1-2. ?Ngue ti yɛ ɔ fata kɛ be de e-ɔ? (Rɔmunfuɛ Mun 7:22-24) (An nian desɛn’n wie.)

 WIENUN-ƆN, sua kun w’a bubu w’a gua sran kun su. I ɲin te o su, sanngɛ ɔ kwlá fiteman. Saan kpanlɛ cɛ yɛ ɔ kwla kpan naan sɛ sran’m be ti i ngan’n b’a kwla de i-ɔ.

² Sa kɛ ngalɛ’n sa’n, i wie o e kwlaa e su. Yɛle kɛ, kɛ Adan yoli ɲin kekle Zoova su’n, ɔ kacili sa tɛ yofuɛ. I sin’n ɔ fali sa tɛ yolɛ’n sɛli i mma mun. Sa tɛ yolɛ’n kacili kɛ aja like sa, yɛ sran fi kwlá yoman naan w’a fite nun. Wafa nga sa tɛ yolɛ’n ti’n e wun e ɲrun’n, akoto Pɔlu kɛnnin i ndɛ Rɔmunfuɛ Mun fluwa’n nun. (An kanngan Rɔmunfuɛ Mun 7:22-24 nun.) Yɛ ɔ usali kɛ: “?Wan yɛ ɔ́ dé min min wunnɛn mɔ i ti’n ń wú’n i sa nun-ɔn?” Pɔlu wunnin kɛ ɔ ti sa tɛ yofuɛ naan ɔ lemɛn i yowlɛ, saan wulɛ yɛ ɔ́ wú-ɔ. (Rɔm. 6:23) Sa kunngba sɔ’n o e kwlaa e su, yɛ ɔ fata kɛ be de e.

3. ?E ti kpɔlɛ tɛ’n i su ye benin yɛ e ɲɛn i-ɔ?

³ Wafa nga Pɔlu guɛli i ndɛ’n i bo’n, ɔ gua e awlɛn su nzue dan. Yɛle kɛ, kɛ ɔ usali kɛ ‘wan yɛ ɔ́ dé i i wunnɛn mɔ i ti’n ɔ́ wú’n i sa nun’n,’ i bɔbɔ tɛli su kɛ: “Ń lá Ɲanmiɛn ase e Min Zezi Klisi dunman nun!” (Rɔm. 7:25) E ti kpɔlɛ a tɛ mɔ Zezi fɛli i wun yili’n i ndɛ yɛ Pɔlu kan-ɔn. E ti kpɔlɛ tɛ sɔ’n ti’n, (1) Ɲanmiɛn kwla yaci e sa tɛ mun cɛ e, (2) e kwla lafi su kɛ cɛn wie lele’n e su yoman sa tɛ yofuɛ kun, yɛ (3) e nin Ɲanmiɛn e kwla siesie e afiɛn. Like suanlɛ nga nun’n, é wá fá e ɲin síe i ndɛ cinnjin nsan sɔ’m be su. I sɔ’n úka e naan  y’a klo Zoova “mɔ maan e lafi su kɛ é ɲán like’n” i kpa y’a tra laa’n. (Rɔm. 15:13) Asa’n i sɔ’n úka e naan y’a kle Zezi kɛ e si ye, afin ɔ fɛli i wun yili e ti tɛ naan e “ɲan e ti.”—Kol. 1:14.

E TI KPƆLƐ TƐ’N TI’N, ƝANMIƐN KWLA YACI E SA TƐ MUN CƐ E

4-5. ?Ngue ti yɛ e ti kpɔlɛ tɛ’n ti cinnjin man e kwlakwla-ɔ? (Akunndanfuɛ’n 7:20)

⁴ Kɛ ɔ ko yo naan Ɲanmiɛn w’a yaci e sa tɛ mun w’a cɛ e’n, ɔ fata kɛ be yi e ti tɛ. Klɔ sran’m be kwlaa be yo sa tɛ. Ɔ kwla yo be ijɔlɛ’n nun annzɛ be ayeliɛ’n nun. (An kanngan Akunndanfuɛ’n 7:20 nun.) Sa tɛ wie’m be ti tɛ dan. I wie yɛle be yi bo bla kunndɛlɛ’n annzɛ be wun bo bian kunndɛlɛ’n, ɔ nin sran kunlɛ’n. Moizi Mmla’n nun’n, sran ng’ɔ yo i sɔ sa’n ɔ fata kɛ be kun i. (San. 20:10; Kal. 35:30, 31) Sanngɛ sa tɛ wie’m be o lɛ’n, be timan tɛ dan sɔ liɛ. Kannzɛ ɔ ti sɔ’n, sanngɛ sa tɛ kwlaa ti tɛ. I wie yɛle kɛ Davidi seli kɛ: “Ń nían min wun su, naan m’an faman min taaman’n m’an yoman sa tɛ.” (Jue. 39:1) I sɔ’n kle kɛ wie liɛ’n, ndɛ ng’ɔ fin e nuan fite bɔbɔ’n ɔ ti sa tɛ.—Zak. 3:2.

