Ndɛ nga Biblu’n kan’n

 Adan nin Ɛvu mɔ be ti klɔ sran klikli’n, be yoli sa tɛ. Be dili “sa kpa nin sa tɛ’n be silɛ waka’n” i su mma nga Ɲanmiɛn seli be kɛ nán maan be di’n. a (Bo Bolɛ 2:16, 17; 3:6; Rɔmunfuɛ Mun 5:19) Sa nga ti yɛ Ɲanmiɛn seli be kɛ nán be di waka sɔ’n i mma’n, yɛle kɛ waka sɔ’n kle kɛ i yɛ ɔ le atin sie be-ɔ. I yɛ ɔ fata kɛ ɔ kle be sa ng’ɔ ti kpa’n nin sa ng’ɔ ti tɛ’n niɔn. Sanngɛ kɛ Adan nin Ɛvu be dili waka sɔ’n i mma’n, i lɛ nun’n be kleli kɛ be kunndɛ kɛ be bɔbɔ yɛ bé klé like ng’ɔ ti kpa’n nin ng’ɔ ti tɛ’n niɔn. Ɔ maan be kunndɛman kɛ Ɲanmiɛn sie be kun.

•  ?Kɛ Adan nin Ɛvu be yoli sa tɛ’n, i bo’n guali sɛ?

•  ?Wafa sɛ yɛ be sa tɛ’n ɲannin ta e su-ɔ?

•  ?E kwla ɲan e ti sa tɛ’n i sa nun?

•  Sa tɛ nga Adan nin Ɛvu be yoli’n i su ndɛ wie m’ɔ timan su’n

 ?Kɛ Adan nin Ɛvu be yoli sa tɛ’n, i bo’n guali sɛ?

 Kɛ mɔ Adan nin Ɛvu be yoli sa tɛ’n ti’n, be yoli kpɛnngbɛn. Kpɛkun i agualiɛ su’n, be wuli. Be nin Ɲanmiɛn be afiɛn sacili, yɛ b’a ɲanman nguan m’ɔ leman awieliɛ’n i kun.—Bo Bolɛ 3:19.

 ?Wafa sɛ yɛ be sa tɛ’n ɲannin ta e su-ɔ?

 Sɛ sran kun le tukpacɛ wie naan ɔ wu ba’n, kpɛ sunman’n tukpacɛ sɔ’n sa ba’n wie. I wafa kunngba’n, kɛ Adan nin Ɛvu be yoli sa tɛ’n, be mma nga be wa wuli be’n be kusu be yoli sa tɛ yofuɛ wie. (Rɔmunfuɛ Mun 5:12) Ɔ maan sran’m be kwlaa, be wu be “sa tɛ’n nun.” b I bo’n yɛle kɛ, kɛ bé wú sran kun’n, ɔ ti sa tɛ yofuɛ yɛ ɔ yo sa tɛ titi.—Jue Mun 51:5; Efɛzifuɛ Mun 2:3.

 Kɛ mɔ e kusu e ti sa tɛ yofuɛ’n ti’n, e kusu e tɔ tukpacɛ, e yo kpɛnngbɛn kpɛkun e wu. (Rɔmunfuɛ Mun 6:23) Asa’n, sa nga e bɔbɔ e yo be’n annzɛ sa nga e wiengu’m be yo be’n be ti’n, e fɛ wie.—Akunndanfuɛ’n 8:9; Zaki 3:2.

 ?E kwla ɲan e ti sa tɛ’n i sa nun?

 Ɛɛn. Biblu’n se kɛ Zezi wuli naan ‘ɔ́ káta e sa tɛ’m be su.’ (1 Zan 4:10, ja ngua lɔ ndɛ’n) Tɛ nga Zezi yili’n kwla de e sa tɛ’n i sa nun. Kpɛkun ɔ kwla uka e naan y’a ɲan nguan m’ɔ leman awieliɛ’n m’ɔ fili Adan nin Ɛvu be sa’n.—Zan 3:16. c

 Sa tɛ nga Adan nin Ɛvu be yoli’n i su ndɛ wie m’ɔ timan su’n

 Sran’m be waan: Sa tɛ nga Adan nin Ɛvu be yoli’n ti’n, e nin Ɲanmiɛn e afiɛn kwlá sɛman kun le.

 Ndɛ ng’ɔ ti nanwlɛ’n: Ɲanmiɛn w’a seman kɛ sa nga Adan nin Ɛvu be yoli’n ti’n, w’a yi e kwlaa e blo. Ɔ si kɛ fɔ o e nun. Ɔ maan ɔ seman e kɛ e yo like nga e kwlá yoman’n. (Jue Mun 103:14) Sa tɛ nga Adan nin Ɛvu be yoli’n ti’n, e fɛ sɔ. Sanngɛ Ɲanmiɛn man e atin kɛ e kaci i janvuɛ.—Ɲanndra Mun 3:32.

