1-2. (1) ?E ti tɛ mɔ Zezi fɛli i wun yili’n ti’n, ngue yɛ ɔ fata kɛ e yo-ɔ? (2) ?Yɛ ngue ti yɛ ɔ fata kɛ e yo sɔ-ɔ? (2 Korɛntifuɛ Mun 5:14, 15) (An nian desɛn’n wie.)

 ?SƐ SUA bu guali e su naan sran kun wa deli e’n, e su seman kɛ sran sɔ’n ti yɛ e te o nguan nun-ɔn? Kannzɛ bɔbɔ ɔ deli sran wie mun ekun’n, sanngɛ e liɛ’n é kúnndɛ kɛ é klé i kɛ e si ye naan e wla su fiman delɛ m’ɔ deli e’n su.

² Like suanlɛ ng’ɔ sinnin lɛ’n nun’n, e wunnin kɛ e bɔbɔ e kwlá yoman naan y’a ɲan e ti sa tɛ’n nin wie’n be sa nun. Sanngɛ e ti tɛ mɔ Zezi fɛ i wun yili’n ti’n, e kwla fite nun. Yɛle kɛ (1) Ɲanmiɛn kwla yaci e sa tɛ mun cɛ e, (2) e kwla lafi su kɛ cɛn wie lele’n e su yoman sa tɛ yofuɛ kun, yɛ (3) e nin Ɲanmiɛn e kwla siesie e afiɛn. Ɔ maan e kwla lafi su kɛ cɛn wie lele’n, é trán nguan nun tititi mɛn uflɛ’n nun lɔ. Klolɛ dan mɔ Zezi klo sran mun’n i ti yɛ ɔ fɛli i wun yili e ti tɛ-ɔ. Kwlaa naan w’a ba asiɛ’n su wa bɔbɔ’n, ɔ kleli kɛ ɔ klo e. (Ɲan. 8:30, 31) Akoto Pɔlu seli kɛ: “Sɛ klolɛ nga Klisi’n fa klo e’n ti sran’n, nn é sé kɛ ɔ sie e mlɔnmlɔn.” (An kanngan 2 Korɛntifuɛ Mun 5:14, 15 nun.) Ndɛ sɔ’n kle kɛ ɔ fata kɛ e kle Zezi kɛ e si ye klolɛ m’ɔ klo e’n ti, naan e wla su fiman delɛ m’ɔ deli e’n su le.

3. ?Ngue ti yɛ wafa nga sran kun klé kɛ ɔ si e ti kpɔlɛ tɛ’n i su ye’n ɔ nin sran uflɛ liɛ’n ɔ su yoman kun-ɔn?

³ ?Ngue yɛ a kwla yo fa kle kɛ a si e ti kpɔlɛ tɛ’n i su ye-ɔ? Atrɛkpa’n, wafa nga á tɛ́ su’n, ɔ nin sran uflɛ liɛ’n su yoman kun. Maan e fa sunnzun ase kun e nian. Wienun-ɔn, sran nsan mɔ be o lika fanunfanun nun’n, be su wa tu ajalɛ bé kɔ́ klɔ kunngba’n su. Nán atin kunngba’n yɛ bé fá naan b’a ju lɔ-ɔ. I wafa kunngba’n, ɔ liɛ nga á yó naan w’a kle kɛ a si e ti kpɔlɛ tɛ’n i su ye’n ɔ fin wafa nga a nin Zoova amun afiɛn mantan dɔ nga su’n. I sɔ’n ti’n, é wá kán wafa nga sran akpasua fanunfanun nsan be kwla kle kɛ be si e ti kpɔlɛ tɛ’n i su  ye’n i ndɛ. Be yɛle (1) Biblu’n nun like suanfuɛ mun, nin (2) be nga b’a yo be batɛmun’n, ɔ nin (3) be nga be tranman aɲia’m be bo kun’n.

BIBLU’N NUN LIKE SUANFUƐ MUN

4. ?Ngue ti yɛ e kwla se kɛ Zoova i ɲin kpaman Biblu’n nun like suanfuɛ’m be su-ɔ?