⁵ E kwlaa e yoli sa wie m’ɔ yo e nsisɔ-ɔ. Annzɛ kusu e kannin ndɛ wie m’ɔ yo e nsisɔ-ɔ. Biblu’n se kɛ: “Sɛ e se kɛ: ‘Sa tɛ kaan sa nunman e wun’n,’ nn e su laka e bɔbɔ e wun, yɛ nn e timan nanwlɛfuɛ.”—1 Zan 1:8.

6-7. ?Ngue su yɛ Ɲanmiɛn kwla jran naan w’a yaci e sa tɛ mun w’a cɛ e-ɔ? (An nian desɛn’n wie.)

⁶ Zoova kwla jran e ti kpɔlɛ tɛ’n su naan w’a yaci e sa tɛ mun w’a cɛ e. (Efɛ. 1:7) Sanngɛ nán kɛ sa tɛ nga e yo be’n, be yoman Zoova i like fi ti-ɔ. Zoova kloman kɛ e yo sa tɛ. (Eza. 59:2) Ɔ maan kɛ m’ɔ yo sa i nuan su sɛsɛ’n ti’n, ɔ fata kɛ ɔ jran like kun su naan w’a kwla yaci e sa tɛ mun w’a cɛ e.

⁷ Moizi Mmla’n nun’n, ɔ fata kɛ Izraɛlifuɛ nga be yo sa tɛ’n, be yi tɛ be fa kpata be sa tɛ’n i ti. (San. 4:27-31; 17:11) Tɛ sɔ mɔ Izraɛlifuɛ’m be yili be’n, be fa klɔ sran’m be ɲin sie i tɛ kun mɔ bé wá ɲán su ye dan’n i su. Tɛ sɔ’n yɛle nga Zezi fɛli i wun yili’n. Zoova kwla jran tɛ sɔ’n su naan w’a yaci e sa tɛ mun w’a cɛ e. Pɔlu wunnin e ti tɛ mɔ Zezi fɛli i wun yili’n, i su ye nga klɔ sran’m be kwla ɲɛn i’n i wlɛ.  Kɛ ɔ́ klɛ́ fluwa kó mán Korɛntifuɛ mun’n, ɔ kɛnnin i sɔ liɛ’n i ndɛ. Ɔ boli sa tɛtɛ nga be yoli be laa’n be su. Kpɛkun i sin’n, ɔ seli be kɛ: “B’a wunnzin amun yɛiin, amun a kaci Ɲanmiɛn liɛ, yɛ be bu amun sran kpa e Min Zezi Klisi nin Ɲanmiɛn wawɛ’n be dunman nun.”—1 Kor. 6:9-11.

8. .?Kɛ é síesíe e wun naan y’a tran e wla kpɛnlɛ aɲia’n i bo’n, ngue yɛ e kwla bu su akunndan-ɔn?

