Si Rebeca​—Sarong Diosnon na Babae na Aktibo

IPAMUGTAK na puede nindong ipili nin agom an saindong aking lalaki. Anong klaseng tawo an pipilion nindo? Anong mga kualipikasyon an kaipuhan nia? An hahanapon daw nindo saro na magayon sa pisikal, matali, maboot, asin mahigos? O may iba pa na enot nindong hehelingon?

Napaatubang si Abraham sa problemang ini. Nanuga si Jehova na mabolos an mga bendisyon sa saiyang mga gikan paagi sa saiyang aki na si Isaac. Mantang pinoponan tang estudyaran an estorya, si Abraham gurang na ngonyan, alagad an saiyang aki soltero pa man giraray. (Genesis 12:1-3, 7; 17:19; 22:​17, 18; 24:1) Huling kaiba ni Isaac sa mga bendisyon an hahanapon pang agom na babae asin an siisay man na puedeng magin aki ninda, iinareglo ni Abraham na humanap nin sarong angay na agom na babae para ki Isaac. Orog sa gabos, dapat na sia lingkod ni Jehova. Huling mayo nin siring na babae na manonompongan sa Canaan, na duman nag-eerok si Abraham, kaipuhan niang maghanap sa ibang lugar. An napili sa katapustapusi iyo si Rebeca. Paano sia nanompongan? Sia daw espirituwal na babae? Ano an manonodan niato sa pag-estudyar sa saiyang halimbawa?

An Paghanap nin Kualipikadong Babae

Sinugo ni Abraham an saiyang pinakamatuang surugoon, na posibleng marhay na si Eliezer, sa harayong Mesopotamia tanganing pumili nin nobya para ki Isaac sa mga paryente ni Abraham, mga kapwa nagsasamba ki Jehova. Seryosong marhay iyan kaya pinasumpa si Eliezer na dai sia mapili nin taga Canaan bilang agom na babae para ki Isaac. Mahalagang mangnohon an pag-insistir ni Abraham sa bagay na ini.​—Genesis 24:2-10.

Kan matapos an biahe pasiring sa siudad kan mga paryente ni Abraham, dinara ni Eliezer an  sampulong kamelyo nia sa sarong bubon. Imahinara an eksena! Banggi na, asin si Eliezer namimibi: “Uya ako digdi sa may burabod nin tubig, asin an mga aking babae kan mga lalaki kan siudad nagruruluwas tanganing sumakdo nin tubig. An dapat na mangyari iyo na an hoben na babae na sabihan ko, ‘Ibaba mo, tabi, an saimong dulay tangani na makainom ako,’ asin masabi nanggad, ‘Inom, asin paiinomon ko man an saimong mga kamelyo,’ ini an dapat na itao mo sa saimong lingkod, ki Isaac.”​—Genesis 24:11-14.

Siring kan posibleng marhay na aram nin lambang babae sa lokal, an pahang kamelyo kayang uminom nin dakol (sagkod sa 25 galon) na tubig. Kaya an sarong babae na nag-alok na painomon an sampulong kamelyo kaipuhan na andam para sa magabat na trabaho. An paggibo nia kaiyan mantang may mga meron alagad dai nag-aalok na tumabang siertong patunay kan saiyang enerhiya, pasensia, kapakumbabaan, asin maboot na puso sa tawo asin sa hayop.

Ano an nangyari? “Bago sia matapos sa pagtaram, tara, uya padangadang si Rebeca, na ipinangaki ki Betuel na aki ni Milca na agom na babae ni Nacor, na tugang ni Abraham, asin an saiyang dulay nin tubig nasa saiyang abaga. Asin an hoben na daraga magayonon, sarong birhen, . . . asin huminilig sia sa burabod asin pinonan na panoon an saiyang dulay nin tubig asin pagkatapos suminakat. Tolos-tolos an surugoon duminalagan sa pagsabat sa saiya asin nagsabi: ‘Tawe ako, tabi, nin kadikit na tubig hale sa saimong dulay.’ Sa pagsimbag sia nagsabi: ‘Uminom kamo, kagurangnan ko.’ Sa siring naghihidali niang ibinaba an saiyang dulay sa saiyang kamot asin pinainom sia.”​—Genesis 24:15-18.