⁴ Sɛ dɔ nga su a ti Biblu’n nun like suanfuɛ’n, bu ndɛ nga i su akunndan: A kunndɛ kɛ á sí Zoova nin like nga Biblu’n kle’n. I sɔ’n kle kɛ Zoova kunndɛ kɛ a yo i janvuɛ, yɛ ɔ su uka wɔ naan w’a kwla yo sɔ. (Zan 6:44; Yol. 13:48) Biblu’n se kɛ: “Zoova yɛ ɔ niannian sran i awlɛn’n nun-ɔn.” I sɔ’n kle kɛ ɔ ɲin nga a mian naan w’a suɛn i su like’n, i ɲin kpaman su. Asa’n, kɛ ɔ wun kɛ a kaci ɔ sa ninnge wie’m be nun naan i klun w’a jɔ ɔ wun’n, i sɔ’n yo i fɛ. (Ɲan. 17:3; 27:11) E ti kpɔlɛ tɛ’n ti yɛ a nin Zoova amun afiɛn kwla mantan-ɔn. (Rɔm. 5:10, 11) Nán ɔ wla fi i sɔ liɛ’n su.

5. ?Wafa sɛ yɛ Biblu’n nun like suanfuɛ’m be kwla nanti ndɛ ng’ɔ o Filipufuɛ Mun 3:16 nun’n su-ɔ?

⁵ ?Sɛ a ti Biblu’n nun like suanfuɛ’n, wafa sɛ yɛ a kwla kle kɛ a si e ti kpɔlɛ tɛ’n i su ye-ɔ? Like kun mɔ a kwla yo’n yɛle kɛ fa afɔtuɛ kun mɔ akoto Pɔlu mannin Filipufuɛ mun’n i su. Ɔ seli be kɛ: “Kan kwlaa nga y’a wɔ e ɲrun y’a ju lɛ’n, maan e fa ajalɛ kunngba’n e wɔ e ɲrun tititi.” (Fip. 3:16) Biblu kun ekun nun’n, be kacili ndɛ sɔ’n kɛ: “Lika kwlaa nga y’a ju’n, kannzɛ ɔ ti sɛ, maan ajalɛ kunngba nga e fa boli i bo’n, e fa wɔ.” I sɔ’n ti’n, nán maan like wie ti’n annzɛ sran wie ti’n, á sé kɛ á yáci nguan atin’n i su nantilɛ.—Mat. 7:14; Lik. 9:62.

6. ?Sɛ Biblu’n nun ndɛ wie i su falɛ annzɛ nzuɛn tɛ wie i ase wlalɛ ti kekle man Biblu’n nun like suanfuɛ kun’n, ngue yɛ ɔ kwla yo-ɔ? (Mmla’n 30:11-14) (An nian foto’n wie.)

⁶ Atrɛkpa’n, Biblu’n nun ndɛ nga be kleli wɔ’n i wie o lɛ’n, i su falɛ’n ti kekle man wɔ. ?Sɛ ɔ ti sɔ’n, ngue yɛ a kwla yo-ɔ? Suan ndɛ sɔ’n i su like kpa. Yɛ srɛ Zoova kɛ ɔ uka wɔ naan a wun ndɛ sɔ’n i wlɛ kpa. (Jue. 86:11) Sɛ a yo i kwlaa sɔ’n naan a wunmɛn i wlɛ’n, nán se kɛ san fii á wún i wlɛ dɔ nga su. Ɔ li suan Biblu’n nun like titi. Atrɛkpa’n, kɛ ɔ́ kɔ́ i ɲrun’n á wún i wlɛ. Sɛ kusu nzuɛn tɛ wie yɛ i ase wlalɛ ti kekle man wɔ’n, maan ɔ wla kpɛn su kɛ Zoova seman e kɛ e yo like nga e kwlá yoman’n. Ɔ maan a kwla nanti i mmla’m be su. (An kanngan Mmla’n 30:11-14  nun.) I bɔbɔ seli kɛ ɔ́ úka wɔ. (Eza. 41:10, 13; 1 Kor. 10:13) I sɔ’n ti’n, nán ɔ sa sin bubu wɔ. Nán bu like nga i yolɛ’n ti kekle man wɔ’n i akunndan ngboko. Sanngɛ fa ɔ ɲin sie i ninnge nga Zoova yo mannin e’n be su. I wie yɛle e ti kpɔlɛ tɛ m’ɔ yili’n. Kɛ klolɛ mɔ a klo Zoova’n ɔ́ wá yó dan kɔ́ i ɲrun’n, á wún kɛ “i mmla’m be su falɛ yoman ya.”—1 Zan 5:3. a

7. ?Ngue yɛ gbanflɛn nin talua nga be awlofuɛ’m be su Zoova’n, be kwla bu i akunndan-ɔn?