⁸ Kɛ á síesíe ɔ wun naan w’a tran e Wla kpɛnlɛ aɲia’n i bo afuɛ nga’n, fa blɛ bu ɔ sa tɛ mɔ Zoova yaci cɛli wɔ’n i su ye nga a ɲɛn i’n i su akunndan. I wie yɛle kɛ e ti kpɔlɛ tɛ’n ti’n, ɔ akunndan’n buman ɔ fɔ sa trilili kun, sa tɛ nga a yoli be laa mɔ a wlali be ase’n be ti. Sanngɛ atrɛkpa’n kɛ ɔ yo naan a lafi su kɛ Zoova yacili ɔ sa tɛ mun cɛli wɔ sakpa’n, ɔ ti kekle man wɔ. Atrɛkpa’n a se ɔ wun kɛ: ‘N si kɛ Zoova kwla yaci sa cɛ. Sanngɛ min akunndan’n yaciman min fɔ bulɛ.’ Sɛ ɔ ti sɔ’n, maan ɔ wla kpɛn ndɛ nga su. Yɛle kɛ Zoova yɛ ɔ yaci e sa tɛ mun cɛ e-ɔ, yɛ ɔ sieli i Wa’n kɛ ɔ di e jɔlɛ. Zoova w’a manman ɔ bɔbɔ annzɛ sran uflɛ i atin kɛ ɔ kle sran ng’ɔ́ yáci i sa tɛ liɛ mun cɛ́ i’n, annzɛ sran ng’ɔ su yacimɛn i liɛ mun cɛmɛn i’n. Biblu’n se kɛ: “Sɛ e nanti lika m’ɔ kpaja’n nun kɛ nga [Zoova] bɔbɔ ɔ o lika m’ɔ kpaja’n nun sa’n, [. . . ] Zezi i mmoja’n w’a nunnun e sa tɛ’n kwlaa.” (1 Zan 1:6, 7) Ɔ fata kɛ e lafi ndɛ sɔ’n su, kɛ nga e fa lafi Biblu’n nun ndɛ onga’m be su’n sa. E ti kpɔlɛ’n tɛ’n su yɛ Zoova jran naan w’a kwla yaci e sa tɛ mun w’a cɛ e-ɔ. Yɛ Biblu’n se kɛ Zoova ‘klo kpa kɛ ɔ́ yáci sa cɛ́.’—Jue. 86:5.

E TI KPƆLƐ TƐ’N TI’N CƐN WIE LELE’N E SU YOMAN SA TƐ YOFUƐ KUN

9. ?Ngue yɛle “sa tɛ’n” mɔ Biblu’n kɛn i ndɛ’n? (Jue Mun 51:5)

⁹ Biblu’n nun’n kɛ be kan “sa tɛ’n” i ndɛ’n, nán sa nga e yo m’ɔ timan kpa’n i ngunmin i ndɛ yɛ be kan-ɔn. Fɔ mɔ kɛ bé wú e’n ɔ o e nun’n, ɔ o nun wie. (An kanngan Jue Mun 51:5 nun.) Fɔ sɔ m’ɔ o e nun’n ti’n, ɔ ju wie’n e yo sa tɛ. Asa’n e tɔ tukpacɛ, e yo oke, yɛ e wu. Fɔ sɔ’n ti yɛ ba nɔnman mun bɔbɔ mɔ b’a yoman sa tɛ fi’n, be tɔ tukpacɛ annzɛ be wu-ɔ. Asa’n  fɔ sɔ’n ti yɛ i sran kpa-o i sran tɛ-o, be kwlaa be wun ɲrɛnnɛn kpɛkun be wu-ɔ. Sa tɛ nga Adan yoli’n ti’n, e kwlaa e ti sa tɛ yofuɛ.

10. ?Kɛ Adan nin Ɛvu be yoli sa tɛ’n, wafa sɛ yɛ be wun yoli be-ɔ?

¹⁰ ?Kɛ Adan nin Ɛvu be yoli sa tɛ’n, wafa nga be wun yoli be’n amun bu i akunndan kan be nian. B’a wunman be wun fɛ mlɔnmlɔn. Kɛ be fɔnnin Ɲanmiɛn mmla m’ɔ ti ‘klɛwa be awlɛn’n nun’n,’ be ja nun lɛ’n be wunnin i sin afɛ’n. (Rɔm. 2:15) Be kali lɛ wunnin i wlɛ kɛ be timan kɛ laa’n sa kun. Be wunnin kɛ ɔ fata kɛ be kata be wun, yɛ be ko fiali Ɲanmiɛn ɲrun. (Bob. 3:7, 8) Adan nin Ɛvu be akunndan buli be fɔ, be kokoli, be klun titili be, b’a wunman be wun fɛ, yɛ ɲannzuɛn kunnin be. Kpɛ klikli nga be wun yó be sɔ’n, yɛ ɔ o lɛ-ɔ. Kɛ ɔ fɛ i lɛ’n, be wun yoli be kɛ ngalɛ’n sa lele be fa wuli.—Bob. 3:16-19.

11. ?Kɛ mɔ e ti sa tɛ yofuɛ’n ti’n, ɔ ju wie’n wafa sɛ yɛ e wun yo e-ɔ?

