1-2. ?Ngue yɛ ɔ fata kɛ e yo naan y’a jran sa nga be tɔ e su’n be ɲrun kekle-ɔ? (An nian foto’n wie.)

 ?DƆ NGA su’n, sran wie yoli wɔ sa wie m’ɔ timan su-ɔ? ?Annzɛ Zoova mɔ a su i’n ti’n, ɔ osufuɛ’m be kle wɔ yalɛ annzɛ be tanndan ɔ ɲrun? ?Tukpacɛ wie kle ɔ yalɛ annzɛ kusu kpɛnngbɛn mɔ w’a yo’n ti’n a wunman ɔ wun fɛ? ?Annzɛ kusu ɔ awlɛn su sran wie w’a wu? Kɛ Zoova i sufuɛ sunman sa’n, atrɛkpa’n “ɲrɛnnɛn nin awlabɔɛ ngunmin” yɛ be o ɔ su-ɔ.—Jue. 90:10.

² Sɛ e waan é jrán sa nga be tɔ e su’n be ɲrun kekle’n, ɔ fata kɛ e bu be su akunndan kɛ ng’ɔ nin i fata’n sa. ?Ngue ti yɛ i sɔ’n ti cinnjin-ɔn? Sa nga be tɔ e su’n, be ti kɛ sa nga be kwla tɔ sran kun m’ɔ su cisan loto nun’n i su’n sa. Kɛ sran kun císan loto nun’n, sɛ like wie fite i ɲrun’n ɔ kwla kɔ bɛ su annzɛ fama su, annzɛ ɔ kwla kɔ blɛblɛ annzɛ kusu ɔ kwla jran kan, kɛ ɔ ko yo naan w’a siman like sɔ’n ti. Sanngɛ kɛ ɔ ko yo naan w’a fa ajalɛ ng’ɔ ti kpa’n, ɔ fata kɛ ɔ wun like ng’ɔ fite i ɲrun’n i weiin. Sɛ wlawla annzɛ nnɔtiɛ o loto’n i vitri’n su’n ɔ su kwlá wunman like sɔ’n. I wafa kunngba’n, kɛ ɔ ko yo naan y’a jran sa nga be tɔ e su’n be ɲrun kekle’n, ɔ fata kɛ e bu sa sɔ’m be su akunndan kɛ nga Zoova fa bu i’n sa. Like suanlɛ nga nun’n, é wá kán wafa ng’ɔ fata kɛ e bu sa nga be tɔ e su’n i ndɛ. I sin’n é wá wún kɛ sɛ e buman be su akunndan kɛ ɔ nin i fata’n sa’n i bo’n kwla gua tɛ. Kpɛkun kasiɛn su’n, é wá wún like nga e kwla yo naan y’a bu sa nga be tɔ e su’n be su akunndan kɛ ɔ nin i fata’n sa’n.

 WAFA NG’Ɔ FATA KƐ E BU SA NGA BE TƆ E SU’N

3. ?Ngue ti yɛ e kwlá yoman naan sa kekle’m b’a toman e su-ɔ?

³ E kwlá yoman naan sa kekle’m b’a tɔman e su mɛn tɛ nga nun. Kɛ mɔ fɔ o e nun mɔ Satan yɛ ɔ sie mɛn’n ti’n sa kekle’m bé tɔ́ e su titi. Asa’n, kɛ é mántan mɛn’n i awieliɛ’n i koko’n, nn lika’n yó tɛ trá laa. I wie yɛle kɛ sanvuɛsa’m be tɔ e su dan, yɛ sran’m be yo sa tɛtɛ dan. I kwlaa sɔ’n ti’n e wun e ɲrun. (Mat. 24:8; 2 Tim. 3:13) Sɛ Zoova yi ɲrɛnnɛn nga be o e su dɔ nga su’n, nn ɔ ti kɛ ɔ su uka Satan naan ɔ sie mɛn’n sa. Zoova su ukɛmɛn i kusu. Ɔ maan e leman i yowlɛ, saan é wún “ɲrɛnnɛn” mɛn nga nun.—Aku. 9:12.

4. ?Ngue ekun ti yɛ e wun ɲrɛnnɛn-ɔn?

