Dai Pagpabayaan an Pagtorotiripon

“Dai niato pagpabayaan an pagtorotiripon, siring kan kinaugalean na nin nagkapira,” an sabi kan Kasuratan, “kundi kita magparinigonan nin boot​​—asin lalo na ta naheheling nindo na an Aldaw nagdadangadang na.” (Hebreo 10:​25, New International Version) Malinaw nanggad, an tunay na mga parasamba kaipuhan na magtiripon sa sarong lugar nin pagsamba tanganing ‘konsideraron an lambang saro tanganing mandagka sa pagkamoot asin sa marahay na mga gibo.’​—Hebreo 10:24.

KAN isurat ni apostol Pablo an mga tataramon na nasambitan sa enotan kan enot na siglo sa Komun na Kapanahonan niato, sarong kahangahangang templo sa Jerusalem an nagseserbing lugar nin pagsamba para sa mga Judio. Igwa man nin mga sinagoga. Si Jesus “nagtotokdo sa sinagoga asin sa templo, na pinagtitiriponan kan gabos na Judio.”​—Juan 18:20.

Anong klaseng mga lugar nin pagtiripon an nasa isip ni Pablo kan sadolon nia an mga Kristiano na magtiripon tanganing magparinigonan nin boot? An relihiosong mga edipisyo daw kan Kakristianohan igwa nin ano man na arogan sa areglo sa templo sa Jerusalem? Kasuarin iinintrodusir sa naghihingakong mga Kristiano an darakulaon na relihiosong estruktura?

‘Sarong Harong sa Ngaran nin Dios’

An enot na mga instruksion manongod sa sarong lugar nin pagsamba sa Dios manonompongan sa libro sa Biblia na Exodo. Pinagbotan ni Jehova Dios an saiyang  piniling banwaan​​—an mga Israelita​​—na magtogdok nin “tabernakulo,” o “tolda nin katiriponan.” An kaban kan tipan asin an manlaenlaen na sagradong kasangkapan ibubugtak dian. “Napano kan kamurawayan ni Jehova an tabernakulo” kan matapos iyan kan 1512 B.C.E. An aroalsang toldang iyan an nagserbing mahalagang kabtang kan areglo nin Dios sa pagdolok sa saiya sa laog nin labing apat na siglo. (Exodo, kapitulo 25-​27; 40:33-​38) Inaapod man kan Biblia an toldang ini na “templo ni Jehova” asin “harong ni Jehova.”​—1 Samuel 1:​9, 24.

Sa huri, kan si David an hade sa Jerusalem, ipinahayag nia an makosog na pagmawot nia na magtogdok nin permanenteng harong para sa kamurawayan ni Jehova. Minsan siring, huling si David sarong parapakilaban, sinabihan sia ni Jehova: “Dai ka matogdok nin harong sa sakuyang ngaran.” Imbes, pinili Nia an aki ni David na si Salomon na iyong magtogdok kan templo. (1 Cronica 22:6-10) Inaguraran ni Salomon an templo kan 1026 B.C.E., pakatapos nin pito may kabangang taon nin pagtogdok. Inoyonan ni Jehova an edipisyong ini, na nagsasabi: “Sinantipikar ko an harong na ini na itinogdok mo paagi sa paglaag kan sakong ngaran dian sagkod sa panahon na daing talaan; asin an sakong mga mata patin an sakong puso pirmeng yaon nanggad dian.” (1 Hade 9:3) Sagkod na nagdadanay na fiel an mga Israelita, an pabor ni Jehova yaon sa harong na iyan. Minsan siring, kun sinda sumuhay sa kun ano an tama, hahaleon ni Jehova an saiyang pabor sa lugar na iyan, asin “an harong na [iyan] magigin tambak nin kagabaan.”​—1 Hade 9:4-9; 2 Cronica 7:​16, 19, 20.

Pag-abot nin panahon, an mga Israelita talagang suminuway sa tunay na pagsamba. (2 Hade 21:1-5) “Kaya dinara [ni Jehova] tumang sa sainda an hade kan mga Caldeo, na . . . sinolo nia an harong kan tunay na Dios asin ginaba an lanob nin Jerusalem; asin an gabos na erokan na torre kaiyan sinolo ninda nin kalayo siring man an gabos na marahayrahay na bagay kaiyan, tangani na manlaglag. Apuera kaini, dinara niang bihag sa Babilonya an nagkatarada sa minasbad, asin sinda nagin mga surugoon nia asin kan saiyang mga aki.” Oyon sa Biblia, nangyari ini kan 607 B.C.E.​​—2 Cronica 36:15-21; Jeremias 52:12-14.