⁷ Gbanflɛn nin talua mun, amun mɔ amun te o amun si nin amun nin mɔ be su Zoova’n be bo wun’n, amun o Biblu’n nun like suanfuɛ’m be nun wie. I kpa bɔbɔ’n, sran nga amun si nin amun nin be kle be Biblu’n nun like’n, amun ti be nun cinnjin kpafuɛ’n. Biblu’n se kɛ: “An fa amun wun mantan Ɲanmiɛn, yɛ ɔ́ fɛ́ i wun mántan amun.” (Zak. 4:8; 1 Ɲol. 28:9.) Sɛ amun fa ajalɛ kɛ amún fá amun wun mántan Zoova’n, i kusu fɛ́ i wun mántan amun naan amun a kwla kaci i janvuɛ. Nán kɛ mɔ amun awlofuɛ’m be su Zoova’n, i ti yɛ ɔ́ fɛ́ i wun mántan amun-ɔn. Ɔ fɛ i wun mantan sran’m be tinuntinun. Sran sɔ’m be wie yɛle be nga be awlofuɛ’m be su Zoova’n. ?Ngue yɛ Zoova yoli naan amun a kwla fa amun wun b’a mɛntɛn i-ɔ? Ɔ fɛli i Wa’n yili e ti tɛ. Nán amun wla fi like cinnjin sɔ m’ɔ yoli’n su le. (Rɔm. 5:1, 2) Afuɛ nga’n, amun fa blɛ bu like nga Zoova nin Zezi be yo mannin amun’n, i su akunndan kpa kwlaa naan y’a yo e Wla Kpɛnlɛ aɲia’n. I sin’n amun bu like kwlaa nga amun kwla yo naan amun a kle Zoova kɛ amun si e ti kpɔlɛ tɛ’n i su ye’n i akunndan. b

BE NGA B’A YO BE BATƐMUN’N

8. ?Wafa sɛ yɛ be nga b’a yo batɛmun’n, be kleli kɛ be lafi e ti kpɔlɛ tɛ’n su-ɔ?

⁸ Sɛ b’a yo wɔ batɛmun’n, i sɔ’n kle kɛ a yoli ninnge sunman mɔ be kle kɛ a lafi e ti kpɔlɛ tɛ’n su-ɔ. I wie yɛle kɛ a fali ajalɛ wie mun naan w’a kwla fa ɔ wun w’a mantan Zoova, naan w’a kwla nanti i mmla’m be su. A yoli like nga Zezi seli i sɔnnzɔnfuɛ’m be kɛ be yo’n. Yɛle kɛ a kleli sran’m be like naan be kaci i sɔnnzɔnfuɛ wie. Asa’n, a fali ɔ wun mannin Zoova yɛ be yoli ɔ batɛmun. Yɛ atrɛkpa’n, be tanndannin ɔ ɲrun naan w’a suman Zoova. (2 Tim. 3:12) Sanngɛ a suli i titi. I sɔ’n kle kɛ a klo i naan a si e ti kpɔlɛ tɛ’n i su ye.—Ebr. 12:2, 3.

9. ?Sɛ Klisifuɛ kun w’a niɛnmɛn i wun su’n, sa benin yɛ ɔ kwla ju i su-ɔ?

⁹ Sɛ b’a yo wɔ batɛmun w’a di le nɲɔn kun’n, ɔ fata kɛ ɔ ɲin tran su titi. Afin sɛ  w’a yoman sɔ’n, ɔ cɛman naan ɔ ɲin w’a kpa e ti kpɔlɛ tɛ’n i cinnjin m’ɔ ti’n i su. I sɔ sa’n juli Efɛzi lɔ Klisifuɛ klikli’m be su. Klisifuɛ sɔ’m be jrannin sa wie’m be ɲrun kekle. Ɔ maan Zezi yoli be mo. Sanngɛ ɔ seli be wie kɛ: “Ɔ wun sa o min klun. Yɛle kɛ a yiman klolɛ’n i nglo kɛ i klikli’n nun’n sa kun.” (Ngl. 2:3, 4) Ndɛ sɔ mɔ Zezi kannin’n ɔ kle kɛ sɛ Klisifuɛ kun w’a niɛnmɛn i wun su’n, kɛ ɔ́ kɔ́ i ɲrun’n ɔ su suman Zoova klolɛ su kun. Klisifuɛ sɔ’n kwla srɛ Ɲanmiɛn, ɔ kwla kɔ aɲia’m be bo, ɔ kwla bo jasin fɛ’n, sanngɛ nán klolɛ su yɛ ɔ yo i kwlaa sɔ’n niɔn. Kɛ mɔ ninnge sɔ’m be yolɛ’n w’a kaci i nzuɛn’n i ti yɛ ɔ te yo be-ɔ. ?Sɛ a bu ɔ klun lɔ naan a wun kɛ a kloman Zoova tankaan kɛ laa’n sa kun’n, ngue yɛ a kwla yo-ɔ?

