E Yifuɛ’n ti’n e wla o like kpa kun su
Ɲanmiɛn waan cɛn wie lele’n, ɔ́ wá yó ninnge kpakpa wie mun mán e. Ɔ́ yó mán ɲrɛnnɛn kwlaa wíe yɛ sran’m bé trán asiɛ m’ɔ́ wá káci lika klanman’n i su. (Jue Mun 37:11) ?Ndɛ sɔ’n kpɛ́n su sakpa? Ɛɛn, afin “nán klɔ sran yɛle Ɲanmiɛn naan w’a bua ato.” (Kalɛ 23:19) Maan e fa e ɲin e sie i ninnge kpakpa nga e Yifuɛ’n wá yó mán e’n be nun wie’m be su.
Ɲanmiɛn wá núnnún klunwifuɛ mun
“Maan klunwifuɛ’m be nyin kɛ ijre sa, maan sa tɛ yofuɛ’m be kwlaa be kpuke kɛ waka nnyrɛ sa, sanngɛ bé núnnún mlɔnmlɔnmlɔn.”—JUE MUN 92:8.
Ndɛ ng’ɔ sinnin lɛ nun’n, e wunnin i kɛ sa tɛtɛ’m b’a sɔn mɛn’n nun. Sanngɛ ɔ fataman kɛ i sɔ’n bo e nuan. Afin 2 Timote 3:1-5 nun’n, Biblu’n se kɛ “mɛn’n i awieliɛ blɛ’n” nun’n sran’m be nzuɛn’n yó tɛ trá laa’n. ?Sanngɛ mɛn benin ndɛ yɛ be kan-ɔn? Mɛn sɔ’n yɛle be nga be nantiman Ɲanmiɛn i mmla’m be su’n. Ɔ ka kan’n, Ɲanmiɛn wá núnnún be nga be kunndɛman kɛ bé káci be ayeliɛ’n. Kɛ Ɲanmiɛn wá yó sɔ’n, be nga be nanti i mmla’m be su’n be ngunmin cɛ yɛ bé ká asiɛ’n su-ɔ. Biblu’n se kɛ: “Mɛn’n ɔ́ yó sran kpa’m be liɛ. Bé trán nun tititi.”—Jue Mun 37:29.
Ɲanmiɛn wá núnnún Satan
“Ɲanmiɛn m’ɔ man alaje’n ɔ́ wá kpɔ́tɔ Satan.”—RƆMUNFUƐ MUN 16:20.
Kɛ Ɲanmiɛn wá núnnún Satan nin i mmusu mun nin klunwifuɛ’m be kwlaa’n, fɔundi trán asiɛ’n su. E Yifuɛ’n seli kɛ: ‘Sran fi su wlaman e nyin nglonglo kun.’—Mise 4:4.
Ɲanmiɛn wá núnnún tukpacɛ’n nin wie’n
“Ɲanmiɛn i tannin sua’n wo klɔ sran’m be afiɛn. [...] Ɔ́ núnnún be ɲinmuɛn’n kwlaa, wie’n su tranman lɛ kun, be su yoman sɛ kun, be su sunman kun, be su wunman ɲrɛnnɛn kun.”—SA NGLO YILƐ 21:3, 4.
Ɲanmiɛn wá yó maan sa nga Satan nin Adan nin Ɛvu ɔ nin klɔ sran mɔ fɔ o be nun’n be kpɛli be ba’n bé wíe. I sɔ’n ti’n, tukpacɛ’n nin ɲrɛnnɛn kwlaa bé wíe. Kpɛkun “wie’n su tranman lɛ kun.” Ɔ maan be nga be ɲin yi Ɲanmiɛn mɔ be klo i’n, bé trán nguan nun tititi. ?Sanngɛ nin yɛ sran sɔ’m bé trán-ɔn?
E Yifuɛ’n yó maan asiɛ’n káci lika klanman
“Maan aawlɛ flɛnnɛn’n nin asiɛ’n m’ɔ yoman like ye’n, be klun jɔ. Maan aawlɛ flɛnnɛn’n i wun kpɛjɛ i, maan i nun ijre’m be bo nɲrɛ.”—EZAI 35:1.
Kɛ Ɲanmiɛn wá núnnún klunwifuɛ mun’n, ɔ́ wá yó maan asiɛ’n káci lika klanman. Lika kwlaa yó klanman yɛ é ɲán aliɛ kaka é dí. (Jue Mun 72:16) Jenvie’n nin fɛtɛ mun nin nzue ba’m be kwlaa bé yó sanwun. Kpɛkun nnɛn nga be tran nun’n bé sɔ́n kpa. E tinuntinun é kplán e sua mun kpɛkun é trán nun. Sran fi su laman gua su kun, sran fi su fɛmɛn i klun awe laman kun, yɛ sran fi su diman yalɛ kun.—Ezai 65:21, 22.
Ɲanmiɛn wá cɛ́n be nga be wuli’n be nguan
“Be nga be yoli sa kpa-o, be nga b’a yoman sa kpa-o, bé cɛ́n.”—SA NGA BE YOLI’N 24:15.
?A kunndɛ kɛ á wún ɔ fuɛ nga be wuli’n ekun? Ɲanmiɛn Kpli wá cɛ́n be nguan yɛ bé wá trán asiɛ m’ɔ́ wá káci lika klanman’n i su. Á wún be wlɛ, yɛ be kusu bé wún ɔ wlɛ wie. Bu aklunjɔɛ nga amún wá dí i blɛ sɔ’n nun’n i akunndan kan nian. ?E kwla lafi ndɛ sɔ’n su? Ɛɛn, afin Biblu’n kan sran wie mɔ Ɲanmiɛn maan Zezi cɛnnin be nguan’n be ndɛ. Be nun wie’m be ti kpɛnngbɛn yɛ wie’m be ti bakan. Kpɛ sunman’n, Ɲanmiɛn cɛnnin be sran kpanngban be ɲrun lɛ.—Liki 8:49-56; Zan 11:11-14, 38-44.
Ninnge wie mɔ be kwla yo ɔ fɛ ekun'n
AN TINNGE!
Mɛn’n w’a yo kekle: Nán ɔ sa sin bubu wɔ
Biblu’n kwla uka e naan y’a jran e su sa’m be ɲrun kekle naan y’a lafi like kpa kun su.
KOSAN MƆ BIBLU’N TƐ BE SU’N
?Ngue yɛle sran cɛnlɛ’n?
Atrɛkpa’n, kɛ be kan be nga bé wá cɛ́n be’n be ndɛ’n i sɔ’n bo ɔ nuan.
NINNGE CINNJIN NGA BIBLU’N KLE BE’N
?Be nga be wuli’n be o nin?
Biblu’n kan kɛ blɛ kun wá jú’n sran’m be cɛn nguan kɛ nga Lazaa fa cɛnnin nguan’n sa.
KOSAN MƆ BIBLU’N TƐ BE SU’N
?Ngue yɛ e kwla fa e wla gua su-ɔ?
Like kpa kun kwla uka e dɔ nga su yɛ ɔ kwla yo maan é láfi su kɛ e ɲrun lɔ’n yó kpa.
