Kɔ i nun ndɛ'n su trele

?Sɛ tukpacɛ kekle wie kle wɔ yalɛ’n, Biblu’n kwla uka wɔ?

?Sɛ tukpacɛ kekle wie kle wɔ yalɛ’n, Biblu’n kwla uka wɔ?

Biblu’n tɛ su kɛ

Ɛɛn! Ɲanmiɛn nian i sufuɛ nga tukpacɛ wie kle be yalɛ’n be lika. Biblu’n kan Ɲanmiɛn i sufuɛ nanwlɛfuɛ’n i ndɛ se kɛ: “Blɛ m’ɔ kpinndinman m’ɔ lɛ i bɛ’n su’n, Zoova súɛn i bo.” (Jue Mun 41:3, NWT) Sɛ tukpacɛ kekle wie kle wɔ yalɛ’n, ninnge nsan nga be o yɛ’n be kwla uka wɔ:

  1. Srɛ Ɲanmiɛn naan ɔ man wɔ wunmiɛn. ‘Ɲanmiɛn kwla yo maan ɔ wun jɔ wɔ kpa fɔuun. Aunjuɛ sɔ’n sran fi kwlá simɛn i bo.’ Ɔ maan a su kokoman dan, yɛ ɔ́ súan ɔ bo.​—Filipufuɛ Mun 4:6, 7.

  2. Maan ɔ klun jɔ. Biblu’n se kɛ: “Aklunjuɛ’n ti kɛ ayre sa. Sɛ be klun timan jɔwa’n, be wun kpajaman be.” (Nyanndra Mun 17:22) Maan a nin ɔ wiengu’m be srisri kanngan. Afin i sɔ’n kwla yo naan ɔ wla w’a gua ase, yɛ ɔ kwla uka wɔ naan ɔ wun w’a kpaja wɔ.

  3. Fa ɔ wla gua Ɲanmiɛn su. Kannzɛ tukpacɛ kekle wie kle ɔ yalɛ’n, sanngɛ sɛ ɔ wla o like kun su’n, i sɔ’n kwla uka wɔ. (Rɔmunfuɛ Mun 12:12) Biblu’n se kɛ blɛ wie wá jú’n sran fi su seman kɛ: “N kpinndinman.” (Ezai 33:24) Ɔ maan tukpacɛ nga dɔɔtrɔ’m be siman be ayre’n, Ɲanmiɛn wá yó maan be kwlaa bé wíe. I wie yɛle kɛ Biblu’n se kɛ be nga b’a yo kpɛnngbɛn’n, bé sá be sin bé yó gbanflɛn nin talua ekun. Ɔ se kɛ: “Sran’n i wunnɛn’n bá nun. Ɔ́ sɛ́ i sin ɔ́ yó kpinndinkpinndin kɛ i gbanflɛn nun’n sa.”​—Zɔb 33:25.

Ndɛ cinnjin kun yɛ: Kannzɛ Zoova i Lalofuɛ’m be lafi su kɛ Ɲanmiɛn uka be’n, sanngɛ kɛ tukpacɛ kekle wie kle be yalɛ’n be kunndɛ ayre. (Marki 2:17) Sanngɛ e kleman sran ayre trele ng’ɔ fata kɛ ɔ fa’n. Ayre yolɛ nun’n sran kun bɔbɔ yɛ ɔ fɛ i ajalɛ-ɔ.