Andɛ’n, sran’m be yoman ninnge’m be kɛ nga Ɲanmiɛn fa sunnzunnin’n sa. Sɛ ɔ ti kɛ sran’m be yo ninnge’m be kɛ nga Ɲanmiɛn fa klo’n sa’n, nn bé kplín su kɛ ɔ sie be, bé kló i yɛ bé níɛn i ayeliɛ’n su. Asa ekun’n, be nin be wiengu’m bé trán klanman, bé tá be mma’m be kɛ ng’ɔ nin i fata’n sa, bé súan ninnge uflɛ wie’m be yolɛ kpɛkun bé yó maan asiɛ wunmuan’n káci mɛn klanman.

• “Kɛ ɔ fɛ i lele b’ɔ́ fá jú mɛn’n i awieliɛ lɔ’n, w’a yo maan alɛ kunlɛ’n w’a wie.”​—Jue Mun 46:10.

• “Blɛ nga á núnnún be nga be saci asiɛ’n w’a ju.”​—Sa Nglo Yilɛ 11:18.

• “Zerizalɛmfuɛ’n wie fi su seman kɛ: ‘N kpinndinman.’”​—Ezai 33:24.

• “Min sran kpa’m bé dí be bɔbɔ be sa nuan ninnge’m be su.”​—Ezai 65:22.

?Wafa sɛ yɛ Biblu’n nun ndɛ mma sɔ’m bé kpɛ́n su-ɔ? Ɲanmiɛn kpɛli i Wa Zezi kɛ ɔ sie nglo nin asiɛ’n. (Daniɛl 2:44) Biblu’n kan Zezi i ndɛ se kɛ: ‘Ɲanmiɛn Zoova wá fá [...] famiɛn bia’n mɛ́n i. Ɔ́ síe Zakɔbu i awlo’n.’​—Liki 1:32, 33.

I nun nga Zezi o asiɛ’n su wa’n, ɔ yoli abonuan sa kpanngan fa kleli kɛ kɛ ɔ́ wá síe sran mun’n, be liɛ yó ye trá andɛ.

• Zezi yoli sran wie mɔ tukpacɛ wafawafa kwlaa kle be yalɛ’n be juejue. I sɔ’n yi like nga cɛn wie lele ɔ́ yó mán klɔ sran mun’n, i nglo.​—Matie 9:35.

• Zezi yoli maan jenvie’n yacili bolɛ. I sɔ’n kle kɛ ɔ kwla sasa klɔ sran mun naan ninnge kɛ nzue m’ɔ tɔ di lika sa’n, annzɛ aunmuan m’ɔ tu saci lika’n b’a yoman be abɔlɛ.​—Marki 4:36-39.

• Zezi mannin sran akpiakpi be like be dili. I sɔ’n kle kɛ ɔ kwla fa ninnge nga sran’m be sa mian be wun’n man be.​—Marki 6:41-44.

• Zezi yoli maan nzue kacili duvɛn. I sɔ’n kle kɛ ɔ kwla yo maan sran’m be di aklunjuɛ.​—Zan 2:7-11.

?É yó sɛ naan y’a ɲan nguan nga Ɲanmiɛn kunndɛ kɛ ɔ́ fá mán be nga be klo i mun-ɔn? Sɛ e kunndɛ kɛ é ɲán nguan sɔ’n wie’n, ɔ fata kɛ e fa “atin” kun su. Biblu’n kan atin sɔ’n i ndɛ se kɛ: ‘i awieliɛ’n yɛle nguan’n. Yɛ be nga be wun i’n, b’a sɔnman.’​—Matie 7:14.

?Nguan kpafuɛ’n i atin’n yɛle benin? Ɲanmiɛn seli kɛ: “Min Anannganman bɔ n ti amun Nyanmiɛn’n, n kle amun like, amun bɔbɔ amun kpa yolɛ ti yɛ n kle amun-ɔn. Min yɛ n kle amun atin ng’ɔ fata kɛ amun sin nun nin-ɔn.” (Ezai 48:17) Sɛ e fa atin nga Ɲanmiɛn kle e su’n, e liɛ yó ye.

Zezi seli kɛ: “Min yɛ n ti atin’n nin nanwlɛ’n nin nguan’n niɔn.” (Zan 14:6) Sɛ e nanti like nga Zezi kleli’n su’n naan e niɛn i ajalɛ’n su’n, e nin Ɲanmiɛn e afiɛn mántan yɛ é dí aklunjuɛ.

 ?É yó sɛ naan y’a wun nguan kpafuɛ’n i atin’n? Andɛ’n, asɔnun’n b’a sɔn. Sanngɛ Zezi seli kɛ: “Nán be kwlaa nga be flɛ min kɛ, ‘Min Min, min Min’ yɛ bé wlú ɲanmiɛn su lɔ Famiɛn diwlɛ’n nun-ɔn. Sanngɛ sran ng’ɔ yo min Si m’ɔ o ɲanmiɛn su lɔ’n i klun sa’n, i sɔfuɛ’n yɛ ɔ kwla wlu lɔ-ɔ. (Matie 7:21) Ɔ seli ekun kɛ: “Be ayeliɛ’n yɛ amún fá wún be wlɛ-ɔ.” (Matie 7:16) Biblu’n kwla uka e naan y’a wun ngbaciɛ ng’ɔ o Ɲanmiɛn i sulɛ kpafuɛ’n ɔ nin ng’ɔ timan su’n be afiɛn.​—Zan 17:17.

?É yó sɛ naan y’a fa nguan atin’n su-ɔ? I sɔ yolɛ nun’n, ɔ fata kɛ e si sran ng’ɔ man nguan sɔ’n. I lɛ nun’n, e kwla usa e wun kɛ: ?Wan yɛle sran sɔ’n? ?Be flɛ i sɛ? ?I nzuɛn’n ti sɛ? ?Ngue yɛ i waan ɔ́ yó mán e-ɔ? ?Ngue yɛ ɔ kunndɛ kɛ e bɔbɔ e yo-ɔ? *

Ɲanmiɛn kunndɛ kɛ sran’m be yo ninnge wie mun. I wie yɛle junman dilɛ, nin aliɛ dilɛ, nin be ɲin su yiyilɛ yɛ bla nin bian jalɛ. Sanngɛ nɛ́n i ngba-ɔ. Ɔ kunndɛ kɛ e si i naan e nin i tra janvuɛ. Kpɛkun e yi i nglo kɛ e klo i, yɛle kɛ e yo i klun sa. Zezi seli kɛ: “Kɛ ɔ ko yo naan b’a ɲan nguan m’ɔ leman awieliɛ’n, ɔ ti cinnjin kɛ be si wɔ mɔ ɔ kunngba cɛ yɛ a ti Ɲanmiɛn’n.”​—Zan 17:3.

Sɛ e waan é sí Ɲanmiɛn’n, ɔ fata kɛ e kaci e sa ninnge wie’m be yolɛ nun. Ɔ kwla yo e kɛ i sɔ yolɛ’n ti kekle sa. Sanngɛ sɛ e mian e ɲin e yo sɔ’n, é ɲán su ye. Sɛ a kunndɛ kɛ á sí Ɲanmiɛn i su ndɛ cinnjin wie mun’n, Zoova i Lalofuɛ’m be kwla kle ɔ Biblu’n nun like lika nin dɔ nga a klo’n su. A su tuɛmɛn i ti sika. Sɛ a kunndɛ kɛ á wún Zoova i Lalofuɛ nga be o amun asa liɛ’n su lɔ’n, kɔ e ɛntɛnɛti adrɛsi www.jw.org su.