Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Sasafuɛ Tranwlɛ'n (Like suanlɛ liɛ’n)  |  Utu 2017

Fluwa’n nun kannganfuɛ’m be kosan mun

Fluwa’n nun kannganfuɛ’m be kosan mun

?Ngue ti yɛ sa nga be juli Zezi i bakan nun’n i su ndɛ nga Matie klɛli’n, ɔ nin Liki liɛ’n be timan kun-ɔn?

Zezi i awuliɛ’n, ɔ nin sa nga be juli i bakan nun’n i su ndɛ nga Matie klɛli’n, ɔ nin Liki liɛ’n be timan kun. Afin, b’a faman be ɲin b’a sieman sran kunngba’n i su.

Matie fɛli i ɲin sieli i Zozɛfu su. Kɛ Zozɛfu tili i kɛ Mali w’a wunnzɛ’n, Matie kannin like nga Zozɛfu kunndɛli kɛ ɔ́ yó’n i ndɛ. Asa ekun’n, ɔ kannin laliɛ nga Zozɛfu cɛnnin’n i ndɛ. Laliɛ sɔ nun’n, anzi kun yiyili sa nga ti yɛ Mali w’a wunnzɛ’n i nun kleli Zozɛfu. Kpɛkun, wafa nga Zozɛfu fali anzi’n i nuan ndɛ’n su’n, ɔ kɛnnin i ndɛ wie. (Matie 1:19-25) Asa ekun’ n, Matie kɛnnin i kɛ Ɲanmiɛn’n i anzi kun yili i wun kleli Zozɛfu laliɛ nun ekun. Anzi’n seli i kɛ ɔ fa Zezi nin i nin’n naan be wanndi wɔ Ezipti. I sin’n, anzi kun yili i wun kleli Zozɛfu laliɛ nun ekun. Anzi’n seli i kɛ ɔ sɛ i sin Izraɛli mɛn’n nun. Zozɛfu sɛli i sin, yɛ ɔ nin i yi nin i wa’n be trannin Nazarɛti lɔ. (Matie 2:13, 14, 19-23) Fluwa mɔ Matie klɛli’n i ndɛ tre klikli’n nin i ndɛ tre nɲɔn su’n be nun’n, ɔ boli Zozɛfu i dunman kpɛ mɔcuɛ. Sanngɛ, ɔ boli Mali i dunman kpɛ nnan cɛ.

Liki liɛ’n, ɔ fɛli i ɲin sieli i Mali su. Ɔ kannin kɛ anzi Gabliɛli yili i wun kleli Mali. Asa ekun’n, ɔ kannin kɛ Mali ɔli Elizabɛti m’ɔ ti i osufuɛ’n i wun wunlɛ. Ndɛ nga Mali kannin fa manmannin Zoova’n, Liki boli su. (Lik 1:26-56) Asa ekun’n, ɲrɛnnɛn nga Zezi wá wún i’n i ndɛ nga Simɔn kan kleli Mali’n, Liki kɛnnin i ndɛ. Kɛ Zezi ɲannin afuɛ 12, cɛn kun’n, ɔ nin i osufuɛ’m be ɔli Ɲanmiɛn i sua’n nun lɔ. Liki klɛli ndɛ sɔ’n. W’a boman ndɛ nga Zozɛfu kɛnnin i blɛ sɔ’n nun’n i su. Mali i ndɛ liɛ ng’ɔ kannin’n yɛ ɔ boli su-ɔ. Asa ekun’n, ɔ kleli kɛ Mali i wla boli i wun blɛ sɔ’n nun. (Lik 2:19, 34, 35, 48, 51) Fluwa mɔ Liki klɛli’n, i ndɛ tre klikli’n nin i ndɛ tre nɲɔn su’n nun’n, ɔ boli Mali i dunman kpɛ 12. Sanngɛ, ɔ boli Zozɛfu i dunman kpɛ 3 cɛ. Matie kannin Zozɛfu i ndɛ kpɛ sunman. Liki liɛ’n, sa nga be juli Mali su’n, ɔ nin like nga Mali yoli’n be ndɛ yɛ ɔ kannin-ɔn.

Osu nga i nun yɛ Zezi fin’n i su ndɛ nga Matie kannin’n, ɔ nin nga Liki kannin’n be timan kun. Matie fali e ɲin sieli i osu nga i nun yɛ Zozɛfu fin’n su. Kpɛkun, ɔ kleli kɛ Zozɛfu m’ɔ ti Famiɛn Davidi i wa Salomɔn i osu nunfuɛ’n, yɛ ɔ tali Zezi-ɔ. I sɔ’n ti, Zezi le atin di Famiɛn Davidi i aja. (Matie 1:6, 16) Liki liɛ’n, ɔ fali e ɲin sieli i osu nga i nun yɛ Mali fin’n su. Ɔ kleli kɛ be wuli Zezi “David osu’n nun,” naan kɛ mɔ Mali yɛ ɔ wuli Zezi ti’n, Zezi le atin di Famiɛn Davidi i aja. (Rɔmfuɛ Mun 1:3) Afin, Mali ti Davidi i wa Natan i osu’n nunfuɛ. (Lik 3:31) ?Ngue ti yɛ Liki w’a klɛmɛn i kɛ Mali ti Eli i wa-ɔ? Afin lalafuɛ nun’n, kɛ sran’m bé klɛ́ awlo’m be nunfuɛ’m be dunman’n, yasua’m be ngunmin be dunman yɛ be klɛ-ɔ. I sɔ’n ti, Liki klɛli i kɛ Zozɛfu ti Eli i wa. I sɔ’n kle kɛ, Eli i wa yɛ Zozɛfu jɛli i-ɔ.—Lik 3:23.

Osu nga i nun yɛ Zezi fin’n i su ndɛ nga Matie nin Liki be klɛli’n, ɔ kle kɛ Zezi yɛ ɔ ti Mɛsi nga Ɲanmiɛn seli kɛ ɔ́ bá’n niɔn. Zezi i blɛ su’n, sran’m be si kɛ Zezi ti Famiɛn Davidi i osu’n nunfuɛ. Farizifuɛ nin Sadisefuɛ’m be bɔbɔ b’a siman su akplowa le. Osu nga i nun yɛ Zezi fin’n i su ndɛ nga Matie nin Liki be kannin’n ti’n, e lafi Ɲanmiɛn su kpa. E lafi su kɛ nda ng’ɔ tali be’n, bé kpɛ́n su.