Siring kan ihinula ni propeta Isaias, ibinangon nin Dios si Hadeng Ciro nin Persia tanganing patalingkason an mga Judio sa kapangyarihan nin Babilonya. (Isaias 45:1) Kasunod kan 70 taon nin pagkadistiero, nagbaralik sinda sa Jerusalem kan 537 B.C.E. tanganing itogdok liwat an templo. (Esdras 1:1-6; 2:​1, 2; Jeremias 29:10) Pagkatapos kan mga pagkaatraso sa pagtogdok, sa katapustapusi natapos an templo kan 515 B.C.E., asin an dalisay na pagsamba sa Dios ikinabalik sa dati. Minsan ngani an kamurawayan kaiyan bakong arog kan templo ni Salomon, an estruktura nagdanay nin haros 600 na taon. Minsan siring, an templong ini naraot man huli ta pinabayaan kan mga Israelita an pagsamba ki Jehova. Kan si Jesu-Cristo magtunga sa daga, an templo gradwal na hinihirahay ni Hadeng Herodes. Ano an mangyayari sa templong ini?

‘Daing Matatadang Gapo sa Ibabaw nin Gapo’

Nagtataram manongod sa templo sa Jerusalem, sinabihan ni Jesus an saiyang mga disipulo: “Daing matatada digding gapo sa ibabaw nin gapo na dai magaba.” (Mateo 24:​1, 2) Bilang kaotoban kan mga tataramon na iyan, an lugar na rinekonoser sa laog nin dakol na siglo bilang sentro kan pagsamba sa Dios linaglag kan 70 C.E. kan Romanong mga soldados na uminabot tanganing papondohon an rebelyon kan mga Judio. a An templong iyan nungka nang itinogdok liwat. Kan ikapitong siglo, itinogdok an templo nin Muslim na inaapod  na Tambok kan Gapo, asin nakatindog pa iyan sagkod ngonyan sa namumugtakan kan dating lugar nin pagsamba kan mga Judio.

Ano an magigin areglo nin pagsamba kan mga parasunod ni Jesus? An enot na mga Kristiano daw na may Judiong pinaghalean padagos na masamba sa Dios sa templo na madali nang laglagon? Saen daw masamba sa Dios an mga Kristiano na bakong Judio? An relihiosong mga edipisyo daw kan Kakristianohan an maserbing kasalida kan templo? An pakikipag-olay ni Jesus sa sarong Samaritana nagtatao sa sato nin pakarorop sa bagay na iyan.

Sa laog nin dakol na siglo, an mga Samaritano nagsamba sa Dios sa sarong dakulang templo sa Bukid nin Gerizim sa Samaria. “An samong mga apoon nagsamba sa bukid na ini,” an sabi kan Samaritana ki Jesus, “alagad kamo man nagsasabi na sa Jerusalem maninigong sumamba an mga tawo.” Sa pagsimbag si Jesus nagsabi: “Tuboda ako, babae, Madatong an oras na bakong sa bukid na ini ni sa Jerusalem na sasambahon nindo an Ama.” An sarong materyal na templo dai na kakaipuhanon sa pagsamba ki Jehova, huli ta si Jesus nagpaliwanag: “An Dios Espiritu, asin idtong nagsasamba sa saiya dapat na magsamba sa espiritu asin katotoohan.” (Juan 4:​20, 21, 24) Sinabihan ni apostol Pablo kan huri an mga taga Atenas: “An Dios na naggibo kan kinaban asin kan gabos na yaon dian, mantang, arog kan Sarong ini, Kagurangnan nin langit asin daga, dai nag-eerok sa mga templo na ginibo nin mga kamot.”​—Gibo 17:24.

Malinaw nanggad, an relihiosong mga edipisyo kan Kakristianohan mayong koneksion sa areglo sa templo kaidtong mga Kapanahonan bago kan mga Kristiano. Asin an mga Kristiano kan enot na siglo mayo nin dahelan na magtogdok kan siring na mga lugar. Minsan siring, pagkagadan kan mga apostol, nangyari an ihinulang pagsuway sa tunay na mga katokdoan​​—an apostasiya. (Gibo 20:​29, 30) Dakol na taon bago nakombertir daa sa Kristianismo an Romanong Emperador na si Constantino kan 313 C.E., an naghihingakong mga Kristiano nagpoon na sumuway sa itinokdo ni Jesus.

