Ginagamit mi an samuyang mga donasyon para suportaran an relihiyosong mga aktibidad asin gibuhon na pag-ayuda kan samong organisasyon. Ginigibo mi iyan bilang parte kan samong panginot na katuyuhan: tabangan an mga tawo na magin disipulo ni Cristo Jesus.—Mateo 28:19, 20.

 Nungka ming ginagamit an mga donasyon para payamanon an siisay man. Mayo kaming sinusuwelduhan na mga elder o ministro, asin dai man binabayadan an mga Saksi ni Jehova para magharong-harong. An mga naglilingkod sa samong mga sangang opisina asin sa world headquarters, kaiba na an mga kabilang sa Namamahalang Grupo, mga miyembro nin sarong religious order asin mayo nin suweldo.

Mga Halimbawa kan mga Aktibidad Mi

•   Pagpublikar: Nagta-translate, nag-iimprenta, nagpapadara, saka nagdidistribwir kami kada taon nin minilyon na Bibliya asin nin iba pang Kristiyanong publikasyon; gabos iyan daing bayad. Saro pa, available an samong mga publikasyon sa website na jw.org saka sa JW Library app; gabos man ini libre saka mayo nin mga advertisement.

•   Pagtutugdok Asin Pagmentenar: Nagtutugdok kami asin nagmementenar nin mga simpleng lugar nin pagsamba sa bilog na kinaban para magkaigwa an samong mga kongregasyon nin angay na mga lugar para magtiripon asin sambahon an Diyos. Arog man kaiyan an ginigibo mi sa mga sangang opisina asin mga translation office. An kadaklan sa mga trabahong ini mga boluntaryo an naggigibo kaya nakakatipid kami.

•   Administrasyon: An mga gibuhon sa samong world headquarters, mga sangang opisina, asin mga translation office, pati man an mga gibuhon kan mga naglilingkod bilang nagbibiyaheng mga ministro, sinusuportaran paagi sa mga pondo na idinodonar sa samong pambilog na kinaban na gibuhon.

•   Paghuhulit: An mga Saksi dai nagpapabayad sa paghuhulit ninda kan maugmang bareta o sa pagtutukdo sa iba “kan tataramon nin Diyos.” (2 Corinto 2:17) Kaagid kaidto kan mga Kristiyano kan inot na siglo, an mga pinili asin sinanay na mga ministro na itinatao an kadaklan kan saindang panahon sa paghuhulit sinusuportaran paagi sa pagtao sa sainda nin simpleng dagusan asin panginot na mga pangangaipo sa buhay.—Filipos 4:16, 17; 1 Timoteo 5:17, 18.

•   Pagtutukdo: An samong mga asembleya asin mga kumbensiyon sinusuportaran paagi sa mga donasyon. Nagpoprodusir man kami nin mga audio asin video program na basado sa Bibliya. Igwa man kami nin mga paadalan para sanayon an mga elder asin full-time na mga ministro tanganing magin mas epektibo sinda sa saindang mga asignasyon.

•   Pag-ayuda: Nagtatao kami nin kakanon, tubig, asin maiistaran sa mga naapektaran nin kalamidad, arog nin linog, giyera, asin iba pa. An pagtabang na ini ginigibo mi bako lang “sa mga tugang [niyamo] sa pagtubod” kundi pati man sa mga bakong Saksi.—Galacia 6:10.