An simbag kan Bibliya

 Grabe an impluwensiya kan Diyablo asin kan mga demonyo sa mga tawo kaya nasabi ngani kan Bibliya: “An bilog na kinaban nasa kapangyarihan kan Maraot.” (1 Juan 5:19, An Marahay na Bareta Biblia [Bikol Popular Version]) Sinambit kan Bibliya an mga paagi kun paano iniimpluwensiyahan kan Diyablo an mga tawo.

•   Pandadaya. Dinadagka kan Bibliya an mga Kristiyano na ‘labanan an mga pakana kan Diyablo.’ (Efeso 6:11, An Banal na Biblia [An mga Obispo sa Bikol]) Saro sa mga pakanang ginagamit niya iyo an pagpaniwala sa mga tawo na an saiyang mga alipores mga lingkod talaga nin Diyos.—2 Corinto 11:13-15.

•   Espiritismo. Dinadaya kan Diyablo an mga tawo paagi sa mga espiritista, parahula, o sa mga nagsasagibo nin astrolohiya. (Deuteronomio 18:10-12) An paggamit nin droga, hipnotismo, asin meditasyon para halion an gabos na iniisip nagbubugtak man sa saro sa peligrong makontrol nin demonyo.—Lucas 11:24-26.

•   Palsong relihiyon. Paagi sa palsong mga doktrina, dinadaya kan mga relihiyon an mga tawo na suwayon an Diyos. (1 Corinto 10:20) An mga palsong mga paniniwala na ini inaapod kan Bibliya na “katukduan nin mga demonyo.”—1 Timoteo 4:1.

•   Pagsanib. May mga mababasa kita sa Bibliya na mga pangyayari na diyan sinaniban nin maraot na mga espiritu an mga tawo. Kun minsan an mga tawong sinaniban nagigin buta o dai nakakataram o kinukulgan pa ngani an sadiri ninda.—Mateo 12:22; Marcos 5:2-5.

Kun paano malilikayan an impluwensiya kan Diyablo

 Dai mo kaipuhan na mabuhay na may grabeng takot na tibaad makontrol ka kan mga demonyo, huling ipinapahiling kan Bibliya na kaya mong mapangganang malabanan an Diyablo:

•   Aramon an mga pamamaaging ginagamit kan Diyablo tanganing dai ka magin “ignorante sa saiyang mga pakana.”—2 Corinto 2:11.

•   Kumua nin kaaraman hali sa Bibliya, dangan isabuhay an mga nanunudan mo. Kun isasabuhay mo an mga prinsipyo sa Bibliya, mapoprotektaran ka kaiyan sa impluwensiya kan Diyablo.—Efeso 6:11-18.

•   Halion an ano man na bagay na konektado sa mga sa-demonyong gibo. (Gibo 19:19) Kaiba diyan an mga musika, libro, magasin, poster, asin mga video na nagsusuportar sa espiritismo.