Si Constantino an nagkaigwa nin kabtang sa pagsalak kan “Kristianismo” asin kan paganong relihion nin Roma. An The Encyclopædia Britannica nagsasabi: “Isinugo mismo ni Constantino an pagtogdok nin tolong darakulaon na Kristianong basilika sa Roma: an [Basilika ni] San Pedro, S. Paolo Fuori le Mura, asin S. Giovanni sa Laterano. Sia an . . . naggibo kan korteng krus na disenyo na nagin modelo para sa mga simbahan sa solnopan na Europa durante kan Edad Media.” An itinogdok liwat na Basilika ni San Pedro sa Roma an kinokonsiderar pa man giraray na sentro kan Iglesia Katolika Romana.

“Inako kan Iglesia an nagkapirang relihiosong kostumbre asin paagi nin pagsamba na komun sa [paganong] Roma kaidtong panahon bago kan mga Kristiano,” an sabi kan historyador na si Will Durant. Kaiba digdi an “arkitektura kan basilika.” Poon kan ika-10 sagkod ika-15 siglo, biglang nagdakol an pagtogdok nin mga simbahan asin katedral, na an arkitektura an tinawan nin dakulang importansia. Idto an panahon na naglataw an dakol sa mga edipisyo kan Kakristianohan na ibinibilang ngonyan na artistikong mga monumento.

Pirme daw na nakanonompong an mga tawo nin espirituwal na karepreskohan asin pagparigon sa boot kun nagsasamba sa simbahan? “Para sako, an simbahan nagin representasyon kan gabos na nakasusuya asin nakapapagal sa relihion,” an sabi ni Francisco na taga Brazil. “An misa daing kahulogan, paorootrong seremonya na dai nakakapanigo sa tunay kong mga pangangaipo. Nakakaginhawa ako kun iyan tapos na.” Minsan siring, an tunay na mga may pagtubod pinagbobotan na magtorotiripon. Anong areglo para sa pagtiripon an maninigo nindang sunodon?

 “An Kongregasyon na Yaon sa Saindang Harong”

Maheheling an arogan para sa paagi nin pagtorotiripon nin mga Kristiano sa pagsiyasat kun paano nagtitiripon an mga nagtuturubod kan enot na siglo. Ipinaririsa kan Kasuratan na sinda parateng nagtotorotiripon sa pribadong mga harong. Halimbawa, si apostol Pablo nagsurat: “Ikumusta nindo ako ki Prisca asin Aquila na mga kapwa trabahador ko dian ki Cristo Jesus, . . . asin tarataraha nindo an kongregasyon na yaon sa saindang harong.” (Roma 16:​3, 5; Colosas 4:15; Filemon 2) An terminong Griego para sa “kongregasyon” (ek·kle·siʹa) trinadusir na “church” (sa Bicol, “simbahan”) sa nagkapirang traduksion sa Ingles, arog kan King James Version. Alagad an termino nanonongod sa sarong grupo nin mga tawo na nagtitiripon para sa sarong katuyohan, bakong sa sarong edipisyo. (Gibo 8:1; 13:1) An pagsamba na isinasagibo kan tunay na mga Kristiano dai nagkakaipo nin maadornong relihiosong mga edipisyo.

Paano ginigibo an mga pagtiripon sa mga kongregasyon kan enot na mga Kristiano? Si disipulo Santiago naggagamit nin sarong porma kan Griegong termino na sy·na·go·geʹ na nanonongod sa sarong Kristianong pagtiripon. (Santiago 2:​2, nota sa ibaba) An Griegong terminong ini nangangahulogan nin “pagtipon” asin ginagamit na kasarosalida kan ek·kle·siʹa. Pero, nag-abot an panahon na an terminong “sinagoga” nagkaigwa nin kahulogan bilang lugar o edipisyo kun saen ginigibo an pagtiripon. Pamilyar an enot na mga Kristianong Judio kun ano an ginigibo sa sarong sinagoga. b

Mantang nagtitiripon an mga Judio sa templo sa Jerusalem para sa taonan na mga kapiestahan ninda, an mga sinagoga nagserbing mga lugar sa lokal tanganing makanood manongod ki Jehova asin makakua nin edukasyon sa Ley. An mga ginigibo sa mga sinagoga minalataw na kompuesto nin pamibi asin pagbasa sa Kasuratan, saka detalyadong pagpaliwanag asin pagsadol. Kan si Pablo asin an iba pang kairiba nia nagduman sa sarong sinagoga sa Antioquia, “an nangengenot na mga opisyal kan sinagoga nagsugo sa sainda na nagsasabi: ‘Mga lalaki, mga tugang, kun igwa kamo nin ano man na tataramon na pamparigon sa boot para sa mga tawo, sabihon nindo.’” (Gibo 13:15) Kun nagtitiripon an enot na mga Kristianong Judio sa pribadong mga harong, daing duda na sinunod ninda an parehong arogan, na ginigibo an mga pagtiripon ninda na nakapagtotokdo sono sa Kasuratan asin nakapakokosog sa espirituwal.