⁴ Kɛ mɔ e su Klisi su’n ti’n, e wun ɲrɛnnɛn. Kpɛ sunman’n, Zezi seli i sɔnnzɔnfuɛ’m be kɛ bé wún ɲrɛnnɛn, afin be su i su. (Mat. 24:9; Zan 16:2) Kɛ mɔ e si sɔ’n ti’n, sɛ sa kekle tɔ e su’n, e yaciman Ɲanmiɛn i su lafilɛ. (1 Tes. 3:​3, 4) Kɛ e jran kekle kusu’n, e lafi su kɛ nguan m’ɔ leman awieliɛ’n i atin su yɛ e te nanti-ɔ. Asa’n, e kle kɛ Zoova sin yɛ e jran-ɔn naan Satan ti gblɛfuɛ. Kɛ Satan sáci Ɲanmiɛn i dunman’n ɔ seli kɛ klɔ sran’m be bɔbɔ be wun akunndan mɔ be bu’n i ti yɛ be su Ɲanmiɛn-ɔn. Kɛ ɔ ko yo naan Satan w’a kle kɛ i ndɛ yo fɛ’n, ɔ kle Zoova i sufuɛ’m be ɲrɛnnɛn kpa. (Zɔb. 1:​9-11) Sanngɛ kɛ e jran kekle’n, e kle kɛ klolɛ mɔ e klo Zoova’n i ti yɛ e su i-ɔ. Ɔ maan i klun jɔ e wun.—Ɲan. 27:11.

5. ?Ngue yɛ Akunndanfuɛ’n 7:​13, 14 kle e-ɔ? (An nian desɛn mun wie.)

⁵ Zoova yaci ɲrɛnnɛn’m be lɛ maan be tɔ e su. Zoova yoman sa tɛ le, yɛ ɔ faman sa tɛ saman e nianman. (Zak. 1:13) Sanngɛ famiɛn Salomɔn seli kɛ “kɛ lika’n yo tɛ’n” i sɔ’n wo “like nga Ɲanmiɛn Kpli yo’n” nun wie. (An kanngan Akunndanfuɛ’n 7:​13, 14 nun.) I sɔ’n kleman kɛ Ɲanmiɛn yɛ ɔ yo maan ɲrɛnnɛn’m be tɔ e su-ɔ. Sanngɛ ɔ yaci ɲrɛnnɛn’m be lɛ maan be tɔ e su. Ndɛ nga Salomɔn kannin’n kwla uka e naan y’a bu sa kekle nga be tɔ e su’n be su akunndan kɛ ɔ nin i fata’n sa. Maan e wun i wlɛ kɛ Satan i mɛn nga nun’n, cɛn wie’n lika’n ɔ́ yó kpa yɛ cɛn wie kusu’n, lika’n yó tɛ. Ɔ maan cɛn nga lika’n ti kpa’n maan e la Zoova i ase afin like kpakpa kwlaa fin i. Ndɛ nga Salomɔn kannin’n kpɛn e wla wie kɛ e ‘siman sa nga bé wá jú e ɲrun lɔ’n be nun wie fi.’ Ɔ maan sɛ lika’n yó kpa annzɛ ɔ́ yó tɛ’n e nun wie fi siman nun. Yɛ sa nga  e sunnzunman’n tɔ sran kpa mun nin sran tɛ’m be kwlaa be su.

6. ?Ngue ti yɛ Zoova yaci sa’m be lɛ maan be tɔ e su-ɔ? (Ebre Mun 12:​7, 11)

⁶ Sɛ e bu sa nga be tɔ e su’n be su akunndan kɛ ɔ nin i fata’n sa’n, é wún i wlɛ kɛ Zoova su kle e kɛ e lafi i su naan nán e lafi e bɔbɔ e wun su. Zoova i ɲin kpaman sa nga be o e su’n su, yɛ ɔ kle kɛ e ndɛ lo i naan ɔ klo kɛ ɔ́ úka e. Kannzɛ ɔ yaci e lɛ maan e nanti “kongo tuun kpa’n nun’n,” ɔ kle e atin, ɔ kle e kɛ ɔ klo e dan yɛ ɔ man e wunmiɛn naan y’a kwla jran kekle. (Jue. 23:4) Sa kekle nga be tɔ e su’n, be kwla uka e naan y’a wun nzuɛn ng’ɔ fata kɛ e fa be’n naan Zoova fanngan nun’n, e nzuɛn’n w’a yo kpa w’a tra laa’n. (An kanngan Ebre Mun 12:​7, 11 nun.) I wie yɛle Zɔbu liɛ’n. Ɔ wunnin i wlɛ kɛ ɔ fata kɛ ɔ yo wun ase kanfuɛ kpa. Nán Zoova yɛ ɔ fali ɲrɛnnɛn yili i Zɔbu su-ɔ. Sanngɛ ɔ yacili ɲrɛnnɛn sɔ’m be lɛ naan be tɔ i su naan w’a kle i ninnge cinnjin wie mun. (Zɔb. 42:​1-6) Kannzɛ sa nga be o e su’n be ti sɛ ti sɛ’n, e si kɛ Zoova úka e naan y’a “kwla sa sɔ’m be kwlaa kpan.”—Rɔm. 8:​35-39.