Kualipikado daw si Rebeca?

Si Rebeca sobrina sa tuhod ni Abraham, asin apuera sa pagigin magayon, sia birtuoso. Dai sia nag-aalangan na makipag-olay sa sarong estranghero, ni sia sobra kapamilyar. Naggibo sia nin pabor ki Eliezer kan ini makiinom. Normal sana iyan, huling iyan sarong tanda nin pankagabsan na kortesiya. Kumusta man an ikaduwang kabtang kan pagbalo?

 Si Rebeca nagsabi: “Uminom kamo, kagurangnan ko.” Alagad bako sana iyan. Si Rebeca nagsabi pa: “Masakdo man ako nin tubig para sa saimong mga kamelyo sagkod na matapos sinda sa pag-inom.” Nag-alok sia nin labi sa tibaad normal sanang laoman. Listong “ipinalis nia tolos an saiyang dulay sa raraan asin paorootrong duminalagan pasiring sa bobon sa pagsakdo, asin padagos na nagsakdo para sa gabos niang kamelyo.” Mahigoson sia. “Mientras tanto,” sabi kan estorya, “an lalaki pinagmamasdan sia sa pagngalas.”​—Genesis 24:19-21.

Kan maaraman na an daraga paryente ni Abraham, si Eliezer luminaob sa pagpasalamat ki Jehova. Naghapot sia kun baga may matotorogan sia asin an saiyang mga kaiba sa harong kan saiyang ama. Si Rebeca positibong nagsimbag asin nagdalagan papuli dara an bareta manongod sa mga bisita.​—Genesis 24:22-28.

Pakatapos madangog an estorya ni Eliezer, nasabotan kan tugang na lalaki ni Rebeca, si Laban, asin kan saiyang ama, si Betuel, na ginigiyahan nin Dios an mga bagay-bagay. Segurado nanggad na si Rebeca itinagama para ki Isaac. “Darahon mo sia asin lumakaw ka,” an sabi ninda, “asin magin sia agom kan aki kan saimong kagurangnan, siring kan itinaram ni Jehova.” Ano daw an saboot ni Rebeca? Kan hapoton kun sia mahale tolos-tolos, sia nagsimbag sa sarong tataramon sa Hebreo, na nangangahulogan: “Andam akong umiba.” Bako siang obligado na akoon an proposisyon na ini. Ipinaliwanag ni Abraham na palilibrehon nia si Eliezer sa saiyang sumpa “kun an babae dai magustong” humale. Alagad naheling man ni Rebeca an paggiya nin Dios sa bagay-bagay. Kaya daing pag-atraso, binayaan nia an saiyang pamilya tanganing magpakasal sa sarong lalaki na dai pa lamang nia naheling. Pambihirang kapahayagan nin pagtubod an may kosog nin boot na desisyon na iyan. Tunay nanggad na tama an pagkapili sa saiya!​—Genesis 24:29-59.

 Kan makahampang si Isaac, nagbugtak nin suklob si Rebeca bilang patunay kan saiyang pagpasakop. Kinua sia ni Isaac bilang saiyang agom, asin daing duwa-duwa huli sa saiyang marahayon na mga kualidad, namotan nia ini.​—Genesis 24:62-67.

Kambal na Aking Lalaki

Si Rebeca mayong aki sa laog nin mga 19 taon. Sa katapustapusi, nangidam sia nin kambal, alagad masakit an pagbados, huli ta naggugumolan an mga aki sa saiyang tulak, na nagin dahelan na si Rebeca mag-agrangay sa Dios. Puede man niatong gibohon iyan sa panahon nin grabeng kasakitan sa satong buhay. Dinangog ni Jehova si Rebeca asin pinakosog liwat an boot nia. Sia magigin ina nin duwang nasyon, asin “an matua maglilingkod sa nguhod.”​—Genesis 25:20-26.

