Sɛ a nanti Biblu’n nun mmla’m be su naan a nin Ɲanmiɛn be afiɛn mantan kpa naan a bu batɛmun yolɛ’n i akunndan’n, i sɔ’n ti su. ?Sanngɛ ngue yɛ ɔ kwla uka ɔ naan w’a wun i wlɛ kɛ be kwla yo wɔ batɛmun-ɔn? a

Ndɛ nga nun’n é wá tɛ́ kosan nga’m be su:

•  ?Ngue yɛ ɔ fata kɛ n si i-ɔ?

•  ?Ngue yɛ ɔ fata kɛ n yo-ɔ?

•  Ndɛ nga ɔ wiengu’m be kan’n

 Sɛ a su siesie ɔ wun naan be wɔ batɛmun’n, ɔ nunman nun kɛ a suan Biblu’n nun ndɛ wie mun lele naan be ka ɔ klun kɛ suklu ba wie m’ɔ su ko pase ɛzamɛn wie sa. Sanngɛ ɔ fata kɛ a ‘fa ngwlɛlɛ nga a si i’n’ bu Biblu’n nun ndɛ’n i su akunndan naan a wun i wlɛ kɛ ɔ ti nanwlɛ. (Rɔmunfuɛ Mun 12:1) I wie yɛle kɛ:

•   ?A lafi su kɛ Ɲanmiɛn o lɛ naan ɔ fata kɛ a su i?

   Biblu’n se kɛ: “Sran ng’ɔ fɛ i wun mantan Ɲanmiɛn’n, ɔ fata kɛ ɔ lafi su kɛ ɔ o lɛ, naan ɔ yo be nga be tu be klun be kunndɛ i’n be ye.”—Ebre Mun 11:6.

   Usa ɔ wun kɛ: ‘?Ngue ti yɛ n lafi Ɲanmiɛn su-ɔ?’ (Ebre Mun 3:4) ‘?Ngue ti yɛ ɔ fata kɛ n su i-ɔ?’—Sa Nglo Yilɛ 4:11.

   Like ng’ɔ kwla uka wɔ’n: Kanngan “Création ou évolution ? (1re partie) : Pourquoi croire en Dieu ?” nun.

•   ?A lafi su kɛ Biblu’n nun ndɛ’n fin Ɲanmiɛn?

   Biblu’n se kɛ: “Ndɛ kwlaa ng’ɔ o Ɲanmiɛn Ndɛ’n nun’n, Ɲanmiɛn yɛ maan be klɛli-ɔ. I kpa m’ɔ ti’n ti’n, be fa kle sran like, be fa kle sran atin, be fa siesie sa mun, be fa tu sran fɔ naan ɔ yo sa kpa.”—2 Timote 3:16.

   Usa ɔ wun kɛ: ‘?Ngue ti yɛ n lafi su kɛ Biblu’n ti kpa tra fluwa nga klɔ sran’m be yi be’n mun-ɔn?’—Ezai 46:10; 1 Tesalonikifuɛ Mun 2:13.

   Like ng’ɔ kwla uka wɔ’n: Kanngan “?Wafa sɛ yɛ Biblu’n kwla uka min-ɔn?—Akpasua 1: Suan Biblu’n i nun like kpa” nun.

•   ?A lafi su kɛ Zoova sin Klisifuɛ’m be asɔnun’n i lika yo naan i klun sa’n kpɛn su?

   Biblu’n se kɛ: ‘Maan asɔnun’n nin Klisi Zezi be dunman nun’n be manman Ɲanmiɛn tititi blɛ kwlaa nun.’—Efɛzifuɛ Mun 3:21.

   Usa ɔ wun kɛ: ‘?N bu i kɛ ninnge nga n suan be aɲia’m be bo’n be fin klɔ sran annzɛ be fin Zoova?’ (Matie 24:45) ‘?Sɛ min si nin min be kwlá tranman aɲia’m be bo naan be man min atin kɛ n wɔ’n n tran be bo?’—Ebre Mun 10:24, 25.

