LALAFUƐ nun’n, sran ng’ɔ ti like sunianfuɛ’n ɔ niɛn i min’n i awlo’n nun junman’n nin i ninnge onga’m be su.

I nun nga Zakɔbu i wa Zozɛfu ti kanga Ezipti lɔ’n, ɔ kacili like sunianfuɛ i min’n i awlo’n nun. Yɛle kɛ i min’n “fɛli i awlo’n nin i bo ninnge mun kwlaa mɛnnin i kɛ ɔ nian be su.” (Bob. 39:2-6) I sin’n, kɛ Zozɛfu wa kacili Ezipti nvle’n i su kpɛn kun’n, ɔ fali sran kun kɛ ɔ niɛn i awlo’n nin i bo ninnge’m be su.—Bob. 44:4.

Zezi blɛ su’n, be nga be le asiɛ’n, be fa sran wie’m be kɛ be nian be junman difuɛ wie’m be su. Afin be bɔbɔ be tran be fie’m be wun mmua. Sran sɔ’m be nian be min’m be fie’m be su junman kwlaa nga sran’m be di’n be su. Yɛ be yo maan junman difuɛ’m be nian nun be di be junman’n i kpa.

?Wan yɛ ɔ kwla di like sunianlɛ junman’n niɔn? Klisifuɛ klikli’m be blɛ su’n, Rɔmun lɔ fluwa sifuɛ kun m’ɔ suan Kolumela’n seli kɛ: “Kanga nga i min’n fɛ i kɛ ɔ niɛn i ninnge’m be su’n, ɔ ti sran kun m’ɔ kleli kɛ ɔ si i junman’n i di kpa-ɔ. Kpɛkun ɔ fata kɛ ɔ yo maan junman difuɛ’m be di be junman’n i kpa. Kusu ɔ fataman kɛ ɔ yo be tɛtɛ.” Ɔ kan guali su kɛ: “Ɔ fataman kɛ like sunianfuɛ kun se i wun kɛ ɔ si ninnge ngba yo. Sanngɛ maan ɔ kplin su kɛ be kle i like.”

Ɲanmiɛn Ndɛ’n fa junman nga Klisifuɛ’m be di i asɔnun’n nun’n sunnzun like sunianfuɛ’m be junman nga be di’n. Akoto Piɛli seli kɛ kɛ mɔ Klisifuɛ’m be ti Ɲanmiɛn i junman difuɛ’n ti’n, maan be fa like nga Ɲanmiɛn fa mannin be’n yo be wiengu’m be ye.—1 Piɛ. 4:10.

Liki ndɛ tre 16 i mma 1 lele 8 nun’n, Zezi fali like sunianfuɛ’n i su sunnzun ase kannin ndɛ. Kɛ Zezi kɛ́n i balɛ’n i ndɛ’n, ɔ seli i sɔnnzɔnfuɛ’m be kɛ ɔ́ wá kpá “like sunianfuɛ nanwlɛfuɛ m’ɔ si ngwlɛlɛ’n” kɛ ɔ niɛn i ninnge’m be su. Yɛ junman cinnjin kpafuɛ ng’ɔ fata kɛ sran akpasua sɔ’n di’n, yɛle kɛ ɔ man Zezi i sɔnnzɔnfuɛ’m be aliɛ mɛn’n i awieliɛ blɛ’n nun. (Mat. 24:45-47; Lik. 12:42) Kɛ e o be nga like sunianfuɛ nanwlɛfuɛ m’ɔ si ngwlɛlɛ’n yi fluwa man be’n be nun wie’n, ɔ yo e fɛ dan.