1. ?Wafa nga Zoova yili e’n ti’n, ninnge cinnjin benin mun yɛ e mian be wun-ɔn? (Matie 5:3)

 WAFA nga Zoova yili klɔ sran mun’n ti’n, ninnge wie’m be o lɛ’n be ti cinnjin man be dan. I wie yɛle aliɛ, nin tralɛ, ɔ nin lawlɛ. Sɛ e mian ninnge sɔ’m be nun kun sa wun le nɲɔn kun bɔbɔ’n, e mɛn dilɛ’n kwla yo kekle. Sanngɛ like kun ekun ti cinnjin man e wie. Yɛle kɛ ɔ fata kɛ e si Zoova naan e fa atin ng’ɔ kle e’n su. (An kanngan Matie 5:3 nun.) Sɛ e waan é dí aklunjɔɛ kpafuɛ’n, ɔ ti cinnjin kɛ e wun i wlɛ kɛ e mian Ɲanmiɛn wun. Kpɛkun maan e fa atin ng’ɔ kle e’n su titi.

2. Biblu’n kan be nga be “wun i wlɛ kɛ be mian Ɲanmiɛn wun’n” be ndɛ. ?Ndɛ sɔ’n i bo’n yɛle benin? An fa sa kun yiyi nun.

² Biblu’n kan be nga be “wun i wlɛ kɛ be mian Ɲanmiɛn wun’n,” be ndɛ. ?Ndɛ sɔ’n i bo’n yɛle benin? Glɛki’n nun ndɛ mma nga be kacili i Wawle’n nun sɔ’n, ɔ fa e ɲin sie i sran wie mɔ be kunndɛ ukalɛ naan b’a ɲan ninnge wie mun Ɲanmiɛn sulɛ’n nun’n be su. Maan e se kɛ yalɛ’n w’a di sran kun dan. I wun tralɛ’n w’a titi sekeseke. Awe mɔ w’a kun i lele’n ti’n, w’a yo sa kokloo. Kɛ lika’n cɛn’n, wia’n bo i lele lika’n fa sɛn i. Kɔnguɛ kusu’n ayrɛ’n kun i lele lika’n fa cɛn i. Afin gua su yɛ ɔ la-ɔ. Sran fi fɛmɛn i wun mɛntɛnmɛn i yɛ i klun jɔman bɔ kaan sa. I sɔ sran’n wun i wlɛ kɛ ɔ fata kɛ be ukɛ i naan w’a fite nun. I wafa kunngba’n be nga be mian Ɲanmiɛn wun’n, be wun i wlɛ kɛ ɔ fata kɛ Ɲanmiɛn uka be naan b’a fite nun. I sɔ’n ti’n, ninnge nga Ɲanmiɛn fa man be ng’ɔ klo be’n naan be nin i be afiɛn’n w’a mantan’n, ɔ kunndɛ kpa kɛ ɔ́ ɲán wie.

3. ?Ngue yɛ é wá kɛ́n i ndɛ like suanlɛ nga nun-ɔn?

³ Like suanlɛ nga nun’n, é wá fá e ɲin síe i Fenisi bla ng’ɔ  kunndɛli kpa kɛ Zezi ukɛ i’n i su ndɛ’n su. É wá wún kɛ ɔ fata kɛ be nga be wun i wlɛ kɛ be mian Ɲanmiɛn wun’n, be yi nzuɛn nsan be nglo kɛ bla sɔ’n sa. I sin’n é wá kán sran wie mɔ be kunndɛli kpa kɛ Ɲanmiɛn kle be atin’n be ndɛ. Sran sɔ’m be yɛle akoto Piɛli, nin akoto Pɔlu, ɔ nin Famiɛn Davidi.

Ɔ YOLI WUN ASE KANFUƐ, KƐ Ɔ́ SRƐ́ LIKE’N Ɔ JRANNIN SU KPA, YƐ Ɔ LAFILI ƝANMIƐN SU

4. ?Ngue yɛ Fenisi bla kun kunndɛli kɛ Zezi yo mɛn i-ɔ?

