Ndɛ nga Biblu’n kan’n

 Ɛɛn. Sɛ sika ndɛ ti kekle ɔ su’n, Biblu’n nun mmla nnan be kwla uka wɔ. Be yɛ be o yɛ:

1.   Bu sika nga á dí’n i akunndan. Biblu’n se kɛ: “Sran ng’ɔ bo i ɲin ase yo like’n, like ng’ɔ sunnzun kɛ ɔ́ yó’n, ɔ́ yó ye, sanngɛ be kwlaa nga be kpli yo like’n, bé dí yalɛ.” (Ɲanndra Mun 21:5) Nán tɔtɔ ninnge’m be su sa to be. Dun mmua bu ninnge nga á tó’n be akunndan sie. Kpɛkun mian ɔ ɲin di ajalɛ nga a fali’n su.

2.   Nán fa kalɛ ngbɛnngbɛn. Biblu’n se kɛ: “Sran ng’ɔ usa bosia’n, ɔ ti sran ng’ɔ man bosia’n i kanga.” (Ɲanndra Mun 22:7) Sɛ kusu a dun mmua fali kalɛ wie naan i tanninlɛ’n w’a mian ɔ sa’n, ko wun sran ng’ɔ boli wɔ bosia’n i wun naan kpɛtɛ i kɛ á yí sika’n i wafa uflɛ. Kpata sran’n i kpa. Fa afɔtuɛ nga Biblu’n mannin bian kun’n su. Ɔ usali bosia kpɛkun i tanninlɛ’n miɛnnin i sa. Biblu’n seli kɛ: “Kan ɔ wun ase naan kpɛtɛ i kpa liɛ su. Nán lafi kaan sa, nán muanmuan ɔ ɲinma bɔbɔ.” (Ɲanndra Mun 6:1-5) Sɛ kpɛ klikli nga a ɔli’n w’a yoman ye’n, kɔ ko wun i wun ekun.

3.   Nán klo sika tratra su. Biblu’n se kɛ: “Aɲinblɔɛfuɛ’n kunndɛ kɛ ɔ́ ɲɛ́n i wun ndɛndɛ, sanngɛ ɔ siman kɛ yalɛ’n yɛ ɔ́ dí i mlɔnmlɔn-ɔn.” (Ɲanndra Mun 28:22) Sɛ sran kun ti aɲinblɔɛfuɛ annzɛ aɲinkplifuɛ’n, i sa nun sika’n kwlaa wíe. Asa’n, ɔ kwla yaci Ɲanmiɛn sulɛ bɔbɔ.

4.   Maan ɔ klun jɔ like nga a le i’n su. Biblu’n se kɛ: “Sɛ e ɲan like e di’n, yɛ sɛ e ɲan tralɛ e wla’n, maan ɔ ju e.” (1 Timote 6:8) Nán sika yɛ ɔ man sran aklunjɔɛ-ɔ. Mɛn nga nun’n be nga be di aklunjɔɛ kpafuɛ’n, be dan lika be leman sika kaka. Sanngɛ kɛ mɔ be osufuɛ nin be janvuɛ mun be klo be’n, mɔ Ɲanmiɛn kusu klo be’n ti’n, be wun jɔ be kpa sa fɔuun.—Ɲanndra Mun 15:17; 1 Piɛli 5:6, 7.