7. ?Kɛ be kle e yalɛ’n, ngue ti yɛ e kwla di aklunjɔɛ-ɔ?

⁷ Kɛ be kle e yalɛ’n e kwla di aklunjɔɛ. Sɛ Zoova mɔ a su i’n ti’n be kle ɔ yalɛ’n, nán bu i kɛ i klun jɔman ɔ wun ti-ɔ. I kpa bɔbɔ’n, kɛ be kle ɔ yalɛ’n i sɔ’n kle kɛ i klun jɔ ɔ wun. (Mat. 5:​10-12) Kɛ akoto’m be liɛ’n sa’n, sɛ a bu yalɛ mɔ be kle wɔ’n i su akunndan kɛ ng’ɔ nin i fata’n sa’n, á kwlá dí aklunjɔɛ. (Yol. 5:​40-42) Asa kusu’n, sɛ a jran kekle’n, i sɔ’n kwla uka be nga be suman Zoova naan b’a si Zoova i su ndɛ naan ‘b’a mɛnmɛn i.’ (1 Piɛ. 2:12) Kɛ Zozɛfu liɛ’n sa’n, Zoova minndɛman kɛ sa’m be wie e su naan w’a yra e su.—Bob. 39:​3, 23

8. ?Ngue yɛ sɛ e bu i akunndan’n, é kwlá trá e awlɛn lele i awieliɛ-ɔ?

⁸ Cɛn wie lele’n sa nga be o e su’n, bé wíe. Zɔbu i su ndɛ’n kle e kɛ sa nga be tɔ e su’n bé wíe cɛn kun. Biblu’n se kɛ: “Zɔbu i agualiɛ su’n, Zoova wa yrɛli i su dan trɛli i bo bolɛ’n nun’n.” (Zɔb. 42:12) I wafa kunngba’n, Zoova  tali e nda kɛ e mɛn dilɛ’n “i agualiɛ su’n,” yɛle kɛ mɛn uflɛ nun lɔ’n ɔ́ yrá e su dan. Andɛ’n, e nguan’n ti kpe kan yɛ ɔ ti afɛ ngunmin. Sanngɛ mɛn uflɛ nun lɔ’n, é ɲán nguan mɔ leman awieliɛ’n. Sɛ e tinuntinun e bu i sɔ’n liɛ’n i akunndan’n, é kwlá trá e awlɛn lele i awieliɛ.—Mat. 24:13.

SƐ E BUMAN BE SU AKUNNDAN KƐ Ɔ NIN I FATA’N SA’N I BO’N KWLA GUA TƐ

9. ?Ngue ti yɛ sɛ e buman akunndan ng’ɔ nin i fata’n i bo’n kwla gua tɛ-ɔ?

⁹ Sɛ sa wie tɔ e su naan e bumɛn i su akunndan kɛ ng’ɔ nin i fata’n sa’n, i bo’n kwla gua tɛ. Wie liɛ’n bɔbɔ’n e kwla bu i kɛ Zoova ti yɛ sa sɔ’n tɔli e su-ɔ. I wie yɛle Zɔbu i liɛ’n. Kɛ sa kekle’m be tɔli i su’n ɔ buli i kɛ Zoova ti yɛ sa sɔ’m be tɔli i su-ɔ. Yɛ ɔ buli i kɛ “i bɔbɔ yo sa i nuan su sɛsɛ tra Ɲanmiɛn.” (Zɔb. 32:2) Naomin kusu buli i kɛ Zoova ti yɛ sa kekle’m be tɔli i su-ɔ. (Rit. 1:​13, 20, 21) Sɛ ɔ ti kɛ Zɔbu nin Naomin b’a kaciman akunndan nga be bu’n sa’n, nn be nin Zoova be afiɛn sacili. (Ɲan. 19:3) Zoova ukali be naan b’a wun i wlɛ kɛ nɛ́n i ti yɛ be wun ɲrɛnnɛn-ɔn, yɛ ɔ yrali be su afin be nin i be nantili klanman.

