Dumiretso sa laog

Dumiretso sa mga laog

 KAPITULO 22

Kun Taano ta Dai Kita Maninigong Magputik

Kun Taano ta Dai Kita Maninigong Magputik

HALIMBAWA sabihon nin sarong aking babae ki nanay nia: “Opo, mapuli tolos ako pagretira.” Alagad ta dai sia nagpuli asin nakikawat sia sa mga katood nia dangan an sabi nia ki nanay nia: “Dai po ako pinapuli kan maestra ko pagretira.” Tama daw na sabihon an arog kaiyan?—

Ano an salang nagibo kan aking lalaking ini?

O halimbawa sabihon nin sarong aking lalaki ki tatay nia: “Dai ko man po sinipa an bola sa harong.” Alagad paano kun talagang sinipa nia iyan? Sala daw na sabihon na dai nia iyan sinipa?—

Itinokdo sa sato kan Dakulang Paratokdo an tamang gibohon. Sabi nia: ‘Pabayaan sana na an saindong tataramon na Iyo mangahulogan nin Iyo, asin an saindong Dai, Dai; huli ta an laen pa digdi gikan sa maraot na saro.’ (Mateo 5:37) Ano daw an boot sabihon dian ni Jesus?— An boot niang sabihon maninigo niatong gibohon an satong sinasabi.

May estorya sa Biblia na nagpapaheling kun gurano kaimportante an pagsabi kan katotoohan. Iyan  manongod sa duwang tawo na nagsabi na sinda mga disipulo ni Jesus. Helingon niato an nangyari.

Mayo pang duwang bulan pagkagadan ni Jesus, dakol na tawo hale sa hararayong lugar an nagduman sa Jerusalem para sa importanteng kapiestahan kan mga Judio na inaapod Pentecostes. Nagtao si apostol Pedro nin pambihirang pahayag na dian sinabi nia sa mga tawo an manongod ki Jesus, na binuhay ni Jehova hale sa mga gadan. Ini an kaenot-enoteng pakadangog kan dakol na nagduman sa Jerusalem manongod ki Jesus. Ngonyan gusto nindang orog pang makaaram. Kaya, ano daw an ginibo ninda?

Nagdanay sinda duman nin mas haloy kisa linalaoman. Alagad paghaloyhaloy, an nagkapira sa sainda naubosan nin kuarta, asin sinda nagkakaipo nin tabang tanganing makabakal sinda nin kakanon. Gusto kan mga disipulo sa Jerusalem na tabangan an mga bisita. Kaya, an dakol sa sainda nagpabakal nin mga rogaring ninda asin itinao an kuarta sa mga apostol ni Jesus. Dangan itinatao kan mga apostol an kuarta sa mga nangangaipo kaiyan.

Si Ananias asin an agom nia, si Safira, na mga miembro kan Kristianong kongregasyon sa Jerusalem, nagpabakal nin daga na sadiri ninda.  Mayo nin nagsabi sa sainda na ipabakal iyan. Desisyon ninda idto. Alagad an ginibo ninda bakong huli ta namomotan ninda an bagong mga disipulo ni Jesus. An totoo, gusto ni Ananias asin Safira na isipon nin mga tawo na mas marahay sinda kisa totoo. Kaya nagdesisyon sindang sabihon na itinatao ninda an gabos na kuarta sa pagtabang sa iba. An talagang itatao ninda kabtang sana kaiyan alagad sasabihon ninda na itinatao ninda an gabos. Ano an masasabi mo dian?—

Bueno, uminatubang si Ananias sa mga apostol. Itinao nia sa sainda an kuarta. Siempre, aram nin Dios na dai nia itinatao an gabos. Kaya ihinayag nin Dios ki apostol Pedro na dai nagsasadiosan si Ananias sa bagay na iyan.

Anong kaputikan an sinasabi ni Ananias ki Pedro?

Dangan sinabi ni Pedro: ‘Ananias, taano ta itinogot mong ipagibo ini sa saimo ni Satanas? Saimo an daga. Dai mo man kaipuhan na ipabakal iyan. Asin dawa kan ikapabakal mo na an daga, nasa saimo an desisyon kun ano an gigibohon mo sa kuarta. Alagad taano ta nagsasaginsagin ka na itinatao mo an gabos na kuarta mantang kabtang sana kaiyan an itinatao mo? Paagi kaini nagpuputik ka, bako sanang sa samo, kundi sa Dios.’

