Biblu’n kan sa kpanngban kpa mɔ be juli sakpasakpa’n be ndɛ, yɛ sa sɔ’m be man e afɔtuɛ cinnjin wie mun. Sɛ a bu sa sɔ’m be su akunndan naan ɔ yo wɔ kɛ kɛ bé jú’n a wunnin nun sa’n, a kwla wun ndɛ nga a kanngan nun’n i wlɛ kpa, yɛ a kwla ɲan su ye kusu. Ninnge nga be kwla uka wɔ naan w’a kwla yo sɔ’n be wie yɛ:

• Man ɔ nɛn’n su kanngan nun. Sɛ a man ɔ nɛn’n su kanngan Biblu’n nun’n, i sɔ’n kwla uka wɔ naan w’a bu sa ng’ɔ juli mɔ be kɛn i ndɛ’n i su akunndan kpa. Wienun-ɔn, a nin ɔ awlofuɛ mun, amun su kanngan Biblu’n nun. Yɛ sran wie mun yɛ be ijɔ akpasua nga amun su kanngan nun’n nun-ɔn. Sɛ ɔ ti sɔ’n, maan a nin ɔ awlofuɛ mun amun tinuntinun amun kanngan sran kun i ndɛ liɛ ng’ɔ kannin’n nun. I sɔ’n úka amun naan w’a yo amun kɛ, kɛ sa sɔ’n jú’n nn amun o lɛ sa.

• Maan ɔ yo wɔ kɛ, kɛ sa sɔ’n jú’n nn a o lɛ sa. Mian ɔ ɲin naan wun akunndan nga sran nga be kan be ndɛ’n be buli’n, ɔ nin wafa nga be wun yoli be’n be wlɛ. I lɛ nun’n a kwla usa ɔ wun kɛ: ‘?Ngue ti yɛ sran’n kannin ndɛ sɔ’n niɔn, annzɛ ɔ yoli sa sɔ’n niɔn? ?Sɛ ɔ ti min’n, nn akunndan benin yɛ ń bú-ɔ, annzɛ wafa sɛ yɛ min wun yó min-ɔn?’

• Yi i desɛn. Kannzɛ bɔbɔ a siman desɛn yi kpa’n, sanngɛ sɛ a yi ndɛ nga a kanngan nun’n i desɛn’n, i sɔ’n úka wɔ naan w’a yo wɔ kɛ, kɛ sa’n jú’n nn a o lɛ sa. Asa’n i sɔ’n úka wɔ naan ɔ wla w’a kpɛn ndɛ’m be su.