan mo siya nin bilog na puso. (Mateo 22:37, 38; Santiago 4:8) Manunudan mo kun paano gigibuhon an kabutan nin Diyos kun pag-aadalan mo an buhay saka mga itinukdo ni Jesus. (Juan 7:16, 17) Dai lang basta itinukdo ni Jesus an manungod sa kabutan nin Diyos kundi isinabuhay niya iyan. Sa katunayan, sinabi ni Jesus na an katuyuhan niya sa buhay iyo na “gibuhon, bako an sadiri kong kabutan, kundi an kabutan niya na nagsugo sa sako.”—Juan 6:38.

Kaipuhan ko daw nin espesyal na tanda, bisyon o pangapudan para maaraman an kabutan nin Diyos para sakuya?

 Dai, dahil nasa Bibliya an mensahe nin Diyos para sa mga tawo. Yaon diyan an mga kaipuhan mo para magin “lubos na nasangkapan para sa gabos na marahay na gibo.” (2 Timoteo 3:16, 17) Gusto nin Diyos na gamiton mo an Bibliya asin an saimong “kakayahan sa pangangatanusan” tanganing maaraman an kabutan niya para saimo.—Roma 12:1, 2; Efeso 5:17.

Kaya ko daw talagang gibuhon an kabutan nin Diyos?

 Iyo, kaya mo, dahil sinasabi kan Bibliya: “An saiyang mga togon bako man masakit na pag-otobon.” (1 Juan 5:3, An Marahay na Bareta Biblia [BPV]) Dai man buot sabihon kaiyan na pirming madali an pagsunod sa mga tugon nin Diyos. Pero magigin sulit nanggad an paghihinguwa mo. Sinabi mismo ni Jesus: “Maugma an mga nagdadangog kan tataramon nin Diyos asin nag-uutob kaiyan!”—Lucas 11:28.