Wafa nga Ɲanmiɛn yili e ti’n, sɛ e tɔ tukpacɛ’n e kwla yo juejue. Dɔɔtrɔ fluwa kun nun’n be seli kɛ, kɛ like wie kpɛ e’n annzɛ like wie kplo e wun’n, ‘kannzɛ kannin’n ti kaan o annzɛ ɔ ti dan o, e kplo nun ninnge wie’m be yo maan ɔ wu.’ I wie yɛle kɛ, sɛ like wie kpɛ e naan mmoja tu e’n, e kplo nun ninnge sɔ’m be yo maan mmoja’n jran.

BU NDƐ NGA I AKUNNDAN: Wafa nga Ɲanmiɛn yili e’n, ɔ yo ɲɛnmɛn dan. Ɔ maan sɛ e tɔ tukpacɛ annzɛ like wie kpɛ e annzɛ like wie kplo e wun’n, annzɛ kusu like uflɛ yo e’n, e kwla yo juejue. Ɲanmiɛn kunngba’n, ɔ se e kɛ sɛ sa o e su’n, ɔ́ úka e naan e wun fa e feke. E kwla lafi su kɛ ɔ́ yó sɔ sakpa. Jue tofuɛ’n seli kɛ: “Ɔ yo be nga be awlɛn’n w’a kpɔtɔ be klun’n be juejue. Ɔ cici be kannin’m be su.” (Jue Mun 147:3) ?Sanngɛ sɛ afɛ wie o wɔ su’n, á yó sɛ naan w’a wun i wlɛ kɛ Zoova nian ɔ lika andɛ, naan ɔ́ nían ɔ lika ainman-ɔn?

BIBLU’N KLE KƐ ƝANMIƐN KLO SRAN

Ɲanmiɛn se e kɛ: “Nán srɛ kun wɔ, afin e nin wɔ e o nun, nán koko, afin n ti ɔ Ɲanmiɛn. Ń mán ɔ wunmiɛn, yɛ ń úka wɔ.” (Ezai 41:10) Sran ng’ɔ lafi su kɛ Zoova niɛn i lika sakpa’n, i wla gua ase kpɛkun ɔ ɲan wunmiɛn jrɛn i su sa fanunfanun’m be ɲrun kekle. Akoto Pɔlu flɛli i sɔ liɛ’n kɛ “aunjɔɛ nga Ɲanmiɛn man mɔ sran fi kwlá simɛn i bo’n.” Pɔlu seli ekun kɛ: “Sa kwlaa nun’n, sran ng’ɔ man min tinmin’n ti’n, n le wunmiɛn.”—Filipufuɛ Mun 4:4-7, 9, 13.

Ɲanmiɛn Ndɛ’n uka e maan e lafi ninnge nga Zoova waan ɔ́ yó man e’n, be su. I wie yɛle kɛ Sa Nglo Yilɛ 21:4, 5 (I nun ndɛ’n o fluwa’n i bue nga i sin liɛ’n su.) kan like nga Ɲanmiɛn wá yó man e’n, nin like nga ti yɛ ɔ fata kɛ e lafi i su’n, be ndɛ.

• “Ɔ́ núnnún sran’m be ɲinmuɛn’n kwlaa.” Zoova wá núnnún e su afɛ’n kwlaa kpan. Afɛ ng’ɔ o e su mɔ e wiengu’m be bumɛn i like fi bɔbɔ’n, ɔ o nun wie.

• “Sran ng’ɔ ti famiɛn bia’n” su ɲanmiɛn su lɔ’n, yɛle Ɲanmiɛn mɔ kwla like kwlaa yo’n, m’ɔ yili ninnge kwlaa’n. Ɔ ka kan’n, ɔ́ yó maan ɲrɛnnɛn sa’n kwlaa wie. Ɔ maan e su wunman e ɲrun kun.

• Zoova se e kɛ i ‘ndɛ’n ti nanwlɛ yɛ be kwla lafi su.’ Zoova ti Ɲanmiɛn kun m’ɔ buaman ato-ɔ yɛ ndɛ kwlaa ng’ɔ kan’n, ɔ kpɛn su. Ɔ maan e kwla lafi su kɛ ɔ́ yía nda kwlaa ng’ɔ tali e’n be nuan.