⁴ Cɛn kun’n, Fenisi bla kun ko toli Zezi. Bla sɔ’n i wa bla’n “su wun ɲrɛnnɛn kpa afin mmusu kun w’a saci i.” (Mat. 15:21-28) Bla’n ko kotoli Zezi bo, kpɛkun ɔ srɛli i kɛ ɔ ukɛ i wa bla’n. Fenisi bla sɔ m’ɔ ko toli Zezi’n, ɔ yili nzuɛn nsan be nglo. Maan e fa e ɲin e sie i nzuɛn sɔ’m be su.

5. (1) ?Ngue yɛ Zezi yo mannin Fenisi bla’n niɔn? (2) ?Yɛ ngue ti yɛ ɔ yoli sɔ-ɔ? (An nian desɛn’n wie.)

⁵ Fenisi bla’n kleli kɛ ɔ ti wun ase kanfuɛ. ?Ngue ti yɛ e kwla se sɔ-ɔ? Afin Zezi fɛli i sunnzunnin alua ba. Be nga be timan Zifu’n be nun sunman be le alua ba be awlo lɔ. Sanngɛ bla’n w’a seman kɛ Zezi w’a kpɛ i nzowa. ?Sɛ ɔ ti wɔ’n, nn ngue yɛ á yó-ɔ? ?Á sé kɛ Zezi w’a kpɛ ɔ nzowa ti’n, a su srɛmɛn i kun kɛ ɔ uka wɔ? Fenisi bla’n liɛ’n w’a yoman sɔ. Bla sɔ’n kleli kɛ ɔ ti wun ase kanfuɛ. Sanngɛ nɛ́n i ngba-ɔ. Kɛ ɔ́ srɛ́ Zezi kɛ ɔ ukɛ i’n, ɔ jrannin su kpa. ?Ngue ti yɛ ɔ yoli sɔ-ɔ? Zezi su m’ɔ lafili’n ti-ɔ. Yɛ kɛ Zezi wunnin kɛ ɔ lafi i su dan’n, ɔ fali ajalɛ kɛ ɔ́ úkɛ i. Kannzɛ bɔbɔ Zezi seli laa kɛ “Izraɛli nvle’n nun bua mɔ b’a mlin’n,” be ngunmin be ukalɛ ti yɛ ɔ bali’n, sanngɛ ɔ yoli maan mmusu’n jasoli bla’n i wa’n su.

6. ?Wafa sɛ yɛ e kwla nian Fenisi bla’n i ajalɛ’n su-ɔ?

⁶ Kɛ ɔ ko yo naan y’a ɲan atin nga Ɲanmiɛn kle’n i su ye’n, ɔ fata kɛ e nian Fenisi bla’n i ajalɛ’n su. Yɛle kɛ maan e yo wun ase kanfuɛ, kɛ é srɛ́ Ɲanmiɛn kɛ ɔ́ úka e’n maan e jran su kpa. Yɛ maan e lafi  Ɲanmiɛn su tankaan kpa. Asa’n maan e lafi Klisi Zezi su kpa, yɛ maan e lafi be ng’ɔ sieli be kɛ be kle i sɔnnzɔnfuɛ’m be like’n be su kpa wie. (Mat. 24:45-47) Zoova nin i Wa’n be kunndɛ kpa kɛ bé úka be nga be yi nzuɛn sɔ’m be nglo’n. (An nian Zaki 1:5-7.) Siɛn’n maan e nian wafa nga Zoova kle e atin’n, ɔ nin wafa ng’ɔ uka e naan y’a ɲan ninnge nga e sa mian be wun naan y’a di aklunjɔɛ’n. Kɛ ɔ ko yo naan y’a wun like ng’ɔ fata kɛ e yo naan y’a ɲan ninnge sɔ’m be su ye’n, é wá fá e ɲin é síe i ajalɛ kpa nga akoto Piɛli, nin akoto Pɔlu, ɔ nin famiɛn Davidi be kle e’n su.

