Sunnzun ase kpanngban be o Biblu’n nun. Sanngɛ be nga be kanngan Biblu’n nun’n be nun sunman be wunman sunnzun ase sɔ’m be bo. (Mat. 13:13) ?Ɔ maan ngue yɛ ɔ kwla uka ɔ naan w’a wun sunnzun ase nga be o Biblu’n nun’n be bo-ɔ? Ajalɛ nga’m be kwla uka wɔ kpa.

• Bu sa nga be kɛn i ndɛ’n, ɔ nin like nga be fa sunnzun sa sɔ’n be akunndan. I wie yɛle kɛ, Sa Nglo Yilɛ 3:3 nun’n, be fa Zezi i balɛ’n be fa sunnzun awiefuɛ’n i balɛ’n.

• Bu wafa nga sa nga be kɛn i ndɛ’n, ɔ nin like nga be fa sunnzun sa sɔ’n be fa be wun’n i akunndan. Mian ɔ ɲin naan wun sa nga ti yɛ be fali like kun be fa sunnzunnin like uflɛ’n i wlɛ.

• Wun like nga sunnzun ase sɔ’n kle’n i wlɛ kpa. Sunnzun ase wie’m be o lɛ’n, sɛ y’a nianman e wun kpa’n, e su wunman like nga be kle’n i bo kɛ ng’ɔ nin i fata’n sa. I wie yɛle Zezi i balɛ’n mɔ be fa sunnzunnin awiefuɛ’n i balɛ’n. Sunnzun ase sɔ’n kleman kɛ Zezi bá naan ɔ́ wá wúa sran mun. Sanngɛ i bo’n yɛle kɛ Zezi i balɛ’n ɔ́ fú sran’m be nun, kɛ nga awiefuɛ’n i balɛ’n ɔ fu sran’m be nun’n sa.