“‘Ɔ́ núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun. Laa ninnge’m be nunman lɛ kun.’ Yɛ Sran ng’ɔ ti famiɛn bia’n su’n seli kɛ: ‘Nian! N su yo like kwlaa uflɛ.’ Ɔ seli ekun kɛ: ‘Klɛ ndɛ sɔ mun, afin be ti nanwlɛ, yɛ be kwla lafi su.’”—Sa Nglo Yilɛ 21:4, 5.

Ninnge nga e Si Ɲanmiɛn yili be’n, nin i nuan Ndɛ’n, be kle e sran wafa ng’ɔ ti’n. Ninnge nga Ɲanmiɛn yili be’n, be ijɔman. Sanngɛ sɛ é kwlá sé’n, be se e kɛ e suan be su like naan e si Ɲanmiɛn. I liɛ’n, e nin i trá janvuɛ. Sanngɛ Biblu’n m’ɔ ti Ɲanmiɛn nuan ndɛ’n, i liɛ’n ɔ se e trele kɛ: “An fa amun wun mantan Ɲanmiɛn, yɛ ɔ́ fɛ́ i wun mántan amun.” (Zaki 4:8) Sa Nga Be Yoli’n ndɛ tre 17 i mma 27 kusu se kɛ: “Ɔ nin e nun wie fi nunman mmua.”

Sɛ a fa blɛ suan Ɲanmiɛn i su like naan a si i kpa’n, á láfi su kpa kɛ ‘e ndɛ lo i.’ (1 Piɛli 5:7) ?Sɛ e fa e wla e gua Zoova su’n, i su ye benin yɛ é ɲɛ́n i-ɔ?

Be flɛ bian kun kɛ Toru. Ɔ fin Zapɔn. I manmin m’ɔ ti Klistfuɛ’n yɛ ɔ tɛli i-ɔ. Sanngɛ ɔ wa wluli Zapɔn lɔ anuannzɛ kun nun. Anuannzɛ sɔ’n, i nunfuɛ’m be yo sa kekleekle mun yɛ be kun sran. I bɔbɔ seli kɛ: “N bu i kɛ nn Ɲanmiɛn kpɔ min. Yɛ kɛ min sran kpa’m be wu’n, n bu i kɛ Ɲanmiɛn yɛ ɔ su tu min fɔ-ɔ.” I kwlaa sɔ’n ti’n, i “awlɛn’n keteli yɛ w’a siman sran aunnvɔɛ kun.” Ɔ seli kɛ: “Min gbanflɛn nun’n, n kunndɛli kɛ ń wú. Sanngɛ ka naan m’an wu’n, min waan ń kún sran kun mɔ i dunman w’a fu kpa’n. I liɛ’n min dunman’n fú wie.”

 I sin’n, Toru nin i yi Ana be wa suannin Biblu’n nun like. Ɔ maan ɔ kacili i nzuɛn’n mlɔnmlɔn. I yi’n seli kɛ: “N wunnin i kɛ min wun’n i nzuɛn’n kacili sakpa.” Siɛn’n, Toru se kɛ: “Kannzu, Ɲanmiɛn nian e lika sakpasakpa. Ɔ kunndɛman kɛ sran kun sa wu. Ɔ kunndɛ kɛ ɔ́ yáci be nga be sa tɛ’n yo be nsisɔ mɔ be kaci be nzuɛn’n, be wun sa’n cɛ́ be. E klun ndɛ nga e kwlá kan kleman sran mlɔnmlɔn’n, i liɛ’n e kwla kan kle i. Asa ekun e klun ndɛ nga sran’m be wunmɛn i wlɛ bɔbɔ’n, i liɛ’n ɔ wun i wlɛ. Ɔ ka kaan sa’n, Zoova yó maan afɛ’n nin ɲrɛnnɛn su tranman lɛ kun. Sanngɛ dɔ nga su’n, ɔ yo ninnge nga y’a sunnzunman’n fa uka e. Ɔ klo e yɛ kɛ e wunmiɛn’n wie’n, ɔ man e uflɛ.”—Jue Mun 136:23.

Ɲanmiɛn kwla yi e su afɛ’n. Yɛ ɔ ka kan’n, ɔ́ yó i sɔ bɔbɔ. Kɛ e wun i wlɛ sɔ’n, i sɔ’n yo maan e ɲan like kpa kun mɔ e kwla fa e wla gua su-ɔ. Kpɛkun ɔ kwla yo maan e di aklunjɔɛ dɔ nga su. Toru i su ndɛ’n kle sɔ weiin. Kannzɛ bɔbɔ mɛn nga e o nun yɛ’n ti tɛ’n, sanngɛ Ɲanmiɛn kwla nian e lika.