KƐ PIƐLI SA’N MAAN E SUAN ƝANMIƐN NDƐ’N NUN LIKE TITI

7. (1) ?Junman benin yɛ Zezi mannin Piɛli-ɔ? (2) ?Yɛ ngue ekun yɛ ɔ fata kɛ Piɛli bɔbɔ yo-ɔ? (Ebre Mun 5:14–6:1)

⁷ Maan e fa e ɲin e sie i ajalɛ nga akoto Piɛli kle e’n su. Piɛli o Zifu nga be dun mmua wunnin i wlɛ kɛ Zezi yɛ ɔ ti Mesi’n be nun wie. Ɔ wunnin i wlɛ kɛ Zoova sunmannin Zezi kɛ ɔ wa kan “nguan m’ɔ leman awieliɛ’n” i ndɛ kle sran mun. (Zan 6:66-68) Kɛ Zezi cɛnnin nguan’n, ɔ mannin Piɛli i junman kun kwlaa naan w’a wɔ ɲanmiɛn su. Ɔ seli i kɛ: “Man min bua ba’m be aliɛ.” (Zan 21:17) I sɔ kusu yɛ Piɛli yoli-ɔ. I kpa bɔbɔ’n, Zoova yoli maan ɔ klɛli Biblu’n nun fluwa nɲɔn. Sanngɛ ɔ fata kɛ Piɛli bɔbɔ fa blɛ naan ɔ suan Ɲanmiɛn Ndɛ’n nun like kpa wie. I wie yɛle kɛ ɔ suannin fluwa nga Ɲanmiɛn maan akoto Pɔlu dun mmua klɛli be’n be nun like. Kɛ ɔ́ súan fluwa sɔ’m be nun like’n, ɔ wunnin kɛ Pɔlu i ndɛ wie’m be “wlɛ wunlɛ ti kekle.” (2 Piɛ. 3:15, 16) Sanngɛ i sa sin w’a bubumɛn i, ɔ suannin like titi. Ɔ lafili su kɛ Zoova úkɛ i naan w’a wun ndɛ sɔ’m be wlɛ, naan kusu w’a kwla nanti afɔtuɛ nga ndɛ sɔ’m be mɛn i’n su.—An kanngan Ebre Mun 5:14–6:1 nun.

8. ?Kɛ Zoova kleli Piɛli i atin uflɛ’n, ngue yɛ Piɛli yoli-ɔ?

⁸ Kɛ mɔ Piɛli lafili Zoova su tankaan kpa’n ti’n, ɔ fali atin nga Zoova kleli i’n su. I wie yɛle kɛ i nun m’ɔ o Zope lɔ’n, Ɲanmiɛn fali nnɛn wie mun kleli i aolia nun. Kpɛkun anzi kun seli i kɛ ɔ kun nnɛn sɔ mun naan ɔ di be. Kusu nn Moizi Mmla’n se kɛ nnɛn sɔ’m be ti fiɛn naan ɔ fataman kɛ be di. Piɛli kusu mɔ kɛ ɔ fɛ i bakan nun’n ɔ nin-a diman ninnge kɛ ngalɛ’n sa’m be le’n, ɔ seli i wun kɛ like nga anzi’n seli i kɛ ɔ yo’n, ɔ timan su kaan sa. Ɔ maan i klikli nun’n, ɔ tɛli i su kɛ: “Cɛcɛ, min Min. Afin n nin-a diman like ng’ɔ timan sanwunʼn annzɛ like ng’ɔ ti fiɛn’n i le.” Sanngɛ anzi’n seli i kɛ: “Like nga Ɲanmiɛn yoli i sanwun’n, nán se kɛ ɔ ti fiɛn kun.” (Yol. 10:9-15) Piɛli wunnin ndɛ sɔ’n i wlɛ. ?Ɔ yo sɛ yɛ e si sɔ-ɔ? Yɛle kɛ, kɛ Piɛli wunnin sa sɔ’n aolia nun cɛ’n, sran nsan be wa toli i. Yɛ be seli i kɛ be min m’ɔ suan Kɔɔnɛyi’n kunndɛ kɛ ɔ blɛ i wun lɔ. Sɛ ɔ ti Piɛli i laa nun’n, nn ɔ su kɔman. Afin bian sɔ’n timan Zifu. Zifu’m be kusu be bu be nga be timan Zifu’m be sran tɛ, ɔ maan be kɔman be awlo. (Yol. 10:28, 29) Sanngɛ Piɛli w’a sisimɛn i bo, ɔ fali atin uflɛ nga Zoova kleli i’n su. (Ɲan. 4:18) Ɔ boli jasin fɛ’n kleli Kɔɔnɛyi nin i awlofuɛ mun. Be kusu be sɔli nun klanman. Ɲanmiɛn fɛli i wawɛ’n mannin be, kpɛkun be yoli be batɛmun.—Yol. 10:44-48.