 Sran’m be waan: Kɛ be yo sran kun i batɛmun’n, ɔ ka lɛ ɔ ɲɛn i ti sa tɛ’n i sa nun. Ɔ maan ɔ fata kɛ be yo ba nɔnman mun be batɛmun.

 Ndɛ ng’ɔ ti nanwlɛ’n: Ɔ ti su kɛ ɔ fata kɛ be yo e batɛmun naan y’a kwla ɲan e ti. Sanngɛ tɛ nga Zezi yili’n i su lafilɛ’n, yɛ ɔ yo maan be ɲan be ti sa tɛ’n i sa nun sakpa-ɔ. (1 Piɛli 3:21; 1 Zan 1:7) Sɛ sran kun siman Ɲanmiɛn’n, ɔ kwlá lafimɛn i su. Ba nɔnman’m be kwlá suanman Ɲanmiɛn i su like naan se kɛ i silɛ yɛ bé sí i-ɔ. Ɔ maan be kwlá lafiman Ɲanmiɛn su. Kpɛkun Biblu’n w’a seman kɛ be yo ba nɔnman’m be batɛmun. I sɔ liɛ’n i ɲin fite like nga Klisifuɛ klikli’m be yoli’n nun. Klisifuɛ klikli’m b’a yoman ba nɔnman’m be batɛmun. Sanngɛ sran kaklaka mɔ be kleli kɛ be lafi Ɲanmiɛn su’n, be yɛ be yoli be batɛmun-ɔn.—Sa Nga Be Yoli’n 2:41; 8:12.

 Sran’m be waan: Ɲanmiɛn boli bla’m be sannzan, afin Ɛvu yɛ ɔ dun mmua dili waka mma’n niɔn.

 Ndɛ ng’ɔ ti nanwlɛ’n: Ɲanmiɛn w’a boman Ɛvu i sannzan. “Wuo lalaa mɔ be flɛ i Suɛn Tɔnfuɛ nin Satan’n” m’ɔ lakali Ɛvu’n, i yɛ Ɲanmiɛn boli i sannzan-ɔn. (Sa Nglo Yilɛ 12:9; Bo Bolɛ 3:14) I kpa bɔbɔ’n, Ɲanmiɛn w’a seman kɛ bla’n yɛ ɔ yoli sa tɛ’n niɔn. I waan yasua’n yɛ ɔ yoli sa tɛ’n niɔn.—Rɔmunfuɛ Mun 5:12, ja ngua lɔ ndɛ’n.

 ?Sɛ ɔ ti sɔ’n, nn ngue ti yɛ Ɲanmiɛn seli kɛ Adan wá síe i yi Ɛvu-ɔ? (Bo Bolɛ 3:16) Ndɛ sɔ mɔ Ɲanmiɛn kannin’n, ɔ timan sannzan yɛ ɔ boli bla’n niɔn. Sanngɛ ɔ su se kɛ sa tɛ nga be yoli’n ti’n, ɔ nin i wun be tranlɛ’n su yoman pɔpɔ. Sanngɛ like nga Ɲanmiɛn kunndɛ’n, yɛle kɛ yasua’m be nin be yi’m be tran klanman, be klo be yi mun yɛ be bu be sran.—Efɛzifuɛ Mun 5:25; 1 Piɛli 3:7 3:7.

 Sran’m be waan: Sa tɛ nga Adan nin Ɛvu be yoli’n yɛle sua silɛ.

 Ndɛ ng’ɔ ti nanwlɛ’n: Sa tɛ nga Adan nin Ɛvu be yoli’n, ɔ kwlá yoman sua silɛ. Like nga ti yɛ e se sɔ’n yɛ:

•   Kɛ Ɲanmiɛn sé Adan kɛ nán maan ɔ di sa kpa’n nin sa tɛ’n be silɛ waka’n i su mma’n, nn Ɲanmiɛn w’a dun mmua w’a fa bla’n w’a man Adan.—Bo Bolɛ 2:17, 18.

•   Ɲanmiɛn seli Adan nin Ɛvu be kɛ ‘be wu ba kpanngban, yɛ be sɔn kpa.’ (Bo Bolɛ 1:28) I sɔ’n kle kɛ ɔ mannin be atin kɛ be si sua. ?Sɛ Ɲanmiɛn man be atin kɛ be yo like kun naan be yo’n, i kunngba’n kwla tu be fɔ ngalɛ’n ti? Ɔ si’ɛ mlɔnmlɔn.

•   Adan nin Ɛvu b’a yoman sa tɛ’n blɛ kunngba’n nun. Ɛvu dun mmua yoli sa tɛ’n. I sin yɛ Adan kusu yoli wie-ɔ.—Bo Bolɛ 3:6.

•   Biblu’n man yasua kun nin i yi be atin kɛ be si sua.—Ɲanndra Mun 5:18, 19; 1 Korɛntifuɛ Mun 7:3 7:3.