Dumiretso sa laog

Dumiretso sa mga laog

 LEKSIYON 23

Sarong Pangako ki Jehova

Sarong Pangako ki Jehova

Mga duwang bulan pagkahali sa Ehipto, nakaabot an mga Israelita sa may Bukid nin Sinai dangan nagkampo duman. Inapod ni Jehova si Moises, na nagtukad sa bukid, asin sinabihan ini: ‘Ilinigtas ko an mga Israelita. Kun masunod sinda sako asin gigibuhon an sakong mga tugon, sinda magigin sakuyang espesyal na banwaan.’ Pagbaba ni Moises, sinabi niya ini sa mga Israelita. Ano an ginibo ninda? Nagsimbag sinda: ‘Gigibuhon mi an gabos na tugon ni Jehova.’

Nagtukad giraray si Moises sa bukid. Duman, si Jehova nagsabi: ‘Tulong aldaw pa, kakaulayon ko kamo. Patanidan mo an mga tawo na dai magsakat sa Bukid nin Sinai.’ Nagbaba si Moises asin sinabi sa mga Israelita na maghanda sa pagdangog ki Jehova.

Kan ikatulong aldaw, nakahiling an mga Israelita nin mga kikilat sa bukid saka maitom na panganuron. Nakadangog man sinda nin makusog na mga daguldol saka tanog nin hamudyong. Dangan buminaba si Jehova sa bukid paagi sa kalayo. Tinarakigan an mga Israelita sa sobrang takot. Nagyugo-yugo nin makusog an bilog na bukid asin natahuban iyan nin aso. Nagparakusog an tanog kan hamudyong. Tapos nagsabi an Diyos: ‘Ako si Jehova. Dai kamo magsamba sa ibang mga diyos.’

Nagtukad giraray si Moises sa bukid. Duman, itinao ni Jehova saiya an mga katugunan kun paano Siya dapat sambahon kan mga Israelita asin kun ano an dapat na magin paggawi ninda. Isinurat ni Moises an mga katugunan asin binasa iyan sa mga Israelita. Nangako sinda: ‘Gigibuhon mi an gabos na tugon ni Jehova.’ Iyo, nangako sinda sa Diyos. Pero gigibuhon daw ninda iyan?

“Kamutan mo si Jehova na saimong Diyos sa bilog mong puso asin sa bilog mong kalag saka sa bilog mong isip.”—Mateo 22:37