Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

?Ngue yɛ é yó naan e wla w’a gua ase-ɔ?

?Ngue yɛ é yó naan e wla w’a gua ase-ɔ?

MƐN’N i nun tranlɛ’n ti kekle. I sɔ’n ti’n, kɛ ɔ yo naan e wla gua ase titi’n, ɔ timan pɔpɔ. Ɔ ju wie’n, e wla gua ase kan, sanngɛ ɔ cɛman. ?Ndɛ benin yɛ Biblu’n kan m’ɔ kwla uka e naan e wla w’a gua ase-ɔ? ?Wafa sɛ yɛ e kwla uka e wiengu mun naan be kusu be wla w’a gua ase-ɔ?

?NGUE YƐ Ɔ FATA KƐ E YO-Ɔ?

Sɛ e nin sran kpa mun e san nun, naan e fa e wun e mantan Ɲanmiɛn’n, e wla gúa ase. ?Wafa sɛ yɛ e kwla yo sɔ-ɔ?

E kpa yolɛ ti yɛ Zoova mannin e mmla mun-ɔn. Kɛ e nanti mmla sɔ’m be su’n, e kle kɛ e lafi i su, naan e kunndɛ kɛ e nin i e afiɛn mantan. (Zeremi 17:7, 8; Zak 2:22, 23) Ɔ maan, Zoova kusu fɛ́ i wun mántan e. Kpɛkun, ɔ́ yó maan e wla gúa ase. Ezai ndɛ tre 32 i mma 17 se kɛ: “Sɛ é kwlá sé’n, like ng’ɔ su sa nuan su yolɛ’n su’n yɛle aunjuɛ. Yɛ ɔ yo maan be wla gua ase tititi. Yɛ sa su ɲanman be.” Sɛ e klun klo su e nanti Zoova i mmla’m be su’n, e wla gúa ase.​—Ezai 48:18, 19.

E su sa’m be ti’n, e wla guaman ase.

Zoova fɛ i wawɛ’n man e naan e wla w’a gua ase titi.​—Sa Nga Be Yoli’n 9:31.

ƝANMIƐN WAWƐ’N MAAN E WLA GUA ASE

Akoto Pɔlu seli kɛ Ɲanmiɛn wawɛ’n yo maan sran i “wla gua ase.” (Galasifuɛ Mun 5:22, 23) I sɔ’n ti’n, maan e fa atin nga Ɲanmiɛn wawɛ’n kle e’n su. I liɛ’n, e wla gúa ase. ?Wafa sɛ yɛ e kwla yo sɔ-ɔ?

Like klikli ng’ɔ fata kɛ e yo’n, yɛle kɛ maan e kanngan Ɲanmiɛn Ndɛ’n nun cɛn kwlakwla. (Jue Mun 1:2, 3) Kpɛkun, maan e bu su akunndan. I liɛ’n, Ɲanmiɛn wawɛ’n úka e naan y’a wun akunndan nga Zoova bu i sa wie’m be su’n i wlɛ. I wie yɛle kɛ é wún like nga ti yɛ Zoova di alaje titi’n. Kpɛkun, like nga ti yɛ  ɔ bu alaje dilɛ’n i like cinnjin’n, é wún i wlɛ wie. Sɛ e nanti Biblu’n nun ndɛ’n su’n, é dí alaje.​—Nyanndra Mun 3:1, 2.

Like nɲɔn su ng’ɔ fata kɛ e yo’n, yɛle kɛ maan e srɛ Ɲanmiɛn naan ɔ fɛ i wawɛ’n man e. (Lik 11:13) Be nga be yo sɔ’n Zoova úka be. Afin ɔ seli kɛ: “Amun wun jɔ́ amun fɔuun, amun su wun-man sa ti bɔ amun wun jɔ amun fɔuun sɔ’n i bo mlɔnmlɔn. Aunjuɛ sɔ’n maan amun wla su bo-man, yɛ amun akunndan su sanngan-man sran wunmuan bɔ amun nin Krist-Jésus ti’n ti.” (Filipfuɛ Mun 4:6, 7) Sɛ e fa e wun e mantan Zoova naan e fa atin nga i wawɛ’n kle e’n su’n, e wla gúa ase.​—Rɔmfuɛ Mun 15:13.