10. ?Kɛ sa kekle’m be tɔ e su’n akunndan benin yɛ e kwla bu-ɔ?

¹⁰ Kannzɛ e si kɛ nán Zoova ti yɛ e wun ɲrɛnnɛn’n, sanngɛ e kwla bu i kɛ e ndɛ lomɛn i. Sɛ e bu i sɔ’n, ɔ cɛman naan e sa sin w’a bubu e. (Ɲan. 24:10) Sa kekle wie’m be tɔli famiɛn Davidi nin Ɲanmiɛn nuan ijɔfuɛ Abakiki be su. Ɔ maan blɛ wie nun’n be usali be wun sɛ Zoova tie be srɛlɛ mun-o. (Jue. 10:1; Aba. 1:2) Ɔ nin i sɔ ngba’n b’a yaciman Ɲanmiɛn srɛlɛ. Zoova tɛli be srɛlɛ’n su yɛ ɔ suannin be bo. Ɔ́ yó i sɔ’n wie mán e.—Jue. 10:17.

11. ?Sɛ e buman sa nga be tɔ e su’n be su akunndan kɛ ɔ nin i fata’n sa’n, sa benin yɛ ɔ kwla ju-ɔ?

¹¹ Sɛ e buman sa nga be tɔ e su’n be su akunndan kɛ ɔ nin fata’n sa’n, sa wie’m be kwla bo e nuan. Afin e kwla bu i kɛ ɔ fataman kɛ Zoova yaci e lɛ naan sa kɛ ngalɛ sa’m be tɔ e su. (1 Piɛ. 4:12) Kɛ Zezi seli i sɔnnzɔnfuɛ’m be kɛ sran’m bé klé i ɲrɛnnɛn’n, b’a bumɛn i kɛ i sɔ sa’n kwla ju sakpa. (Lik. 18:​33, 34) Kannzɛ Zezi kannin ɲrɛnnɛn ng’ɔ́ wá wún i’n i ndɛ kleli be’n sanngɛ akoto Piɛli buli i aɔwi ndɛ. Zezi si kɛ akunndan nga Piɛli bu’n kwla yo maan i bɔbɔ i ɲin kpa Ɲanmiɛn i klun sa yolɛ’n su. I sɔ’n ti’n, ɔ ijɔli Piɛli. (Mar. 8:​31-33) Kɛ be kunnin Zezi bɔbɔ’n, i sɔnnzɔnfuɛ’m b’a kaman lɛ b’a wunman sa nga ti yɛ be kunnin i’n i wlɛ. Ɔ nin i sɔ’n ngba’n Zezi w’a yaciman be ukalɛ. Kɛ ɔ cɛnnin nguan m’ɔ nin be kókó yalɛ’n, ‘ɔ yiyili Ɲanmiɛn Ndɛ’n nun weinwein kpa kleli be.’ I sɔ’n ukali be naan b’a wun sa nga ti yɛ be kunnin i’n i wlɛ. (Lik. 24:​25-27, 32, 44-48) Sɛ Zezi i sɔnnzɔnfuɛ’m be bu like nga Zezi kleli be’n i su akunndan’n, i sɔ’n kwla uka be naan b’a buabua be wun b’a sie. I liɛ’n kɛ bé wá klé be yalɛ’n bé kwlá jrán kekle. Maan e kusu e bu sa kekle nga be kwla tɔ e su’n be su ndɛ nga Biblu’n kan’n be su akunndan. I sɔ’n kwla uka e naan y’a buabua e wun y’a sie.

12. ?Sɛ e buman sa nga be tɔ e su’n be su akunndan kɛ ɔ nin i fata’n sa’n, akunndan benin yɛ e kwla bu-ɔ?