¹¹ Kɛ mɔ e kwlaa e ti sa tɛ yofuɛ’n ti’n, ɔ ju wie’n e akunndan’n bu e fɔ, ɲannzuɛn kun e, yɛ e koko. Fɔ m’ɔ o e nun’n ti’n ɔ ju wie’n e wla bo e wun annzɛ kusu e wunnɛn’n yo e ya. Kannzɛ é yó sɛ yó sɛ’n, e su kwlá yoman naan sa sɔ’m b’a tɔman e su. Afin Biblu’n se kɛ, kɛ ɔ fin cɛn mɔ Adan nin Ɛvu be yoli sa tɛ’n, klɔ sran’m be wun be ɲrun sa tititi. (Rɔm. 8:20) Kɛ e bu sa nga be o e tinuntinun e su’n, ɔ nin sa nga be o klɔ sran’m be kwlaa be su’n be akunndan’n, e wun kɛ ndɛ sɔ’n ti nanwlɛ. Amun bɔbɔ amun nian! Klɔ sran’m be yoli like kwlaa nga be kwla yo naan lika’m be nun w’a yo yɛiin. Wie’m be yo naan sa tɛtɛ’m be wie. Wie mun ekun be yo naan sran’m b’a diman yalɛ kun. Yɛ wie’m be yo naan fɔundi w’a tran nvle’m be nun. Sanngɛ i kwlaa sɔ’n kpi ase. E ti kpɔlɛ tɛ’n ti’n, e lafi su kɛ sa kwlaa sɔ’m bé wíe. ?Wafa sɛ?

12. ?E ti kpɔlɛ tɛ’n ti’n, ngue yɛ e lafi su-ɔ?

¹² E ti kpɔlɛ tɛ’n ti’n, e lafi su kɛ “ninnge nga Ɲanmiɛn yili be’n, be su yoman be wunnɛn m’ɔ saci’n i kanga kun.” (Rɔm. 8:21) Kɛ é wá ɲán e ti kpɔlɛ tɛ’n i su ye kpa Ɲanmiɛn i mɛn uflɛ’n nun lɔ’n, e wunnɛn su yoman e ya kun, e su kokoman kun, e wla su boman e wun kun, e akunndan su buman e fɔ kun, e klun su titiman e kun, yɛ ɲannzuɛn su kunman e kun. Asa’n like kwlaa nga é wá yo naan asiɛ’n w’a kaci lika klanman’n, naan kusu sran’m b’a di fɔundi’n ɔ su yoman ngbɛn. Blɛ sɔ nun’n Zezi Klisi m’ɔ ti “Fɔundi Wlengbi” m’ɔ fɛli i wun yili e ti tɛ’n, ɔ́ wá síe sran mun. Yɛ ɔ́ úka be naan be su sa’m be kwlaa be wie.—Eza. 9:6, 7.

13. ?Kɛ é síesíe e wun naan y’a yo e Wla kpɛnlɛ aɲia’n afuɛ nga’n, ngue ekun yɛ e kwla bu su akunndan-ɔn?

¹³ Kɛ fɔ’n su tranman e nun kun’n, wafa nga e mɛn dilɛ’n wá yó’n, amun bu i akunndan kan be nian. Nglɛmun kwlaa’n kɛ é jáso’n, e wun kpája e, e su kokoman aliɛ ti, annzɛ tukpacɛ ti, annzɛ wie ndɛ ti. Dɔ nga su bɔbɔ’n, maan e bu ‘like nga e wla o su’n’ i su akunndan kpa. “Like sɔ mɔ e wla o su’n, ɔ tra e ase kɛ like ng’ɔ tra mmeli’n i ase’n sa naan e ɲan nguan. Ɔ yo maan e jran kekle kpa, yɛ e akunndan’n yoman nɲɔnnɲɔn.” (Ebr. 6:18, 19) Sɛ e bu like nga e wla o su kɛ é ɲɛ́n i’n i su akunndan titi’n, i sɔ’n úka e naan y’a lafi Ɲanmiɛn su kpa, naan kusu y’a jran sa kwlaa nga be tɔ e su dɔ nga su’n be ɲrun kekle. Nanwlɛ, e kwla lafi su kɛ Zoova ‘yó be nga be tu be klun be kunndɛ i’n be ye’ sakpa. (Ebr. 11:6) E ti kpɔlɛ tɛ’n ti yɛ dɔ nga su bɔbɔ’n  e wla gua ase-ɔ. Yɛ tɛ sɔ’n ti yɛ e kwla lafi su kɛ é ɲán like kpa e ɲrun lɔ-ɔ.