   Like ng’ɔ kwla uka wɔ’n: Kanngan “?Ngue ti yɛ ɔ fata kɛ e yia Ɲanmiɛn Sielɛ Sua’m be nun-ɔn?” nun.

 Ɔ nunman nun kɛ fɔ tu ɔ nun ka naan b’a yo ɔ batɛmun. Sanngɛ ɔ fata kɛ a kle sakpa kɛ w’a ‘yaci sa tɛ’n i yolɛ, naan a yo sa kpa.’ (Jue Mun 34:14) I wie yɛle kɛ:

•   ?A nian Zoova i mmla’m be su nanti?

   Biblu’n se kɛ: “Amun mian amun ɲin titi naan amun akunndan’n w’a buman amun fɔ.”—1 Piɛli 3:16.

   Usa ɔ wun kɛ: ‘?Wafa sɛ yɛ n kle kɛ n “bu sa sin naan n wun sa kpa nin sa tɛ’n be ngbaciɛ”-ɔ?’ (Ebre Mun 5:14) ‘?N kwla wun blɛ trele kun mɔ i nun’n min wiengu’m be miannin min kɛ n yo ninnge tɛtɛ wie mɔ m’an yoman-ɔn? ?Min janvuɛ’m be wla min fanngan kɛ n yo sa kpa?’—Ɲanndra Mun 13:20.

   Like ng’ɔ kwla uka wɔ’n: Kanngan “Comment puis-je éduquer ma conscience ?” nun.

•   ?A wun i wlɛ kɛ á wá kán sa nga a yo be’n be su ndɛ klé Zoova?

   Biblu’n se kɛ: “E tinuntinun é wá kán sa nga e yoli be’n be su ndɛ é klé Ɲanmiɛn.”—Rɔmunfuɛ Mun 14:12.

   Usa ɔ wun kɛ: ‘?N ti nanwlɛfuɛ sa kwlaa nun?’ (Ebre Mun 13:18) ‘?Kɛ n yo sa’n n kpli min ti annzɛ n fia su annzɛ kusu n fa guɛ i sran uflɛ su?’—Ɲanndra Mun 28:13.

   Like ng’ɔ kwla uka wɔ’n: Kanngan “Comment réagir quand je fais une erreur ?” nun.

•   ?A mian ɔ ɲin naan a nin Zoova amun afiɛn w’a mantan titi?

   Biblu’n se kɛ: “An fa amun wun mantan Ɲanmiɛn, yɛ ɔ́ fɛ́ i wun mántan amun.”—Zaki 4:8.

   Usa ɔ wun kɛ: ‘?Ngue yɛ n yo naan min nin Zoova e afiɛn w’a mantan-ɔn?’ I wie yɛle kɛ, ‘?N kanngan Biblu’n nun kpɛ sunman?’ (Jue Mun 1:1, 2) ‘?N srɛ Ɲanmiɛn titi?’ (1 Tesalonikifuɛ Mun 5:17) ‘?Kɛ ń srɛ́ Ɲanmiɛn’n n kan ninnge trele wie’m be ndɛ? ?Min janvuɛ’m be ti Zoova i janvuɛ wie?’—Jue Mun 15:1, 4.

   Like ng’ɔ kwla uka wɔ’n: Kanngan “?Wafa sɛ yɛ Biblu’n kwla uka min-ɔn?—Akpasua 2: Yo maan Biblu’n nun kannganlɛ’n yo ɔ fɛ” nin “?Ngue ti yɛ ɔ fata kɛ n srɛ Ɲanmiɛn-ɔn?” be nun.

 LIKE KUN MƆ A KWLA YO’N: Kwlaa naan b’a yo ɔ batɛmun’n kanngan fluwa Les jeunes s’interrogent-Réponses pratiques, volume 2 i like suanlɛ 37 nun. Fa ɔ ɲin sie i kuku ng’ɔ o i bue 308 nin 309 su’n i su kpa.