9. ?Sɛ e suan Biblu’n nun ndɛ nga be wlɛ wunlɛ’n ti kekle’n be su like’n, i su ye nɲɔn benin yɛ e kwla ɲɛn i-ɔ?

⁹ Kɛ Piɛli sa’n, maan e kusu e suan Ɲanmiɛn Ndɛ’n nun like titi. Blɛ sunman’n ndɛ nga e kanngan nun’n i wlɛ wunlɛ timan  kekle. Sanngɛ ɔ ti cinnjin kɛ e suan ndɛ nga be wlɛ wunlɛ ti kekle’n be su like wie. I lɛ nun’n, ɔ fata kɛ e fa blɛ yɛ e mian e ɲin kpa naan y’a kwla yo sɔ. Yɛ sɛ e yo sɔ kusu’n, é ɲán su ye dan. Maan e kɛn i su ye nga e kwla ɲɛn i’n be nun nɲɔn be ndɛ. I klikli’n yɛle kɛ, é sí Zoova i su ndɛ wie mɔ bé úka e naan y’a klo i kpa naan kusu e ɲin w’a yi i kpa’n. Yɛ i nɲɔn su’n yɛle kɛ, i sɔ’n yó maan é kúnndɛ kpa kɛ é kán Zoova i nzuɛn m’ɔ yo ɲɛnmɛn dan’n i ndɛ klé e wiengu mun. (Rɔm. 11:33; Ngl. 4:11) Piɛli i su ndɛ’n man e afɔtuɛ kun ekun. Yɛle kɛ, kɛ anuannzɛ’n yiyi wafa nga e wun Biblu’n nun ndɛ’n wie’m be wlɛ laa’n i nun uflɛ kle e’n, nán e sisi e bo naan y’a fa su. Asa’n nán e sisi e bo naan y’a nian su y’a fa ajalɛ. I sɔ yɛ ɔ fata kɛ e yo naan Zoova w’a kle e atin titi, naan kusu w’a fa e w’a di junman titi-ɔ.

KƐ PƆLU SA’N, MAAN E FA NZUƐN UFLƐ MƆ ƝANMIƐN KLO I’N

10. ?Ngue yɛ ɔ fata kɛ e yo naan Zoova i klun w’a jɔ e wun-ɔn? (Kolɔsufuɛ Mun 3:8-10)

