Ndɛ nga Biblu’n kan’n

 Ɛɛn. Sɛ a srɛ Ɲanmiɛn i like kun m’ɔ nin i klun sa’n be kɔ likawlɛ’n, ɔ́ úka wɔ. Kannzɛ a nin-a srɛman Ɲanmiɛn le’n, sanngɛ Biblu’n kan sran wie mɔ be srɛli Ɲanmiɛn kɛ ɔ uka be’n, be ndɛ. Be su ndɛ’n kwla uka wɔ kpa.

•   “Ee Zoova, min Ɲanmiɛn, uka min. De min ɔ sran klolɛ dan’n ti.”—Jue Mun 109:26.

•   “N leman sran ukaman min, yɛ n ti yalɛfuɛ. Ee Ɲanmiɛn, yo min ye ndɛndɛ.”—Jue Mun 70:5.

 Ɲanmiɛn i sufuɛ nga be kannin ndɛ sɔ mun’n, be tuli be klun be suli i kpa. Sanngɛ Ɲanmiɛn tie be kwlaa nga be nzuɛn ti kpa’n, mɔ be kan be wun ase be srɛ i’n be srɛlɛ’n. Ɔ tie be nga “be awlɛn w’a kpɔtɔ be klun’n” nin “be nga be akunndan’n w’a sanngan’n” be srɛlɛ’n.—Jue Mun 34:18.

 Nán bu i kɛ Ɲanmiɛn wo mmua dan naan ɔ ndɛ lomɛn i. Biblu’n se kɛ: “Kannzɛ Zoova ti dan’n, ɔ fɛ i ɲin sie i wun ase kanfuɛ’m be su, sanngɛ be nga be tu be wun’n be liɛ’n, ɔ o mmua lɔ yɛ ɔ nian be-ɔ.” (Jue Mun 138:6) I kpa bɔbɔ’n, cɛn kun’n Zezi seli i sɔnnzɔnfuɛ’m be kɛ: “Amun timuɛn’n bɔbɔ’n, ɔ si i nuan.” (Matie 10:30) I sɔ’n kle kɛ Ɲanmiɛn fɛ i ɲin sie e su kpa, naan ɔ si e kpa tra e bɔbɔ. ?Ɔ maan sɛ a srɛ i kɛ ɔ uka wɔ’n, ɔ su ukaman wɔ?—1 Piɛli 5:7.