10. ?Wafa sɛ yɛ e kwla nanti afɔtuɛ nga akoto Pɔlu mannin Timote’n su-ɔ? (1 Timote 4:13, 15)

¹⁰ Akoto Pɔlu seli Timote kɛ ɔ bu ninnge ng’ɔ yo be Zoova i sulɛ nun’n be su akunndan kpa, naan ɔ tu i klun yo be. (An kanngan 1 Timote 4:13, 15 nun.) Ɔ kusu bu like nga a kwla yo naan w’a tu ɔ klun w’a su Zoova kpa’n i akunndan, kɛ ɔ ko yo naan Ɲanmiɛn wawɛ’n i fanngan nun’n w’a su Zoova juejue su’n ti. (Rɔm. 12:11) I wie yɛle kɛ a kwla siesie ɔ wun kpa naan w’a ɔ aɲia’m be bo. I sɔ’n úka wɔ naan w’a fa ɔ ɲin w’a sie i aɲia’m be bo lɔ ndɛ’m be su kpa w’a tra laa’n. Annzɛ kusu a kwla kunndɛ lika koun kun mɔ a kwla tran lɛ suan Biblu’n nun like naan w’a kwla bu like nga a suan’n i su akunndan kpa’n. Kɛ be wlawla sin nun yie’n yɛ ɔ jue titi-ɔ. I wafa kunngba’n, yo ninnge sɔ mun titi naan w’a kwla kle titi kɛ a si ninnge kwlaa nga Zoova yo man wɔ’n be su ye. Ninnge sɔ’m be nun kun yɛle e ti kpɔlɛ tɛ’n. Asa’n, kɛ e Wla Kpɛnlɛ aɲia’n mántan koko’n, bu Zoova i Lalofuɛ mɔ a ti’n i su ye dan nga a ɲan be’n be su akunndan kpa. I sɔ’n úka wɔ naan w’a kle kɛ a si e ti kpɔlɛ tɛ mɔ i ti yɛ a nin Zoova amun afiɛn kwla mantan’n i su ye.

11-12. ?Sɛ ɔ ju wie’n, e suman Zoova juejue su’n i sɔ’n kle kɛ i wawɛ’n nunman e su kun? An yiyi nun. (An nian foto’n wie.)

¹¹ Sɛ dɔ nga su’n, a suman Zoova juejue su kɛ laa’n sa’n nán ɔ sa sin bubu wɔ. Yɛ nán bu i kɛ Ɲanmiɛn wawɛ’n nunman ɔ su kun. Maan ɔ wla kpɛn ndɛ nga akoto Pɔlu kan kleli Korɛntifuɛ mun’n su. Kɛ ɔ́ kán jasin fɛ m’ɔ bo’n i ndɛ’n, ɔ seli kɛ: “Sɛ n di junman sɔ’n min klun klo su’n, ń ɲán akatua. Kannzɛ n di i klunngbɔ su bɔbɔ’n, Ɲanmiɛn m’ɔ te lafi min su’n yɛ ɔ mannin min junman sɔ’n kɛ n di-ɔ.” (1 Kor. 9:17) ?Ngue yɛ ndɛ sɔ’n kle e-ɔ?

¹² Ɔ ju wie’n, jasin fɛ’n i bolɛ’n w’a yoman Pɔlu i fɛ. Kannzɛ blɛ wie’n i wun yoli i sɔ’n, sanngɛ ɔ miɛnnin i ɲin boli jasin fɛ’n titi. Ɔ kusu mian ɔ ɲin yo sa ng’ɔ ti  kpa’n titi. Kannzɛ bɔbɔ i sɔ yolɛ yoman ɔ fɛ’n, mian ɔ ɲin yo. Srɛ Zoova kɛ ‘ɔ yo maan a kunndɛ kɛ á yó’ i klun sa, yɛ ‘ɔ man ɔ wunmiɛn naan w’a kwla yo sɔ.’ (Fip. 2:13) Ninnge nga be kwla uka ɔ naan a nin Zoova amun afiɛn w’a mantan’n, yo be titi. Sɛ a yo sɔ’n, klolɛ mɔ a klo Zoova’n ɔ́ yó dan ekun, yɛ á sú i juejue su kɛ laa’n sa.