An mga tataramon na idto puedeng bako sana an solamenteng dahelan kan orog na pagkamoot ni Rebeca sa saiyang nguhod na aki, si Jacob. Magkalaen an mga aking lalaki. Si Jacob “daing katuyawan,” alagad si Esau may aktitud na pagigin daing labot sa espirituwal na mga bagay kaya karibay nin sarong pagkakan, ipinabakal nia ki Jacob an saiyang pagkamatua, an saiyang deretso na manahon an mga panuga nin Dios. An pag-agom ni Esau nin duwang Hitea nagpapaheling nin pagbasangbasang​—kun bakong paglapastangan​—sa espirituwal na mga bagay, na nagbunga nin grabeng kapurisawan sa saiyang mga magurang.​—Genesis 25:27-34; 26:​34, 35.

Pagkua kan Bendisyon Para ki Jacob

Dai sinasabi kan Biblia kun baga aram ni Isaac na paglilingkodan ni Esau si Jacob. Sa paano man, aram ni Rebeca asin Jacob na para saiya an bendisyon. Si Rebeca huminiro tolos-tolos kan madangog na planong bendisyonan ni Isaac si Esau kun darahan nia an saiyang ama nin kakanon na karne nin layas na hayop na nadakop sa pangangayam. Dai pa nawawara an marigon na determinasyon asin kaigotan na nagin karakteristiko nia kan sia hoben pa. ‘Pinagbotan’ nia si Jacob na darahon sa saiya an duwang ogbon na kanding. Maluto sia nin kakanon na paborito kan saiyang agom. Dangan si Jacob masagin na si Esau tanganing makua an bendisyon. Habo ni Jacob. Madidiskobre kan saiyang ama an pakana asin susumpaon sia! Si Rebeca nag-insistir. “Mapasakuya logod an maldisyon na para sa saimo, aki ko,” an sabi nia. Dangan nagluto sia, ibinalatkayo si Jacob, asin pinadolok nia ini sa saiyang agom.​—Genesis 27:1-17.

Dai sinabi kun taano ta naghiro nin siring kaini si Rebeca. Dakol an nagkokondenar sa saiyang ginibo, alagad an Biblia dai, ni si Isaac kan madiskobre nia na si Jacob an nag-ako kan bendisyon. Imbes, dinagdagan pa iyan ni Isaac. (Genesis 27:29; 28:​3, 4) Aram ni Rebeca an ihinula ni Jehova manongod sa saiyang mga aki. Kaya sia naghiro tanganing seguradohon na makua ni Jacob an bendisyon na tama sanang para sa saiya. Malinaw nanggad na kaoyon ini kan kabotan ni Jehova.​—Roma 9:6-13.

Si Jacob Isinubol sa Haran

Inolang ngonyan ni Rebeca an plano ni Esau paagi sa pagsadol ki Jacob na dumulag sagkod na magkalma na an kabangisan kan saiyang tugang. Hinagad nia an pag-oyon ni Isaac sa saiyang plano alagad maboot na linikayan an pagsambit sa grabeng kaanggotan ni Esau. Imbes, mataktika siang nakiolay sa saiyang agom paagi sa pagpahayag kan saiyang kahaditan na tibaad mag-agom nin taga Canaan si Jacob. An ideya mismong iyan igo na tanganing makombensir si Isaac na pagbotan si Jacob na likayan an siring na pag-agom asin isubol sia sa pamilya ni Rebeca tanganing makanompong nin agom na matatakton sa Dios. Mayo nin rekord na naheling pa liwat ni Rebeca si Jacob, alagad an saiyang mga ginibo nagbunga nin mayaman na bendisyon para sa nasyon nin Israel sa ngapit.​—Genesis 27:43–​28:2.

An naaraman niato manongod ki Rebeca nakapupukaw sa satong boot tanganing hangaan sia. Sia magayonon, alagad an saiyang tunay na kagayonan nasa saiyang diosnon na debosyon. Iyan an hinanap ni Abraham sa sarong manugang na babae. An saiyang iba pang marahay na ugale posibleng marhay na linabihan pa ngani an gabos na inasahan ni Abraham. An saiyang pagtubod asin kosog nin boot sa pagsunod sa paggiya nin Dios asin an saiyang kaigotan, kabinian, asin buka an palad na pagkamapag-istimar mga kualidad na maninigong arogon nin gabos na Kristiana. Ini an mga kualidad na hinahanap mismo ni Jehova sa tunay na arogan na babae.