¹² Sɛ e buman sa nga be tɔ e su’n be su akunndan kɛ ɔ nin i fata’n sa’n, e kwla bu i kɛ sa ng’ɔ o e su’n ɔ ti tɛ dan kusu nn nɛ́n i sɔ-ɔ. Viɲin fie’n i nun junman difuɛ’m be su ɲanndra nga Zezi buli’n, ɔ kle sɔ. Junman difuɛ wie’m be plannin, afin be bu i kɛ awlobo kpɛn’n buli be lufle. Sanngɛ ɔ seli be nun kun kɛ: “Janvuɛ, m’an diman wɔ lufle.” (Mat. 20:​10-13) Nán kɛ bian’n buli be  lufle-ɔ, sanngɛ akunndan nga be buli’n m’ɔ timan su’n, i ti yɛ be plannin-ɔn. Andɛ’n, aniaan wie’m be bu akunndan kɛ ngalɛ’n sa wie. Sɛ b’a manman be junman wie anuannzɛ’n nun’n, annzɛ sɛ be se be kɛ be yaci junman kun dilɛ’n, ɔ ti kɛ b’a bu be lufle sa. ?Ninnge trele benin mun yɛ e kwla yo be naan y’a bu e su sa’m be su akunndan kɛ ng’ɔ nin i fata’n sa-ɔ?

KƐ SA’M BE TƆ E SU’N, NINNGE NGA E KWLA YO BE’N

13. ?Kɛ sa kekle tɔ e bɔbɔ e su’n, sa benin yɛ ɔ kwla ju-ɔ?

¹³ A si sa nga be tɔ e su’n be su ndɛ nga Biblu’n kan’n. Yɛ atrɛkpa’n w’a bo ndɛ sɔ’n su w’a kle sran kun mɔ sa kekle tɔli i su’n i le. Sanngɛ kɛ sa’m be tɔ ɔ bɔbɔ su’n, kɛ ɔ yo naan a bu be su akunndan kɛ ɔ nin i fata’n sa’n, ɔ kwla yo kekle. I wie yɛle kɛ a kwla bu i kɛ Zoova yɛ ɔ su tu ɔ fɔ-ɔ. Annzɛ a kwla bu i kɛ ɔ tieman ɔ srɛlɛ mun. ?Sɛ i sɔ akunndan’n ba ɔ ti nun’n, ngue yɛ a kwla yo-ɔ?

14. ?Kɛ sa kekle o e su’n, ngue yɛ e kwla kɛn i ndɛ e srɛlɛ’n nun-ɔn? (Filipufuɛ Mun 4:13)

¹⁴ Srɛ Zoova naan ɔ uka ɔ. Kan sa ng’ɔ o ɔ su’n ɔ nin wafa nga ɔ wun yo wɔ’n kle Zoova. A kwla bo like nga a klo kɛ Zoova yo man wɔ’n su kle i. A kwla srɛ i naan ɔ fɛ i wawɛ’n man wɔ, yɛ ɔ man ɔ ngwlɛlɛ naan w’a kwla jran kekle. Nán ɔ wla fi su kɛ wie liɛ’n wafa nga Zoova tɛ́ ɔ srɛlɛ’n su’n, ɔ kwla bo ɔ nuan bɔbɔ. (Efɛ. 3:20) Asa’n, ɔ kwla sin anzi mun annzɛ aniaan’m be lika suan ɔ bo. (Jue. 34:7) I sɔ’n ti’n like kwlaa ng’ɔ yo man wɔ’n, sɔ nun klanman. A kwla lafi su kɛ Zoova fɛ́ i wawɛ’n mán wɔ naan w’a kwla jran sa kwlaa nga be tɔ ɔ su’n be ɲrun kekle.—An kanngan Filipufuɛ Mun 4:13 nun.

15. ?Ngue yɛ ɔ kwla uka e naan y’a jran sa nga be tɔ e su’n be ɲrun kekle-ɔ? (An nian foto’n wie.)

¹⁵ Nán yaci ninnge nga e yo be naan e nin Zoova e afiɛn w’a mantan kpa’n be yolɛ. Kannzɛ bɔbɔ’n a kwlá yoman ninnge nga e yo be titi Ɲanmiɛn sulɛ nun’n be kwlaa’n, mian ɔ ɲin yo ɔ liɛ nga a kwla yo’n. Kɛ “ɲrɛnnɛn nin sa kekle’m” be tɔ e su’n, yo like kwlaa nga a kwla yo naan ɔ akunndan’n w’a tran Zoova nin i nuan ndɛ’n be su’n. (Jue. 119:143) I sɔ’n ti’n, kanngan Biblu’n nun cɛn kwlakwla, suan nun like yɛ bu su akunndan. Mian ɔ ɲin bo jasin fɛ’n i kpa, tran aɲia’m be bo yɛ tɛ kosan’m be su aɲia’m be bo. Fa ɔ wun mantan aniaan mun. Nán se kɛ á trán ɔ liɛ ngunmin.—Ɲan. 18:1.