¹⁰ Kɛ ɔ ko yo naan Ɲanmiɛn i klun w’a jɔ e wun’n, ɔ fata kɛ e nzuɛn’n yo i liɛ’n su. Akoto Pɔlu seli kɛ: “Amun kplo amun nzuɛn laa’n” naan “amun fa nzuɛn uflɛ’n.” I lɛ nun’n, Ɲanmiɛn kwla uka e. (An kanngan Kolɔsufuɛ Mun 3:8-10 nun.) Kɛ ɔ ko yo naan e nzuɛn’n w’a yo Ɲanmiɛn liɛ’n su’n, i sɔ’n fa blɛ yɛ ɔ fata kɛ e mian e ɲin kpa. Akoto Pɔlu i su ndɛ’n kle sɔ. Kɛ ɔ fɛ i gbanflɛn nun’n, ɔ miɛnnin i ɲin kekle kpa naan Ɲanmiɛn i klun jɔ i wun. (Gal. 1:14; Fip. 3:4, 5) Sanngɛ w’a wunman wafa ng’ɔ fata kɛ ɔ su Ɲanmiɛn naan i klun w’a jɔ i wun’n i wlɛ kpa. Asa’n ɔ siman like nga Zezi kleli’n, yɛ ɔ tuli i wun. I sɔ’n ti’n, w’a yoman sa ng’ɔ jɔ Ɲanmiɛn klun’n.—1 Tim. 1:13.

11. ?Nzuɛn benin yɛ ɔ fata kɛ Pɔlu miɛn i ɲin naan w’a wlɛ i ase-ɔ? An yiyi nun.

¹¹ Kwlaa naan Pɔlu w’a kaci Klisifuɛ’n, ɔ ti sran mɔ i awlɛn ti fufu-ɔ. Sa Nga Be Yoli’n 9:1 se kɛ Pɔlu fali Zezi i sɔnnzɔnfuɛ’m be wun ya dan ti’n, ɔ ‘fɛli i ɲin cili be, yɛ ɔ wlali be srɛ kɛ ɔ́ kún be.’ Kɛ ɔ kacili Klisifuɛ’n, ɔ fata kɛ ɔ miɛn i ɲin kpa naan w’a wlɛ i nzuɛn tɛ sɔ’n i ase. Ɔ maan ɔ yoli wɛtɛɛfuɛ, yɛ ɔ trɛli i awlɛn i wiengu’m be wun. (Efɛ. 4:22, 31) Ɔ nin i sɔ ngba’n, kɛ cɛn kun’n ndɛ tɔli ɔ nin Baanabasi be afiɛn’n, “be kpankpannin be wiengu su.” (Yol. 15:37-39) I lɛ nun’n, Pɔlu tɔli i nzuɛn laa’n nun ekun. Sanngɛ i sa sin w’a bubumɛn i. Ɔ miɛnnin i ɲin kpa titi naan i nzuɛn’n w’a yo Ɲanmiɛn liɛ’n su.—1 Kor. 9:27.

12. ?Ngue yɛ ɔ ukali Pɔlu naan w’a miɛn i ɲin titi naan Ɲanmiɛn i klun w’a jɔ i wun-ɔn?

¹² Pɔlu wlɛli i nzuɛn laa’n i ase, kpɛkun ɔ fali nzuɛn uflɛ’n, afin ɔ yoli wun ase kanfuɛ. (Fip. 4:13) Kɛ Piɛli sa’n, Pɔlu ‘lafili wunmiɛn nga Ɲanmiɛn man’n su.’ (1 Piɛ. 4:11) Sanngɛ ɔ ju wie’n Pɔlu fɔnnin, ɔ maan i sa sin bubuli i. Sanngɛ kɛ i sa sin bubu i’n, ɔ bu ninnge kpakpa nga Ɲanmiɛn yo mɛnnin i’n be akunndan. I sɔ’n wlɛli i fanngan naan w’a miɛn i ɲin titi naan Ɲanmiɛn i klun w’a jɔ i wun.—Rɔm. 7:21-25.

13. ?Wafa sɛ yɛ e kwla nian Pɔlu i ajalɛ’n su-ɔ?

