NEW YORK—Huli sa papaabot na huma na ipagbawal an saindang mga aktibidad nin pagsamba duman sa Russia, direktang nag-apelar an Mga Saksi ni Jehova sa mga opisyal kan Kremlin asin Korte Suprema tanganing maghagad nin tabang paagi sa sarong pambilog na kinaban na kampanya nin paggibo nin surat. Nangapudan an Namamahalang Grupo kan Mga Saksi ni Jehova sa labing 8,000,000 na Saksi sa bilog na kinaban na magpartisipar sa kampanyang ini.

Kan Marso 15, 2017, hinagad kan Ministry of Justice kan Russia sa Korte Suprema kan Russian Federation na ibilang na extremist an Administrative Center of Jehovah’s Witnesses sa Russia asin ipasara iyan. Hinagad man ninda na ipagbawal an mga aktibidad kan Administrative Center. Kun mauyon an Korte Suprema digdi, an headquarters kan mga Saksi sa nasyon, na harani sa St. Petersburg, ipapasara. Pagkatapos, ipapasara man an mga 400 na rehistradong Local Religious Organizations, kaya ibibilang na ilegal an mga aktibidad kan labing 2,300 na kongregasyon kan Mga Saksi ni Jehova sa Russia. Posible man na kumpiskaron kan Gobyerno an pagsadiri kan sangay, siring man an mga lugar nin pagsamba na ginagamit kan mga Saksi sa bilog na nasyon. Saro pa, puwedeng sangatan nin kasong kriminal an sarong Saksi ni Jehova dahil lang sa pakikikabtang niya sa mga aktibidad ninda sa pagsamba. Inaasahan na mapaluwas nin desisyon an Korte Suprema sa bagay na ini sa Abril 5.

“Gusto kan Namamahalang Grupo kan Mga Saksi ni Jehova na tawan nin lubos na atensiyon an kritikal na sitwasyon na ini,” an sabi ni David A. Semonian, tagapagtaram kan world headquarters kan mga Saksi. “Saro nanggad na salang pagpaimplementar sa mga ley laban sa mga extremist kun kakasuhan an bakong bayolente saka masinunod sa ley na mga siyudadano, na garo baga sinda mga terorista. Sala talaga an mga nagin basehan kan siring na mga kaso.”

Bako ini an inot na pagkakataon na nagkaigwa an mga Saksi nin pambilog na kinaban na kampanya nin paggibo nin surat. Haros 20 taon na an nakaagi, nagsurat an mga Saksi tanganing idepensa an saindang mga kapagtubod sa Russia bilang simbag sa ginibong pagpakaraot kan ibang opisyal sa gobyerno na nasa puwesto kaidto. Nagkaigwa man kaidto an mga Saksi nin mga kampanya nin paggibo nin surat tanganing pahiruon an mga opisyal kan gobyerno na ipundo an pagpersegir sa mga Saksi sa ibang mga nasyon, arog kan sa Jordan, Korea, asin Malawi.

“Bako nanggad na krimen an pagbasa nin Bibliya, pagkanta, asin pagpamibi kaiba kan mga kapagtubod,” sabi pa ni Mr. Semonian. “Inaasahan mi na mapapahiro kan pambilog na kinaban na kampanya nin paggibo nin surat an mga opisyal kan Russia na ipundo an mayo nin balidong basehan na mga ginigibo nindang ini laban sa mga kapagtubod niyamo.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691