Arog iyan kaiyan kaseryoso. Nagpuputik si Ananias! Dai nia ginigibo an sinasabi niang ginigibo nia. Nagsasaginsagin sana sia. Sinasabi sa sato kan Biblia kun ano an sumunod na nangyari. Sabi kaiyan: ‘Pagkadangog sa mga tataramon ni Pedro, natumba si Ananias asin nagadan.’ Ginadan  nin Dios si Ananias! Pagkatapos, ilinuwas an saiyang bangkay asin ilinobong.

Ano an nangyari ki Ananias huli ta nagputik sia?

Pakalihis nin mga tolong oras, nag-abot si Safira. Dai nia aram an nangyari sa agom nia. Kaya hinapot sia ni Pedro: ‘Ano ipinabakal nindong duwa an daga sa kantidad nin kuarta na itinao nindo sa samo?’

Nagsimbag si Safira: ‘Iyo, ipinabakal mi an daga sa kantidad na iyan.’ Alagad kaputikan iyan! May itinada sinda sa kabakalan kan daga para sa sadiri ninda. Kaya ginadan man nin Dios si Safira.​—Gibo 5:1-11.

Ano an maninigo niatong manodan sa nangyari ki Ananias asin Safira?— Itinotokdo kaiyan sa sato na habo nin Dios sa mga putikon. Gusto nia na pirme kitang magsabi kan katotoohan. Alagad dakol an nagsasabi na puede man na magputik. Sa paghona mo daw tama sinda?— Aram mo daw na an gabos na helang, kolog, asin kagadanan digdi sa daga nangyari huli sa sarong kaputikan?—

Siisay an sinabi ni Jesus na enot na nagputik, asin ano an resulta?

Girumdoma, an Diablo nagputik sa enot na babae, si Eva. Sinabihan sia kan Diablo na dai sia magagadan kun sia makikisuway sa Dios asin makakan kan bunga na sinabi nin Dios na dai nia maninigong kakanon. Naniwala si Eva sa Diablo asin nagkakan sia kan bunga. Kinombensir man nia si Adan na magkakan man. Ngonyan mga parakasala na sinda, asin an gabos nindang aki mamumundag na mga parakasala. Asin huli ta mga parakasala sinda, an gabos na aki ni Adan nagdusa asin nagadan. Ano an pinonan kan gabos na kasakitan na ini?— Sarong kaputikan an pinonan kaiyan.

Kaya palan sinabi ni Jesus na an Diablo “sarong putikon asin iyo an ama kan kaputikan”! Sia an kaenot-enoteng nagputik. Kun an siisay man nagpuputik, ginigibo nia an enot na ginibo kan Diablo. Isip-isipon niato ini kun natetentaran kitang magputik.​—Juan 8:44.

 Noarin ka daw puedeng matentaran na magputik?— Bako daw na kun may nagibo kang sala?— Dawa dai mo tinutuyo, tibaad makapasa ka. Kun hapoton ka manongod dian, maninigo mo daw sabihon na an tugang mo an nakagibo kaiyan? O maninigo ka daw magsaginsagin na dai mo aram kun paano iyan nangyari?—

Noarin ka tibaad matentaran na magputik?

Paano kun dapat na mag-adal ka kan leksion mo alagad kabtang sana an napag-adalan mo? Maninigo daw na sabihon mo na pinag-adalan mo iyan gabos, dawa dai man?— Maninigo niatong girumdomon si Ananias asin Safira. Dai ninda sinabi an bilog na katotoohan. Asin ipinaheling nin Dios kun gurano iyan karaot paagi sa paggadan sa sainda.

Kaya ano man an tibaad gibohon niato, pirmeng magrabe an mga bagay kun kita magpuputik manongod dian, asin dai ngani kita maninigong magsabi nin mga tataramon na bakong gabos totoo. Sinasabi kan Biblia: “Magtaram nin katotoohan.” Sinasabi man kaiyan: “Dai kamo magpapurutikputik.” Si Jehova pirmeng nagtataram kan katotoohan, asin inaasahan nia na iyan man an gigibohon niato.​—Efeso 4:25; Colosas 3:9.

Maninigo na pirme kitang magsabi kan katotoohan. Iyan an puntong idinodoon sa Exodo 20:16; Talinhaga 6:16-19; 12:19; 14:5; 16:6; asin Hebreo 4:13.