E TI KPƆLƐ TƐ’N TI’N E NIN ƝANMIƐN E AFIƐN KWLA SƐ EKUN

14. (1) ?Kɛ Adan nin Ɛvu be yoli sa tɛ’n, e nin Ɲanmiɛn e afiɛn yoli sɛ? (2) ?Yɛ ngue ti-ɔ?

¹⁴ Kɛ Adan nin Ɛvu be yoli sa tɛ’n, klɔ sran’m be nin Ɲanmiɛn be afiɛn sacili. I kpa bɔbɔ’n, Biblu’n se kɛ klɔ sran’m be kwlaa be nin Ɲanmiɛn be afiɛn tili nun dan. (Rɔm. 8:7, 8; Kol. 1:21) Afin Zoova ti sanwun dan, fɔ nunmɛn i nun. Ɔ maan i ɲin kwlá kpaman sa tɛ’n su. Biblu’n kan Zoova i ndɛ se kɛ: “Ɔ ɲinma’m be ti sanwun dan, ɔ maan be kwlá nianman sa ng’ɔ ti tɛ’n, yɛ a kwlá tranman lɛ nianman klunwi ayeliɛ’n.” (Aba. 1:13) Kɛ klɔ sran’m be kacili sa tɛ yofuɛ’n, ɔ ti kɛ kunman dan kun trannin Ɲanmiɛn nin be be afiɛn sa. Yɛ e nun wie fi e kwlá yoman naan ɔ nin Ɲanmiɛn be afiɛn w’a mantan. Sɛ é kwlá sé’n, ɔ fata kɛ be fa waka kun jɛ i kunman sɔ’n su naan y’a sin su naan y’a kwla fa e wun y’a mantan Ɲanmiɛn. E ti kpɔlɛ tɛ’n ti kɛ waka sɔ’n sa. Ɔ yo maan e nin Ɲanmiɛn e afiɛn kwla mantan ekun.

15. ?Wafa sɛ yɛ Zezi i wie’n kwla yo maan klɔ sran mun nin Ɲanmiɛn be afiɛn kwla sɛ ekun-ɔn?

¹⁵ Biblu’n se kɛ Zezi “fɛ i wun yili tɛ naan e nin Ɲanmiɛn e afiɛn sɛ ekun.” (1 Zan 2:2) ?Wafa sɛ yɛ Zezi i wie’n kwla yo maan klɔ sran mun nin Ɲanmiɛn be afiɛn kwla sɛ ekun-ɔn? E Ɲanmiɛn m’ɔ ti sanwun’n, ɔ kwla jran Zezi i wie’n su naan ɔ nin klɔ sran’m b’a siesie be afiɛn. (Rɔm. 3:23-26) I kpa bɔbɔ’n ɔ buli be nga be suli i laa kwlaa naan Zezi w’a wu’n be sran kpa. (Bob. 15:1, 6) ?Ngue ti yɛ ɔ kwla yoli sɔ-ɔ? E ti kpɔlɛ tɛ’n ti-ɔ. Zoova si kɛ i Wa Zezi wá fɛ́ i wun yí klɔ sran’m be ti tɛ. (Eza. 46:10) E ti kpɔlɛ tɛ’n ti’n, klɔ sran’m be nin Ɲanmiɛn be afiɛn kwla sɛ ekun.

16. ?Kɛ é síesíe e wun naan y’a yo e Wla kpɛnlɛ aɲia’n afuɛ nga’n, ngue ekun yɛ e kwla bu su akunndan-ɔn? (An nian desɛn’n wie.)

