Juan 14:1-31

  • Si Jesus, an solamenteng paagi para makadulok sa Ama (1-14)

    • ‘Ako an dalan, an katotoohan, asin an buhay’ (6)

  • Ipinanuga ni Jesus an banal na espiritu (15-31)

    • “An Ama mas urog kisa sako” (28)

14  “Dai nindo pagtugutan na mapurisaw an saindong mga puso. Magtubod kamo sa Diyos; magtubod man kamo sa sako.  Sa harong kan sakuyang Ama igwang dakul na irukan. Kun bako iyan totoo, dai ko na kutana iyan sinabi sa saindo. Alagad ngunyan, maduman ako tanganing mag-andam nin lugar para sa saindo.  Saro pa, pag nagduman ako asin nag-andam nin lugar para sa saindo, mabalik ako asin iiiba ko kamo, tanganing kun hain ako yaon man kamo.  Asin kun sain ako maduman, aram nindo an dalan.”  Sinabi ni Tomas sa saiya: “Kagurangnan, dai mi aram kun sain ka maduman. Paano mi maaaraman an dalan?”  Sinabi ni Jesus sa saiya: “Ako an dalan asin an katotoohan asin an buhay. Mayo nin makakaduman sa Ama kun bakong paagi sa sako.  Kun namidbid nindo ako, namidbid man kutana nindo an sakuyang Ama; puon sa oras na ini midbid na nindo siya asin nahiling na nindo siya.”  Sinabi ni Felipe sa saiya: “Kagurangnan, ipahiling mo sa samo an Ama, asin kontento na kami kaiyan.”  Sinabi ni Jesus sa saiya: “Haluyon na baga nindo akong kaibanan Felipe, dai mo pa nanggad ako midbid? An siisay man na nakahiling na sa sako nakahiling na man sa Ama. Taano ta nagsasabi kang ‘Ipahiling mo sa samo an Ama’? 10  Dai ka nagtutubod na ako kasaro kan Ama asin an Ama kasaro ko? An mga bagay na sinasabi ko sa saindo dai ko itinataram hali sa sadiri kong mga ideya, kundi an mga ini mga gibo kan Ama na nagdadanay na kasaro ko. 11  Magtubod kamo sa sako na ako kasaro kan Ama asin an Ama kasaro ko; kun dai man kamo magtubod kaiyan, magtubod kamo dahil sa mismong mga bagay na ginibo ko. 12  Sinisigurado ko nanggad sa saindo, an siisay man na minatubod sa sako magibo man kan mga ginigibo ko; asin magibo siya nin mga bagay na labi pa kisa sa mga ini, huli ta maduman ako sa Ama. 13  Siring man, ano man na hagadon nindo sa ngaran ko, gigibuhon ko ini, tanganing an Ama mapamuraway paagi sa Aki. 14  Kun may hagadon kamong ano man sa ngaran ko, gigibuhon ko iyan. 15  “Kun namumutan nindo ako, uutubon nindo an sakuyang mga tugon. 16  Asin makikiulay ako sa Ama asin tatawan niya kamo nin saro pang paratabang* na makakaibanan nindo sagkod lamang, 17  an espiritu kan katotoohan, na dai puwedeng makua kan kinaban, huli ta dai iyan nahihiling ni naaaraman kan kinaban. Aram nindo an espiritung iyan, huli ta nagdadanay iyan sa saindo asin yaon sa saindo. 18  Dai ko kamo babayaan na siring sa mga ilo. Madigdi ako sa saindo. 19  Dikit na sanang panahon, dai na ako mahihiling kan kinaban, alagad mahihiling nindo ako, huli ta ako nabubuhay asin kamo mabubuhay. 20  Sa aldaw na iyan maaaraman nindo na ako kasaro kan sakuyang Ama asin kamo kasaro ko asin ako kasaro nindo. 21  An siisay man na minaako kan sakuyang mga tugon asin nag-uutob kaiyan iyo an namumuot sa sako. Siring man, an siisay man na namumuot sa sako mamumutan kan sakuyang Ama, asin mamumutan ko siya saka ihahayag ko an sakong sadiri sa saiya.” 22  Si Judas, bakong su Iscariote, nagsabi sa saiya: “Kagurangnan, ano an dahilan ta sa samuya mo gustong ihayag nin malinaw an sadiri mo asin bakong sa kinaban?” 23  Bilang simbag sinabi ni Jesus sa saiya: “Kun an siisay man namumuot sa sako, uutubon niya an sakuyang tataramon, asin mamumutan siya kan sakuyang Ama, asin maduman kami sa saiya saka mairok kami sa kaibanan niya. 24  An siisay man na dai namumuot sa sako dai nag-uutob kan sakuyang mga tataramon. An tataramon na nadadangog nindo bakong sakuya, kundi sa Ama na nagsugo sa sako. 25  “Sinasabi ko sa saindo an mga bagay na ini miyentras na kaibanan pa nindo ako. 26  Alagad an paratabang, an banal na espiritu, na ipapadara kan Ama paagi sa ngaran ko, itutukdo kaiyan sa saindo an gabos na bagay asin ibabalik sa isip nindo an gabos na bagay na sinabi ko sa saindo. 27  Iwinawalat ko sa saindo an katuninungan; itinatao ko sa saindo an sakuyang katuninungan. Dai ko iyan itinatao sa saindo na arog kan pagtao kaiyan kan kinaban. Dai nindo pagtugutan na mapurisaw an saindong mga puso ni mawaran iyan nin kumpiyansa dahil sa takot. 28  Nadangog nindo na sinabi ko sa saindo, ‘Mahali ako asin mabalik ako sa saindo.’ Kun namumutan nindo ako, mag-uugma kamo na maduman ako sa Ama, huli ta an Ama mas urog kisa sako. 29  Kaya ngunyan sinabi ko na sa saindo bago iyan mangyari, tanganing magtubod kamo pag nangyari na iyan. 30  Dai na ako magtataram pa nin dakul sa saindo, huli ta an tagapamahala kan kinaban madatong na, asin mayo siya nin kontrol sa sako. 31  Alagad tanganing maaraman kan kinaban na namumutan ko an Ama, ginigibo ko kun ano an ipinagbuot kan Ama na gibuhon ko. Magtirindog kamo, maghali na kita digdi.

Mga Nota

O “pararanga.”