LIKE NGA NINNGE NGA ƝANMIƐN YILI BE’N BE KLE E’N

Fluwa kun seli kɛ sran ng’ɔ si aunnvɔɛ’n, ɔ “bu sa ng’ɔ o i wiengu’m be su’n i akunndan. Kpɛkun, wafa nga be wun yo be’n, ɔ wun i wlɛ.” Be flɛ dɔɔtrɔ bian kun kɛ Riki Ansɔnun. Ɔ seli kɛ “e nin aunnvɔɛ silɛ’n fin e nin klun.”

BU NDƐ NGA I AKUNNDAN: ?Ngue ti yɛ klɔ sran’m be ngunmin cɛ yɛ be kwla si aunnvɔɛ-ɔ? Biblu’n se kɛ Ɲanmiɛn yili klɔ sran kɛ i bɔbɔ sa. (Bo Bolɛ 1:26) Kɛ mɔ Ɲanmiɛn yili e kɛ i bɔbɔ sa’n ti’n, e kwla yi i nzuɛn’n i nglo, yɛ e kwla nian like ng’ɔ yo’n su e yo wie. Ɔ maan, kɛ e si e wiengu’m be aunnvɔɛ mɔ e ti be wun ɲanman nun’n, e yi i nglo kɛ Ɲanmiɛn Zoova ti aunnvɔɛ sifuɛ.—Ɲanndra Mun 14:31.

LIKE NGA BIBLU’N KLE E’N

Ɲanmiɛn si e aunnvɔɛ. Yɛ ɔ kunndɛman kɛ e fɛ. Izraɛlifuɛ’m be su ndɛ’n kle sɔ weiin. Laa’n, be yoli kanga Ezipti lɔ. I sin’n, be wunnin be ɲrun lele afuɛ 40 aawlɛ flɛnnɛn’n nun. Biblu’n se kɛ: “Blɛ kwlaa mɔ be o ɲrɛnnɛn nun’n, i wla boli i wun.” (Ezai 63:9) Nán be su sa’n i silɛ ngbɛn yɛ Zoova si i-ɔ. Sanngɛ, kɛ bé wún ɲrɛnnɛn’n, ɔ ti kɛ i bɔbɔ yɛ ɔ su wun ɲrɛnnɛn sɔ’n sa. Ɔ seli kɛ: “N si afɛ ng’ɔ o be su’n i kpa.” (Ezipti Lɔ Tulɛ 3:7) Ɔ seli ekun kɛ: “Sran ng’ɔ kan amun’n, nn w’a kan min ɲinma su sranʼn.” (Zakari 2:8) Kɛ be kle e yalɛ’n mɔ é fɛ́’n, i awlɛn kpɔtɔ i klun.

Ɔ ju wie’n, e klun akunndan’n bu e fɔ. Ɔ maan e kwla bu i kɛ e nin aunnvɔɛ silɛ fataman. Sanngɛ Biblu’n se kɛ: “Ɲanmiɛn ti dan tra e klun akunndan’n, yɛ ɔ si sa kwlaa.” (1 Zan 3:19, 20) Ɲanmiɛn si e tra e bɔbɔ. Sa kwlaa nga be o e su’n, nin akunndan nga e bu’n, ɔ nin wafa nga e wun fa yo e’n, ɔ wun i wlɛ weiin. Yɛ ɔ si e aunnvɔɛ.

 Ndɛ nga Biblu’n kan’n

• “Á wá flɛ́, kpɛkun Zoova tɛ́ ɔ su. Á wá kpán kúnndɛ ukalɛ, yɛ ɔ́ sé kɛ: ‘Min yɛ n wo yɛ!’”—EZAI 58:9.

• “‘Amun wun akunndan nga n bu’n, min bɔbɔ yɛ n si i kpa-ɔ. Fɔundi yɛ n kunndɛ kɛ amun di-ɔ, n kunndɛman kɛ amun wun ɲrɛnnɛn. N kunndɛ kɛ amun ɲrun lɔ’n yo kpa naan amun wla gua ase. Yɛ kɛ ɔ ko yo sɔ’n, amún flɛ́ min. Kpɛkun amún bá bé wá srɛ́ min, yɛ ń síe min su ń tíe amun srɛlɛ’n.’”—ZEREMIN 29:11, 12.

• “Fa ɔ nzue kplo’n sɔ min ɲinmuɛn nzue’n. ?Be timan klɛwa ɔ fluwa’n nun?”—JUE MUN 56:8.

E NDƐ LO ƝANMIƐN, YƐ Ɔ SI E AUNNVUƐ

?Sɛ e si kɛ Ɲanmiɛn si e aunnvɔɛ’n, wafa sɛ yɛ i sɔ’n kwla uka e naan y’a jran e su sa’m be ɲrun kekle-ɔ? Be flɛ bla kun kɛ Maria. Ɔ seli kɛ:

“Kansɛli’n kleli min wa yasua’n m’ɔ le afuɛ 18 i yalɛ lele afuɛ nɲɔn naan w’a wu. Kɛ ɔ yoli sɔ’n, min wla boli min wun dan. Ɔ maan, n fali Zoova i wun ya. Afin w’a yoman like fi w’a manman min wa’n.

Kɛ afuɛ nsiɛn sinnin’n, cɛn kun’n n kannin min klun ndɛ n kleli min janvuɛ kpa kun. N seli kɛ Zoova kloman min sa. Ɔ sieli i su min nuan bo. Kɛ n ijɔli lele mɔ n wunman ndɛ fi n kɛnmɛn i kun’n, ɔ boli ndɛ ng’ɔ o 1 Zan 3:19, 20 nun’n su kleli min. Ɔ se kɛ: “Ɲanmiɛn ti dan tra e klun akunndan’n, yɛ ɔ si sa kwlaa.” Yɛ ɔ yiyili nun kleli min kɛ Zoova wun afɛ ng’ɔ o e su’n.

“Ɔ nin i sɔ ngba’n, min ya’n w’a wieman. I sin’n, n ma kanngannin Jue Mun 94:19 nun. Ɔ se kɛ: ‘Kɛ ngokɔɛ’n tinnin min su’n, a fɔnvɔli min, yɛ a yoli maan min wla guali ase.’ Ɔ yoli min kɛ min ti yɛ be klɛli ndɛ mma sɔ’n sa. Kɛ n ma srɛli Zoova’n, min wla’n guali ase dan. Afin n si kɛ ɔ wun sa ng’ɔ o min su’n i wlɛ, naan ɔ ti min srɛlɛ’n.”

Zoova wun sa ng’ɔ o e su’n i wlɛ, yɛ ɔ si e aunnvɔɛ dan. Nanwlɛ, i sɔ’n gua e awlɛn su nzue dan. ?Sanngɛ ngue ti yɛ sran’m be te wun be ɲrun dan sɔ-ɔ? ?Sa tɛ mɔ e yo’n, i su sa yɛ Ɲanmiɛn fa yi e su-ɔ? ?Cɛn wie lele’n, Ɲanmiɛn yó maan e su afɛ’n, ɔ́ wíe? Ndɛ akpasua nga i sin liɛ’m be nun’n, é wá wún kosan sɔ’m be su tɛlɛ’n.