Ndɛ nga Biblu’n kan’n

 Ɛɛn. Afin sran ng’ɔ kwla uka wɔ kpa’n yɛle “Nyanmiɛn b’ɔ cici be bɔ be wla bo’n be wla’n.”—2 Korɛntifuɛ Mun 7:6, Biblu Nyanmiɛn Ndɛ’n.

Wafa nga Ɲanmiɛn uka be nga be wla bo be wun’n

•   Ɔ man be wunmiɛn. Ɲanmiɛn su yiman ɔ su afɛ’n kwlaa. Sanngɛ sɛ a srɛ i’n, ɔ́ mán ɔ “wunmiɛn” naan w’a kwla jran sa sɔ’n i ɲrun kekle. (Filipufuɛ Mun 4:13) A kwla lafi su kɛ Ɲanmiɛn tíe ɔ srɛlɛ’n sakpa. Afin Biblu’n waan: “Zoova mantan be nga be awlɛn w’a kpɔtɔ be klun’n, ɔ de be nga be akunndan’n w’a sanngan’n.” (Jue Mun 34:18) Kannzɛ bɔbɔ a wunman wafa nga á kán ɔ su afɛ’n i ndɛ klé Ɲanmiɛn’n, sanngɛ lafi su kɛ ɔ́ tí yɛ ɔ́ úka wɔ.—Rɔmunfuɛ Mun 8:26, 27.

•   Sran kpa wie’m be su ndɛ mun. Biblu’n i klɛfuɛ kun srɛli Ɲanmiɛn seli i kɛ: “Kɛ n wo nyrɛnnɛn dan’n nun’n, n kpan flɛ wɔ.” Ndɛ ng’ɔ kannin’n kle kɛ awlabɔɛ’n w’a kun i kpo. Sanngɛ like ng’ɔ ukɛli i’n, yɛle kɛ i wla kpɛnnin su kɛ Ɲanmiɛn yaci sa cɛ. I sɔ’n ti’n, ɔ seli Ɲanmiɛn kɛ: “?Sɛ ɔ waan á nían tɛ nga e yo’n, wan cɛ yɛ ɔ ka lɛ ɔ yo ye-ɔ? Afin wɔ yɛ a yaci sran i wun sa cɛ i-ɔ, kɛ ɔ́ yó naan be nyin w’a yi wɔ’n ti.”—Jue Mun 130:1, 3, 4, Biblu Nyanmiɛn Ndɛ’n.

•   Ɔ ta be nda. Ɲanmiɛn cici be nga be wla bo be wun’n be wla dɔ nga su. Sanngɛ kusu’n, ɔ ta be nda kɛ cɛn wie lele’n ɔ́ yó maan sa sɔ’n nin sa uflɛ wie’m be kwlaa be wíe. Ɔ maan “be wla su kpɛnman laa ninnge’m be su kun [awlabɔɛ’n wo nun wie], be su tranman be awlɛn’n nun kun.”—Ezai 65:17.

 Ndɛ cinnjin kun: E mɔ e ti Zoova i Lalofuɛ mun’n, e lafi su kɛ Ɲanmiɛn uka sran mun. Sanngɛ sɛ tukpacɛ yo e, ɔ kwla yo kɛ sɛ awlabɔɛ m’ɔ kaci be wun tukpacɛ sa’n ɔ yo e’n, e kɔ dɔɔtrɔ. (Marki 2:17) Sanngɛ e kleman ayre trele ng’ɔ fata kɛ sran ng’ɔ le i sɔ tukpacɛ liɛ’n ɔ yo’n. Afin sran kun bɔbɔ yɛ ɔ fata kɛ ɔ fɛ i sɔ liɛ’n i wun ajalɛ-ɔ.