Biblu’n nun ndɛ’n ukali sran wie mun naan b’a kwla wla be nzuɛn tɛ’n i ase. Ɔ maan siɛn’n, be nin Zoova be afiɛn mantan kpa. Kpɛkun, be wla gua ase. Be nin be wiengu’m be tran klanman. ?Ngue yɛ be yoli naan i sɔ liɛ’n w’a kwla yo ye-ɔ?

LIKE NGA SRAN WIE’M BE YOLI NAAN BE WLA W’A GUA ASE’N

E niaan’m be nun wie mun’n, ka naan b’a si ndɛ nanwlɛ’n, be fa ya ndɛndɛ, yɛ be yo be wiengu’m be like yaya. Sanngɛ, be miannin be ɲin lele be kacili be nzuɛn’n. Ɔ maan siɛn’n, be yo be wiengu’m be ye, be tra be awlɛn. Yɛ be nin be wiengu’m be tran klanman. * (An nian nzɔliɛ’n i su ndɛ’n.) (Nyanndra Mun 29:22) I wie yɛle aniaan bian kun mɔ be flɛ i kɛ Davidi’n, ɔ nin aniaan bla kun mɔ be flɛ i kɛ Rasɛli’n be liɛ’n.

Maan e nanti Ɲanmiɛn i mmla’m be su. Yɛ maan e srɛ i kɛ ɔ fɛ i wawɛ’n man e. I liɛ’n, e wla gúa ase.

Laa’n, Davidi kɛn i wiengu’m be wun ndɛ tɛtɛ. Yɛ ɔ nin i awlofuɛ’m be kokoman yalɛ amanniɛn su. Sanngɛ, kɛ ɔ wa sili ndɛ nanwlɛ’n, ɔ wunnin i wlɛ kɛ ɔ fata kɛ ɔ kaci i nzuɛn’n. Davidi waan: “Kɛ n boli Biblu’n nun  ndɛ’n i su nantilɛ bo’n, e nin min awlofuɛ mun e ɲin wa yili e wiengu kpa.”

Rasɛli liɛ’n, wafa nga be tɛli i’n ti’n, i nzuɛn’n yoli tɛ. Ɔ seli kɛ: “Awlo nga be tali min nun’n, sran’m be fa ya ndɛndɛ. I sɔ’n ti’n, dɔ nga su bɔbɔ’n, n mian min ɲin kpa naan m’an faman ya ndɛndɛ.” ?Ngue yɛ ɔ ukali Rasɛli-ɔ? Ɔ seli kɛ: “N srɛli Zoova tankaan kpa titi.”

Sran kpanngban wie mun ekun be di alaje kɛ Davidi nin Rasɛli be sa. Afin, be nanti Ɲanmiɛn i mmla’m be su, kpɛkun be fa atin nga Ɲanmiɛn wawɛ’n kle’n su. Kannzɛ bɔbɔ mɛn nga e o nun’n ti tɛ’n, sanngɛ e wla kwla gua ase. Sɛ e wla gua ase’n, e nin e awlofuɛ mun nin asɔnun’n nunfuɛ mun é trán klanman. Zoova wla e fanngan kɛ maan e nin sran kwlaa e tran klanman. (Rɔmfuɛ Mun 12:18) ?E kwla yo sɔ sakpa? ?Ngue ti yɛ ɔ ti cinnjin kɛ e mian e ɲin naan e nin e wiengu mun e tran klanman-ɔn?

MAAN E NIN E WIENGU MUN E TRAN KLANMAN

Kɛ é bó jasin fɛ’n, like nga Ɲanmiɛn Sielɛ’n wá yó naan sran’m b’a di alaje’n, i ndɛ yɛ e kan-ɔn. (Ezai 9:6, 7; Matie 24:14) Ndɛ sɔ’n yo sran kpanngban be fɛ. Yɛ be sɔ nun klanman. Ɔ maan kannzɛ mɛn’n yo tɛ kɔ i ɲrun’n, sanngɛ be awlɛn beman be klun kun, annzɛ be wla boman be wun kun. Siɛn’n be lafi su kɛ cɛn wie lele’n, sran’m be liɛ yó ye. Yɛ be “nin sran kwlaa be nuan sɛ.”​—Jue Mun 34:15.