 Mga Kongregasyon Para sa Pagparigon sa Boot

Arog kan enot na mga Kristiano, an Mga Saksi ni Jehova ngonyan nagtotorotiripon sa simpleng mga lugar nin pagsamba tanganing umako nin pagtotokdo sa Biblia asin magkaigwa nin nakapakokosog na pakikiasosyar. Sa laog nin dakol na taon nagtitiripon sinda sa pribadong mga harong sana asin ginigibo pa iyan sa nagkapirang lugar. Alagad ngonyan an kabilangan kan mga kongregasyon labi nang 90,000, asin an pangenot na pinagtitiriponan ninda inaapod na mga Kingdom Hall. An mga edipisyong ini bako man na maarte ni garo simbahan an itsura. Iyan praktikal asin simple sanang mga estruktura na igo an kongregasyon na may 100 sagkod 200 na magtitiripon para sa semanal na mga pagtiripon tanganing magdangog asin makanood sa Tataramon nin Dios.

An kadaklan na kongregasyon kan Mga Saksi ni Jehova nagtitiripon nin tolong beses kada semana. Sa sarong pagtiripon ginigibo an pampublikong pahayag manongod sa sarong tema na pinagkakainteresan sa presente. Sinusundan iyan nin pag-adal basado sa sarong tema o hula sa Biblia, na ginagamit an magasin na Torrengbantayan bilang reperensia. An saro pang pagtiripon sarong paadalan na dinisenyo tanganing magtao nin pagsasanay sa pagpresentar kan mensahe sa Biblia. Sinusundan iyan nin sarong pagtiripon na espesyalmenteng idinudusay sa pagtao nin praktikal na mga suhestion para sa Kristianong ministeryo. Sarong beses kada semana, an mga Saksi nagtitiripon man para sa pag-adal sa Biblia sa saradit na grupo sa pribadong mga harong. An gabos na pagtiripon na ini bukas para sa publiko. Mayong pangongolekta na ginigibo.

Nanompongan ni Francisco, na nasambitan sa enotan, na an mga pagtiripon sa Kingdom Hall kapakipakinabang na marhay. Sia nagsabi: “An enot na lugar nin pagtiripon na dinumanan ko sarong komportableng edipisyo sa sentro, asin naghale ako sa hall na may paborableng impresyon. An mga nag-atender makikatood, asin namate ko an pagkamoot sa tahaw ninda. Gustong-gusto kong bumalik liwat. Sa katunayan, dai ako nagpalta sa pagtiripon poon kaidto. An Kristianong mga pagtiripon na ini interesante, asin napapanigoan kaiyan an sakong espirituwal na pangangaipo. Dawa kun nanluluya an boot ko huli sa nagkapirang dahelan, minaduman ako sa Kingdom Hall, kompiado na mauli akong naparigon an boot.”

An edukasyon sa Biblia, nakapakokosog na pakikiasosyar, asin an oportunidad na omawon an Dios naghahalat man saindo sa Kristianong mga pagtiripon kan Mga Saksi ni Jehova. Mainit niamo kamong iniimbitaran na mag-atender sa Kingdom Hall na pinakaharani sa saindong harong. Maoogma kamo na inako nindo iyan.

[Mga Nota sa Ibaba]

[Mga ritrato sa pahina 4, 5]

An tabernakulo asin sa huri an mga templo nagserbing marahayon na mga sentro nin pagsamba ki Jehova

[Ritrato sa pahina 6]

An Basilika ni San Pedro sa Roma

[Ritrato sa pahina 7]

An enot na mga Kristiano nagtotorotiripon sa pribadong mga harong

 [Mga ritrato sa pahina 8, 9]

Ginigibo kan Mga Saksi ni Jehova an Kristianong mga pagtiripon sa pribadong mga harong asin sa mga Kingdom Hall