13. ?Wafa sɛ yɛ e kwla ‘bu e klun lɔ titi e nian sɛ e te nanti kɛ Klisifuɛ sa-ɔ’?

¹³ Cɛn kunngun’n, yo like nga 2 Korɛntifuɛ Mun 13:5 se e kɛ e yo’n. Ɔ se kɛ: “Maan an bu amun klun lɔ titi be nian sɛ amun te nanti kɛ Klisifuɛ sa-o. Maan an bu sran wafa nga amun ti’n i akunndan titi be nian.” I lɛ nun’n, a kwla usa ɔ wun kɛ: ‘?Zoova i klun sa yolɛ’n ti min cinnjin tra like kwlaa?’ (Mat. 6:33) ‘?Ninnge nga n fa yiyi min ɲin su’n be kle kɛ n kpɔ sa tɛ’n?’ (Jue. 97:10) ‘?Ninnge nga n yo be’n nin ndɛ nga n kan be’n, be yo maan aniaan’m be bo yo kun yɛ be nuan sɛ be wun?’ (Efɛ. 4:2, 3) E Wla Kpɛnlɛ aɲia’n i blɛ’n, ɔ ti blɛ kpa kun mɔ e kwla fa bu ndɛ kɛ ngalɛ sa’m be su akunndan-ɔn. Sɛ e bu e ti tɛ mɔ Zoova fɛ i Wa’n yili’n i su akunndan kpa’n, é klé Zoova kɛ e si ye. Yɛ é klé kɛ e timan e bɔbɔ e liɛ kun naan e ti Klisi i liɛ.

BE NGA BE TRANMAN AƝIA’M BE BO KUN’N

14. ?Ngue ti yɛ aniaan wie’m be tranman aɲia’m be bo kun-ɔn?

¹⁴ Aniaan wie’m be su Zoova w’a di afuɛ kpanngban, annzɛ w’a di anglo nɲɔn kun, sanngɛ be tranman aɲia’m be bo kun. Be nun wie’m be liɛ’n, mɛn’n nun “ninnge’m be ti kokolɛ’n” ti’n be leman wunmiɛn be suman Zoova kun. (Lik. 21:34) Wie’m be liɛ’n, ndɛ wie mɔ aniaan kun kannin’n annzɛ kusu aniaan kun i ayeliɛ’n ti’n be sa sin bubuli be. (Zak. 3:2) Wie’m be liɛ kusu’n, be yoli sa tɛ dan yɛ be kunndɛman ukalɛ. ?Sɛ a tranman aɲia’m be bo kun’n, ngue yɛ a kwla yo fa kle kɛ a si e ti tɛ mɔ Zoova nin i Wa’n be yili’n i su ye-ɔ?

15. ?Wafa sɛ yɛ Zoova kle kɛ i sufuɛ nga b’a mlin’n be ndɛ lo i-ɔ? (Ezekiɛli 34:11, 12, 16)

¹⁵ Kɛ Zoova wun kɛ i sufuɛ kun w’a mlin’n, wafa nga i sɔ’n yo i’n bu i akunndan. Ɔ yimɛn i sufuɛ sɔ’n i blo. Sanngɛ ɔ kunndɛ i kɛ bua sunianfuɛ’n kunndɛ i bua mɔ w’a mlin’n sa. Kɛ ɔ ko wun i’n, ɔ niɛn i lika yɛ ɔ ukɛ i naan ɔ sɛ i sin i wun. (An kanngan Ezekiɛli 34:11, 12, 16 nun.) ?Zoova su uka ɔ kɛ ngalɛ’n sa wie? Ɛɛn-ɛn. I kpa bɔbɔ’n, kannganlɛ mɔ a su kanngan fluwa nga nun’n, ɔ kle kɛ a kunndɛ  kɛ á yó naan Zoova i klun jɔ ɔ wun. Zoova wunnin kɛ a ti sran kpa. I sɔ’n ti yɛ ɔ ukali wɔ maan a sili i, kpɛkun a kacili i sufuɛ wie-ɔ. Andɛ nin andɛ’n ɔ te wun kɛ a ti sran kpa, yɛ ɔ kunndɛ kɛ a sa ɔ sin asɔnun’n nun.