Sanngɛ, nán sran’m be ngba yɛ be ka lɛ be sɔ jasin fɛ nga e bo’n nun-ɔn. (Zan 3:19) Kannzɛ sran’m be sɔ jasin fɛ nga e bo’n nun o, annzɛ be sɔman nun o, Zoova fɛ i wawɛ’n man e. I sɔ’n uka e maan e wla gua ase titi, naan kusu y’a kan ndɛ’n aɲinyiɛ su y’a kle sran mun. Kɛ e yo sɔ’n, ɔ kle kɛ e nanti afɔtuɛ kun mɔ Zezi mɛnnin i sɔnnzɔnfuɛ mun’n su. Ɔ seli kɛ: “Kɛ an wlu awlo sɔ nun’n, an yo like [...] Sɛ awlo sɔ’n i nunfuɛ’m be ti kpa’n, alaje trán nun, sanngɛ sɛ be ti-man kpa’n, nán maan amun nuan yralɛ’n yo ye.” (Matie 10:11-13) Sɛ e nanti afɔtuɛ sɔ’n su’n, kannzɛ sran’m be kan e ndɛ tɛ annzɛ be yo e sa wie’n, e nin be su kanman ndɛ. Atrɛkpa’n, cɛn wie lele’n bé sɔ́ e nun klanman.

Kannzɛ awa i sran’m be tanndan e ɲrun’n, sanngɛ kɛ é kán ndɛ é klé be’n, maan e kɛn i aɲinyiɛ su. I liɛ’n, e nin be su kanman ndɛ. I wie yɛle sa kun m’ɔ juli aniaan nga be o sran ble mɛn’n nun nvle kun nun’n, be liɛ’n. Lɔ awa’n manman aniaan’m be atin kɛ be kplan Ɲanmiɛn Sielɛ Sua mun. Aniaan’m be wunnin i wlɛ kɛ ɔ fata kɛ be kan ndɛ sɔ’n amanniɛn su. I sɔ’n ti, be sunmannin aniaan kun kɛ ɔ ko wun nvle sɔ’n nun awa ja nunfuɛ ng’ɔ di junman Lɔndru lɔ’n i wun. Aniaan sɔ’n yoli ngaliɛ difuɛ nvle sɔ’n nun lɔ laa. Be seli i kɛ ɔ ko yiyi nun kle i kɛ junman nga Zoova i Lalofuɛ’m be di’n, ɔ yo maan sran’m be di alaje.

Aniaan’n waan: “Kɛ n juli kan be sɔ sran’m be nun lɛ’n, wafa nga bla ng’ɔ sɔ sran’m be nun wlɛwlɛli i wun’n ti’n, n wunnin i wlɛ kɛ n ti i aniɛn’n. I sɔ’n ti’n, n yoli i like i aniɛn’n nun. I sɔ’n boli i nuan. Ɔ maan, ɔ usali min kɛ: ‘?Ngue ti yɛ a ba-ɔ?’ N seli i aɲinyiɛ su kɛ n kunndɛ kɛ ń wún awa i ja nunfuɛ ng’ɔ o wa’n i wun. Ɔ flɛli bian’n telefɔnun nun. Kɛ ɔ bali’n, ɔ yoli min like be aniɛn’n nun. Kɛ ń yíyí junman nga Zoova i Lalofuɛ’m be di’n nun ń klé i’n, ɔ sieli i su min nuan bo.”

Kɛ awa i ja nunfuɛ’n wunnin junman nga Zoova i Lalofuɛ’m be di’n i wlɛ kpa’n, w’a buman be wun akunndan tɛ kun. Kɛ ɔ cɛli kan’n, awa wa mannin Zoova i Lalofuɛ’m be atin kɛ be kplan be Ɲanmiɛn Sielɛ Sua mun lɔ. I sɔ’n yoli aniaan’m be fɛ kpa. Ndɛ sɔ’n kle kɛ, kɛ e ɲin yi e wiengu mun’n, e nin be tran klanman.

MAAN E YO NAAN E DI ALAJE TITITI

Andɛ Zoova i sufuɛ’m be di alaje, yɛ be su Ɲanmiɛn aklunjuɛ su. E tinuntinun e kwla yo naan alaje w’a tran e afiɛn titi. Sɛ e yo sɔ’n, Zoova klun jɔ́ e wun. Kpɛkun, ɔ́ yó maan é dí alaje tititi mɛn uflɛ nun lɔ.​—2 Piɛr 3:13, 14.

^ ndɛ kpɔlɛ 13 Fluwa Sasafuɛ Tranwlɛ’n uflɛ nun’n, é wá kán sa kun ekun mɔ Ɲanmiɛn wawɛ’n maan sran yo’n i ndɛ. Sa sɔ’n yɛle sran ye yolɛ.