Dumiretso sa laog

Dumiretso sa mga laog

“An mga Salog Mag-urupak kan Saindang mga Kamot”

“An mga Salog Mag-urupak kan Saindang mga Kamot”

An Kagayonan kan mga Linalang ni Jehova

“An mga Salog Mag-urupak kan Saindang mga Kamot”

MAGHELING kamo sa sarong mapa kan daga, asin sa kadaklan na lugar, makakaheling kamo nin mga linya na pasikosiko sa mahiwas na mga kabtang kan daga. An pasikosikong mga linyang ini minabagtas sa mga kaplanodohan, desierto, asin madoot na mga lugar. Minasikosiko an mga iyan sa mga kababan, ampas, asin kadlagan. (Habacuc 3:9) Ini an mga salog, na mga ugat nin buhay kan satong planeta. An siring na mga sulogan nin tubig nagpapatotoo sa kadonongan asin kapangyarihan kan Kaglalang kan daga, si Jehova. Mantang pinagmamasdan ta an mga iyan, namamatean niato an saboot kan salmista na nag-awit: “An mga salog mag-urupak kan saindang mga kamot; an kabukidan mismo magayagayang magkururahaw nin sarabay sa atubangan ni Jehova.”​—Salmo 98:​8, 9. *

An mga salog konektadong marhay sa kasaysayan nin tawo. Sinasabi kan Biblia an manongod sa apat na mayor na salog na minasaranga hale sa sarong salog na minaluwas sa Eden. (Genesis 2:10-14) Naglataw an saro sa kaenot-enoteng sibilisasyon sa balunbon na mga kababan kan mga salog nin Tigris asin Eufrates sa Tahaw na Sirangan. An darakulang sibilisasyon nagin posible dahel sa Salog nin Hwang sa Tsina, Ganges asin Indus sa timog na Asia, asin an Nilo sa Egipto.

Bakong makangangalas, kun siring, na an tawo kaidto pa namumungnan sa kosog, kadakolan, asin kagayonan nin mga salog. An Nilo sa Egipto nagbobolos nin haros 6,670 kilometros. An midbid bilang pinakadakulang salog iyo an Amazonas kan Amerika del Sur. Mantang an nagkapirang salog nakakagulat, an iba magayonon, arog kan mas sadit nanggad alagad marikas an sulog na Salog nin Tone sa Hapon.

Ano an nagpapabolos sa salog? Sa sarong tataramon, grabidad. Grabidad an nagpapabolos kan tubig hale sa mas haralangkaw na lugar pasiring sa mas harababang lugar. Kun beses minaresulta iyan sa garo nagdadagoldol na mga busay. Ilinaladawan an mga paheling na ini nin puersa asin kadakulaan, an Biblia nagsasabi: “An mga salog kuminosog, O Jehova, an mga salog kuminosog an saindang hugong; padagos na pinakokosog kan mga salog an saindang pagburokbusok.”​—Salmo 93:3.

“Siisay an nagsusugo nin makosogon na oran?” An hapot ni Jehova sa diosnon na tawong si Job. (Job 38:​25, Contemporary English Version) Iyo, saen hale an gabos na tubig? Kalabot sa simbag an komplikadong sistema na inaapod siklo nin tubig. An tubig sa daga padagos na nagsisirkular paagi sa enerhiya kan saldang asin paagi sa grabidad. Pagkatapos na an tubig magin alisngaw, minasakat iyan sa atmospera. Sa kahurihurihi, minalipot iyan asin minakondensar tanganing magin mga panganoron. Pag-abot nin panahon, an alisngaw na ini minabuelta sa daga bilang niebe o oran. An kadaklan sa tubig natitipon sa kadagatan, mga danaw, mga salog, mga glesyer, mga polar icecap, asin sa irarom kan daga.

Mapadapit sa pambihirang siklong ini, an Biblia nagsasabi: “An gabos na kasalogan nin tiglipot minapasiring sa dagat, pero an dagat mismo dai napapano. Sa lugar na pinadudumanan kan kasalogan nin tiglipot, duman sinda minabaralik tanganing bumolos giraray.” (Eclesiastes 1:7) Solamente si Jehova, an Dios nin dai marorop na kadonongan asin mamomoton na pagmakolog, an puedeng magpahiro sa siring na siklo. Asin ano an sinasabi sa sato kan madonong na marhay na pagkadisenyong iyan manongod sa kun anong klaseng persona an Dios? Sia Dios na may dakulang kadonongan asin mamomoton na pagmakolog.​—Salmo 104:13-15, 24, 25; Talinhaga 3:​19, 20.

Sa ibong kan sokol asin kadakolan kaiyan, an mga salog an may kadikiton na tabang na tubig sa kinaban. Minsan siring, an mga iyan mahalagang marhay sa buhay. “Kun mayong nakukuang tubig asin kun dai nakokontrol minsan paano an tubig, magigin imposible an pinakasimple asin pinakakomplikadong buhay nin tawo,” an sabi kan librong Water. “An rekord kan ginibo nin tawo tanganing danay na makakua nin asin makontrol an tubig nakakontribwir nin dakula sa kasaysayan nin sibilisasyon.”

Sa laog nin rinibong taon, nagtao an mga salog nin tubig na maiinom nin tawo asin magagamit sa saiyang mga hardin. An balunbon na daga sa gilid kan dakol na salog tamang-tama sa pagpatubo nin mga pananom. Mangnoha kun paano ipinahayag an saboot na ini sa sarong bendisyon na itinao sa mga lingkod ni Jehova: “Abaang gayon kan saimong mga tolda, O Jacob, kan saimong mga tabernakulo, O Israel! Siring sa mga kababan kan sapang masulog nakakaabot an mga iyan sa harayo, siring sa mga hardin sa kataed nin salog. Siring sa mga tinanom na asibar na itinanom ni Jehova, siring sa mga sedro sa kataed nin katubigan.” (Bilang 24:​5, 6) Nakakatabang man an mga salog sa pagsustenir sa mga hayop na arog kan mga pato asin layas na ayam na naheheling nindo digdi. Sa katunayan, mantang orog na pinag-aadalan niato an manongod sa mga salog, orog man kitang itinutulod na magpasalamat ki Jehova.

[Nota sa Ibaba]

^ par. 3 Helingon an 2004 Calendar of Jehovah’s Witnesses, Mayo/Hunyo.

[Kahon/Ritrato sa pahina 8]

An Iguaçú Falls, na nasa linderos sa pag-oltanan kan Argentina asin Brazil, kabilang sa pinakamahiwas sa gabos na busay. An kalabaan kaiyan labing tolong kilometro hale sa mag-ibong na gilid. Yaon sa sarong malinigon na kadlagan sa tropiko, kompuesto iyan nin haros 300 na mas saradit na busay. Haros 10,000 metro kubikong tubig an minabagsak dian kada segundo durante nin tig-oran.

[Ritrato sa pahina 9]

Salog nin Tone, Hapon