¹³ Sɛ e su Zoova w’a cɛ-o, annzɛ ɔ nin-a cɛman-o, e kwla nian Pɔlu i ajalɛ’n su. Yɛle kɛ maan e mian e ɲin titi naan e wla e nzuɛn laa’n i ase, yɛ e fa nzuɛn uflɛ m’ɔ fin Ɲanmiɛn’n. Ɔ ju wie’n e kwla fɔn. I wie yɛle kɛ e kwla fa ya tɛtɛ kpa, annzɛ e kwla kan ndɛ tɛ e kle sran kun. Sɛ i sɔ sa’n ju’n, nán maan e bu i kɛ e liɛ’n be yo e sa fi-ɔ, ɔ yoman ye naan Zoova i klun su jɔman e  wun le. Sanngɛ maan e mian e ɲin titi e kaci akunndan nga e bu’n ɔ nin e ayeliɛ’n. (Rɔm. 12:1, 2; Efɛ. 4:24) Kɛ é yó sɔ kusu’n, nán maan e ɲin kpa like kun su. Yɛle kɛ sɛ e waan e nzuɛn’n yo kpa wɔ i ɲrun titi’n, maan e lo e wun man Zoova naan ɔ kle e like titi naan y’a kwla si i kpa.

KƐ DAVIDI SA’N, MAAN E FA E WUN WLA ZOOVA SA NUN NAAN Ɔ SASA E

14-15. ?Wafa sɛ yɛ Zoova sɛsɛ i sufuɛ mun-ɔn? (Jue Mun 27:5) (An nian foto’n wie.)

¹⁴ Kɛ ɔ ko yo naan y’a di aklunjɔɛ kpafuɛ’n, ɔ fata kɛ Zoova sasa e. ?Wafa sɛ yɛ Zoova sasa e-ɔ? ?Yɛ ngue yɛ ɔ fata kɛ e yo naan w’a kwla sasa e-ɔ?

¹⁵ Famiɛn Davidi lafili su kɛ Zoova sɛ́sɛ́ i blɛ kekle nun. (An kanngan Jue Mun 27:5 nun.) ?Wafa sɛ yɛ Zoova sasa e andɛ-ɔ? Zoova sɛsɛ i sufuɛ mun naan sran wie fi annzɛ like wie fi w’a yoman naan b’a lafimɛn i su kun. Sran’m be kunndɛ kɛ bé yó naan e yaci i sulɛ. Sanngɛ ɔ tali nda kɛ ɔ́ sásá e naan e nin i e afiɛn w’a mantan titi. (Jue. 34:7; Eza. 54:17) Satan nin mmusu mun nin klɔ sran wie mɔ be tanndan e ɲrun’n, be le kwlalɛ kpa. Sanngɛ be wunmiɛn’n juman Zoova liɛ’n nun. Sɛ be kun e bɔbɔ’n, cɛn wie lele’n Zoova cɛ́n e. (1 Kor. 15:55-57; Ngl. 21:3, 4) Asa’n kɛ sa wie’m be ti’n e koko dan’n Zoova uka e, kɛ ɔ ko yo naan y’a yacimɛn i sulɛ’n ti. (Ɲan. 12:25; Mat. 6:27-29) Ɔ mannin e aniaan kpanngban kpa mɔ be suan e bo blɛ kekle nun-ɔn. Ɔ sieli asɔnun kpɛnngbɛn mun naan be kle e like, yɛ be uka e naan e lafi i su kpa titi. (Eza. 32:1, 2) Yɛ kɛ e kɔ aɲia’m be bo’n, be kle e ninnge wie mɔ e kwla yo be naan Zoova w’a uka e’n.—Ebr. 10:24, 25.

16. ?Wafa sɛ yɛ Zoova sasali Davidi-ɔ?

