1 Corinto 16:1-24

  • Koleksiyon para sa mga Kristiyano sa Jerusalem (1-4)

  • Mga plano ni Pablo sa pagbiyahe (5-9)

  • Planong pagsungko ni Timoteo asin Apolos (10-12)

  • Mga sadol asin pangungumusta (13-24)

16  Ngunyan manungod sa ginigibong koleksiyon para sa mga banal, puwede nindong sunudon an mga instruksiyon na itinao ko sa mga kongregasyon sa Galacia.  Sa inot na aldaw kan kada semana, an lambang saro sa saindo magtagama nin sarong kantidad sigun sa kakayahan niya, na sa siring na paagi dai nin gigibuhon na mga pagkolekta pag-abot ko.  Alagad pag yaon na ako diyan, an mga lalaking rekomendado nindo sa saindong mga surat isusugo ko na darahon sa Jerusalem an saindong donasyon na bukas-palad nindong itinao.  Pero kun sa hiling ko kaipuhan na magduman man ako, iribanan kaming maduman.  Alagad madiyan ako sa saindo pagkatapos kong makapa-Macedonia, huli ta gusto kong mag-agi sa Macedonia;  asin tibaad medyo maghaloy ako diyan sa saindo o magpalihis pa ngani kan tiglipot, asin sa siring maihatod nindo ako sa sakuyang paghali pasiring sa dudumanan ko.  Habo ko kayang halipot na panahon ko sana kamong mahiling ngunyan, dahil naglalaom akong makaibanan kamo nin huruhalawig na panahon, kun itutugot ni Jehova.*  Pero digdi nguna ako sa Efeso sagkod sa Kapiyestahan nin Pentecostes,*  huling sarong dakulang pinto para sa gibuhon an nabuksan sa sako, alagad kadakul nin mga parakontra. 10  Ngunyan kun mag-abot diyan si Timoteo, siguraduhon nindo na dai siya makamati nin takot mantang nasa kaibanan nindo, huli ta kapareho ko siyang nagsasagibo kan gibuhon ni Jehova.* 11  Huli kaiyan, dai siya pagmenuson nin siisay man. Asin maugma nindo siyang ihatod sa paghali niya tanganing makadigdi siya sa sako, dahil pighahalat ko siya kaiba kan mga tugang. 12  Mapadapit man ki Apolos na satuyang tugang, pigparapakiulayan ko siya na magdiyan sa saindo kaiba kan mga tugang. Dai pa niya planong magdiyan ngunyan, pero madiyan siya pag magkaoportunidad siya. 13  Magdanay kamong mata, magin marigon sa saindong pagtubod, magpakalalaki kamo,* magpakakusog kamo. 14  An gabos na ginigibo nindo, gibuhon nindo na may pagkamuot. 15  Ngunyan sinasadol ko kamo, mga tugang: Aram nindo na si Estefanas asin an mga kairiba niya sa harong iyo an mga inot na bunga sa Acaya asin na idinusay ninda an saindang sadiri tanganing maglingkod sa mga banal. 16  Padagos man lugod kamong magpasakop sa mga arog kaiyan na tawo asin sa gabos na nakikipagtabangan saka nagmamaigot sa gibuhon. 17  Ugmahon ako na yaon digdi si Estefanas asin Fortunato saka Acaico na nagtatabang sa sako, maski ngani mayo kamo digdi. 18  Pinaginhawa ninda an sakuyang espiritu asin an sa saindo. Kaya, apresyaron nindo an arog kaiyan na mga tawo. 19  An mga kongregasyon sa Asia nagpapaabot sa saindo kan saindang pangungumusta. Si Aquila asin Prisca pati na an kongregasyon na nagtitiripon sa harong ninda nagpapaabot sa saindo kan saindang mainit na pangungumusta bilang magturugang sa Kagurangnan. 20  An gabos na tugang nagpapakumusta sa saindo. Kumustahon nindo an lambang saro paagi sa makikatuod na hadok.* 21  Ako, si Pablo, nagpapaabot kan sakuyang pangungumusta. Isinurat ko ini kan sadiri kong kamot. 22  Kun an siisay man mayong pagkamuot sa Kagurangnan, sumpaon man lugod siya. O samuyang Kagurangnan, pumadigdi ka! 23  Lugod na mapasaindo an daing kapantay na kabuutan kan Kagurangnan na Jesus. 24  Lugod na an sakuyang pagkamuot mapasaindo gabos na mga kasaro ni Cristo Jesus.

Mga Nota

Hilingon sa Glosaryo.
Hilingon sa Glosaryo.
Hilingon sa Glosaryo.
O “magin pusuan kamo.”
Sa literal, “banal na hadok.”