¹⁶ A nin Zoova amun afiɛn m’ɔ sɛ’n, i su ye nga a ɲɛn i dɔ nga su’n, bu i akunndan kan nian. I wie yɛle kɛ a kwla flɛ i kɛ min “Si.” I sɔ kusu yɛ Zezi seli kɛ e flɛ i-ɔ. (Mat. 6:9) Ɔ ju wie kusu’n a kwla flɛ i kɛ min “Janvuɛ.” Sanngɛ kɛ é flɛ́ i kɛ min “Si” annzɛ min “Janvuɛ’n,” maan e yo sɔ  aɲinyiɛ su, yɛ maan e yo wun ase kanfuɛ. Afin e ti sa tɛ yofuɛ. Ɔ maan e bɔbɔ e tiaun e kwlá yoman naan e nin Ɲanmiɛn e afiɛn w’a mantan. E ti kpɔlɛ tɛ’n i ngunmin ti yɛ e kwla fa e wun mantan Zoova-ɔ. Biblu’n se kɛ Zoova sinnin Zezi i lika ‘siesieli i bɔbɔ nin ninnge onga nga be o ɲanmiɛn su lɔ’n nin nga be o asiɛ’n su wa’n be kwlaa be afiɛn. I mmoja’n m’ɔ guɛli i ase ɲrɛnnɛn waka’n su’n ti yɛ be afiɛn kwla sɛli-ɔ.” (Kol. 1:19, 20) I sɔ’n ti yɛ kannzɛ e ti sa tɛ yofuɛ’n, sanngɛ kɛ é sé yɛ bɔbɔ’n, e nin Zoova e afiɛn kwla mantan-ɔn.

E TI KPƆLƐ TƐ’N KLE KƐ ZOOVA SI AUNNVƆƐ DAN

17. ?Wafa sɛ yɛ e ti kpɔlɛ tɛ’n kle weiin kɛ Zoova si ‘aunnvɔɛ dan-ɔn’? (Efɛzifuɛ Mun 2:4, 5)

¹⁷ E ti kpɔlɛ tɛ’n kle weiin kɛ Zoova si ‘aunnvɔɛ dan.’ Ɔ ‘yoli maan kannzɛ e sa tɛ’m be ti’n e wuli’n, sanngɛ y’a ɲan nguan.’ (An kanngan Efɛzifuɛ Mun 2:4, 5 nun.) Be “nga be nin nguan m’ɔ leman awieliɛ’n fata’n,” be ti kɛ sran mɔ sua w’a bubu w’a guɛ i su’n sa. Be wun i wlɛ kɛ be bɔbɔ be kwlá yoman naan b’a fite nun. Ɔ maan be kpan flɛ Ɲanmiɛn naan ɔ de be. (Yol. 13:48) Zoova kusu tɛ be su. Yɛle kɛ ɔ yo maan be tie Ɲanmiɛn Sielɛ’n i jasin fɛ’n naan b’a kwla si i bɔbɔ nin i Wa Zezi. (Zan 17:3) Sɛ Satan buli i kɛ sa tɛ mɔ Adan nin Ɛvu be yoli’n ti’n, Ɲanmiɛn i klun sa’n kpí ase’n, nn ɔ lɛkɛli i wun.

18. ?Kɛ é bú e ti kpɔlɛ tɛ’n i su ye nga e ɲɛn i’n i su akunndan’n, ngue yɛ ɔ fataman kɛ e ɲin kpa su-ɔ?

¹⁸ Kɛ é bú e ti kpɔlɛ tɛ’n i su ye nga e ɲɛn i’n i su akunndan’n, nán maan e ɲin kpa sa nga ti yɛ Zoova yili tɛ sɔ’n i su kaan sa. Nán e delɛ ngunmin ti yɛ ɔ yili tɛ sɔ’n niɔn. Sanngɛ sa kun m’ɔ ti cinnjin kpa tra e delɛ’n i wie ti-ɔ. Yɛle kɛ e ti kpɔlɛ tɛ’n ti’n, ɔ kwla tɛ Satan m’ɔ tɔnnin i suɛn Edɛnin fie’n nun lɔ’n su. (Bob. 3:1-5, 15) E ti kpɔlɛ tɛ’n ti’n, Zoova kleli kɛ i su ndɛ nga Satan kannin’n ɔ ti ato. Asa’n ɔ kleli kɛ ɔ ti Ɲanmiɛn kun m’ɔ klo sran-ɔn, afin ɔ de e sa tɛ’n nin wie’n be sa nun. Asa ekun’n Zoova i klun ufue dan’n ti’n, ɔ man e mɔ e ti sa tɛ yofuɛ’n e atin naan e kle kɛ i su ndɛ nga Satan kannin’n ti ato. (Ɲan. 27:11) ?Yɛ wafa sɛ yɛ e kwla kle Ɲanmiɛn m’ɔ fɛli i Wa’n yili’n e ti tɛ’n kɛ e si ye-ɔ? É wá tɛ́ kosan sɔ’n su like suanlɛ ng’ɔ́ bá lɛ’n nun.