¹⁶ Kɛ Davidi fa Zoova i mmla’m be su’n, Zoova sɛsɛ i. Yɛle kɛ ɲrɛnnɛn ng’ɔ tɔ be nga be ɲinfu be fɛmɛn i mmla’m be su’n, ɔ yo maan be tɔman Davidi su wie. (An nian Ɲanndra Mun 5:1, 2.) Sanngɛ kɛ Davidi  fɛmɛn i mmla’m be su m’ɔ yo sa tɛ’n, ɔ wun i sin afɛ’n. (2 Sam. 12:9, 10) Ɔ ju wie kusu’n nán kɛ Davidi yoli sa ti yɛ ɔ o afɛ’n nun-ɔn, sanngɛ i wiengu’m be ti-ɔ. Kɛ i sɔ sa’n ju’n, Davidi koko sa ng’ɔ o i su’n kle Zoova. Yɛ Zoova kusu sɛsɛ i. ?Wafa sɛ? Yɛle kɛ ɔ se i kɛ ɔ́ níɛn i lika, kpɛkun ɔ ukɛ i naan ɔ wun i wlɛ kɛ i ndɛ lo i. I sɔ liɛ’n fɔnvɔ Davidi dan.—Jue. 23:1-6.

17. ?Wafa sɛ yɛ e kwla nian Davidi i ajalɛ’n su-ɔ?

¹⁷ Wafa nga e kwla nian Davidi i ajalɛ’n su’n, yɛle kɛ maan e srɛ Zoova naan ɔ uka e naan e fa ajalɛ kpa. Asa’n kɛ afɛ o e su’n, nán e se kɛ Zoova w’a sasaman e ti-ɔ. Sanngɛ maan e wun i wlɛ kɛ atrɛkpa’n ajalɛ tɛ wie mɔ e fali’n ti-ɔ. (Gal. 6:7, 8) Ɔ ju wie kusu’n, nán kɛ e bɔbɔ e fali ajalɛ tɛ ti yɛ afɛ o e su-ɔ. Kɛ ɔ ko yo sɔ’n, maan e koko sa ng’ɔ o e su’n i kwlaa kle Zoova. Sɛ e yo sɔ’n, ɔ́ fɔ́nvɔ e yɛ ɔ́ úka e naan y’a wun i wlɛ kɛ e ndɛ lo i.—Fip. 4:6, 7.

MAAN E LO E WUN MAN ZOOVA NAAN Ɔ KLE E ATIN TITI

18. (1) ?Andɛ’n akunndan benin yɛ sran sunman be bu-ɔ? (2) ?Yɛ ngue yɛ ɔ fata kɛ e yo naan Zoova w’a kle e atin titi-ɔ? (An nian foto mun wie.)

¹⁸ Afuɛ 2026 nun Biblu’n nun ndɛ mma’n yɛ: “Be nga be wun i wlɛ kɛ be mian Ɲanmiɛn wun’n be liɛ su ti ye.” Andɛ’n ɔ ti cinnjin kɛ e fa ndɛ sɔ mɔ Zezi kannin’n su naan e lo e wun e man Zoova naan ɔ kle e atin. Afin andɛ’n sran kpanngban be bumɛn i kɛ be mian Ɲanmiɛn wun naan ɔ fata kɛ ɔ kle be atin. Sran wie mun ekun be o lɛ’n, be lafi su kɛ Ɲanmiɛn o lɛ, sanngɛ wafa nga be bɔbɔ be kunndɛ kɛ bé sú i’n yɛ be fa su i-ɔ. Sran wie mun ekun be liɛ’n, mɛn’n nun ngwlɛlɛfuɛ’m be ndɛ nga be kan’n i su yɛ be di-ɔ. I sɔ’n ti’n, be liɛ kwlá yoman ye. Ɔ fataman kɛ e nian sran sɔ’m be ajalɛ’n su. ?Yɛ é yó sɛ naan y’a fa atin nga Zoova kle’n su titi? Yɛle kɛ maan e suan Ɲanmiɛn Ndɛ’n nun like titi naan e wun like ng’ɔ fata kɛ e yo naan Zoova i klun w’a jɔ e wun’n. Asa’n maan e mian e ɲin e fa nzuɛn uflɛ’n, yɛ e fa e wun e wlɛ i sa nun naan ɔ sasa e.