16. (1) ?Kɛ sa kekle’m be tɔ e su’n, akunndan benin yɛ e kwla bu-ɔ? (2) ?Yɛ ngue yɛ e kwla yo naan y’a kpalo akunndan sɔ mun-ɔn? (2 Korɛntifuɛ Mun 10:​4, 5)

 ¹⁶ Fa Biblu’n nun ndɛ’n su naan ɔ akunndan’n w’a yoman nɲɔnnɲɔn. Kɛ sa kekle’m be tɔ e su’n, wie liɛ’n e bɔbɔ e wun akunndan nga e bu’n annzɛ Zoova i wun akunndan nga e bu’n, ɔ timan su. ?É yó sɛ naan y’a kpalo akunndan sɔ’n? (An kanngan 2 Korɛntifuɛ Mun 10:​4, 5 nun.) Ɔ fata kɛ e kanngan Biblu’n nun nin fluwa nga Anuannzɛ yili be’n be nun naan y’a wun akunndan nga Ɲanmiɛn bu’n i wlɛ. Wienun-ɔn, a lafiman su kpa kɛ Zoova i klun jɔ ɔ wun. ?Sɛ ɔ ti sɔ’n ngue yɛ a kwla yo-ɔ? A kwla bu akoto Pɔlu i su ndɛ’n i su akunndan. Kɛ ɔ́ bó jasin fɛ’n, sa kekle kpanngban be tɔli i su. Sanngɛ sa sɔ’m be ukɛli naan w’a wun i wlɛ kpa kɛ Ɲanmiɛn i klun jɔ i wun. (2 Kor. 11:​23-27) ?A usa ɔ wun sɛ Zoova yacili sa tɛ nga a yoli be laa’n cɛli wɔ? ?Sɛ ɔ ti sɔ’n ngue yɛ a kwla yo-ɔ? Biblu’n nun ndɛ mma nga be kle kɛ Zoova yaci e sa tɛ mun cɛ e’n, a kwla klɛ be sie. (Eza. 43:25) Kpɛkun kanngan be nun yɛ bu be su akunndan. (Jue. 119:97) Atrɛkpa kusu’n ɲrɛnnɛn wie m’ɔ tɔli ɔ su’n ti’n, a lafiman su kpa kɛ Zoova sɛsɛ i sufuɛ mun. Sɛ ɔ ti sɔ’n, nian e fluwa’m be nun naan wun sa nga ti yɛ Zoova yaci sa tɛ mun mɔ be tɔ i sufuɛ’m be su’n ɔ nin wafa ng’ɔ sasa be’n be wlɛ kpa. (Jue. 91:​9-12) Asa’n, kanngan aniaan wie mɔ ɲrɛnnɛn tɔli be su mɔ be jrannin kekle’n be su ndɛ’n nun. a

17. ?Kɛ sa kekle tɔ e su’n, ngue yɛ ɔ fata kɛ e yo-ɔ?

¹⁷ Atrɛkpa’n sa kekle nunman ɔ su dɔ nga su. Ɔ maan lika’n ti kpa ɔ su. Sɛ ɔ ti sɔ’n la Zoova i ase, yɛ fa blɛ bu i aklunye’n i su akunndan. (Aku. 7:14) Sanngɛ kɛ sa kekle tɔ ɔ su’n bu su akunndan kɛ ɔ nin i fata’n sa, yɛ fa ɔ wla kwlaa guɛ i Zoova su kpa titi. Sɛ a yo sɔ’n, Zoova ‘fá ajalɛ naan w’a kwla jran kekle.’ (1 Kor. 10:13) ?Yɛ e niaan’m be li? ?Kɛ sa’m be tɔ be su’n, wafa sɛ yɛ e kwla uka be naan b’a jran kekle-ɔ? Like suanlɛ ng’ɔ́ bá lɛ’n wá yíyí nun.