16. ?Ngue yɛ ɔ kwla uka sran kun naan w’a sɛ i sin Zoova wun-ɔn? (An nian foto’n wie.)

¹⁶ Fluwa pɛplɛpɛ Sa ɔ sin Zoova wun kan ndɛ kun m’ɔ wla fanngan kpa-ɔ. Ɔ se kɛ: “Sɛ a sa ɔ sin Zoova wun’n, ɔ́ sɔ́ ɔ nun klanman. Ɔ́ úka ɔ naan w’a kwla jran ngokɔɛ’n i ɲrun kekle. Sɛ Klistfuɛ kun bɔbɔ yɛ ɔ loli ɔ ngasi’n, Zoova yó maan ɔ́ sɔ́n ɔ nun. Asa ekun’n, ɔ́ úka ɔ maan ɔ klun akunndan’n su buman ɔ fɔ kun. Yɛ ɔ wla gúa ase. I sɔ’n yó maan á ɲán wunmiɛn naan a nin ɔ wiengu Klistfuɛ’m b’a su Ɲanmiɛn likawlɛ ekun.” Bu ndɛ sɔ’n i su akunndan. Asa ekun’n, maan ɔ wla kpɛn su kɛ asɔnun kpɛnngbɛn’m be kunndɛ kpa kɛ bé úka wɔ. Asɔnun kpɛnngbɛn’m be ti kɛ “fiawlɛ lika kun mɔ kɛ aunmuan’n fíta’n be kwla fia lɔ’n sa,” be ti kɛ “fiawlɛ lika kun mɔ kɛ nzue dan’n tɔ́’n be kwla fia lɔ’n sa.” (Eza. 32:2) Bu e ti kpɔlɛ tɛ’n i akunndan naan usa ɔ wun kɛ: “?Ngue yɛ n kwla yo i dɔ nga su naan e nin Zoova y’a ‘siesie e afiɛn-ɔn’?” (Eza. 1:18; 1 Piɛ. 2:25) Ninnge nga a kwla yo be’n i wie yɛle kɛ tran aɲia’m be nun kun bo Ɲanmiɛn sulɛ sua’n nun lɔ. Kpɛkun ko wun asɔnun kpɛnngbɛn kun wun naan se i kɛ a kunndɛ kɛ be uka wɔ naan a sa ɔ sin Zoova wun. Sɛ ɔ nin i fata’n, asɔnun kpɛnngbɛn sɔ’n kwla se aniaan kun kɛ ɔ kle wɔ Biblu’n nun like le nɲɔn kun. A kwla lafi su kɛ Zoova wá yrá ɔ ɲin mɔ a mian naan w’a kle kɛ a si e ti kpɔlɛ tɛ’n i su ye’n i su.

?NGUE YƐ Á YÓ-Ɔ?

17-18. ?Kɛ e Wla Kpɛnlɛ aɲia’n mántan koko’n, ngue yɛ e kwla yo-ɔ?

¹⁷ Zezi seli kɛ Ɲanmiɛn sunmɛnnin i kɛ ɔ wa yi e ti tɛ “naan sran kwlaa ng’ɔ kle kɛ ɔ lafi i su’n w’a mlinman, sanngɛ ɔ ɲan nguan m’ɔ leman awieliɛ’n.” (Zan 3:16) Zoova yoli sɔ naan w’a kwla de e sa tɛ nin wie’n be sa nun. Nán maan e nun wie fi e ɲin kpa like cinnjin sɔ m’ɔ yoli’n su. (Rɔm. 3:23, 24; 2 Kor. 6:1) Kɛ e Wla Kpɛnlɛ aɲia’n mántan koko’n, maan e fa blɛ e bu klolɛ mɔ Zoova nin Zezi be klo e’n i su akunndan. I sɔ’n úka e naan y’a kle kɛ e si ye.

¹⁸ ?Wafa sɛ yɛ a kwla kle kɛ a si ye-ɔ? Atrɛkpa’n, like nga á yó’n nin sran uflɛ liɛ’n su yoman kun. Sanngɛ a kwla lafi su kɛ Zoova yrá like nga ɔ bɔbɔ nin sran miliɔn kpanngban mɔ be kle kɛ ‘be timan be bɔbɔ be liɛ kun, sanngɛ be ti sran ng’ɔ wuli be ti’n i liɛ’n,’ bé yó’n i su.—2 Kor. 5:15