Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Sasafuɛ Tranwlɛ'n  |  No. 5 2017

 NDƐ NG’Ɔ KLƐ FLUWA’N SU’N | ?ANZI MUN BE O LƐ SAKPA?

?Anzi wie’m be klun yo wi?

?Anzi wie’m be klun yo wi?

Ɛɛn, wie’m be klun yo wi. E kannin kɛ wafa nga Ɲanmiɛn yili anzi mun ti’n, be kwla yo like nga be klo’n. Kɛ Ɲanmiɛn yili Adam nin i yi Ɛvu’n, Ɲanmiɛn i anzi kun wa lakali be. Ɔ maan, be yoli ɲin kekle Ɲanmiɛn su. (Bo Bolɛ 3:1-7; Sa Nglo Yilɛ 12:9) Anzi sɔ’n i ayeliɛ’n ti’n, be wa flɛli i kɛ mmusu’m be si Satan. Dunman sɔ’n i bo yɛle kɛ “Ɲrun tanndanfuɛ” nin “Suɛn tɔnfuɛ.” Sanngɛ, Biblu’n boman dunman nga be fa flɛ i laa’n. Yɛ ɔ kleman anzi akpasua nga i nun yɛ ɔ fin’n.—Matie 4:8-11.

Ɲin kekle yolɛ’n, w’a wieman lɛ. Nowe blɛ su’n, anzi wie’m be “yacili be lika’n” mɔ Ɲanmiɛn mannin be i wun lɔ’n. Be jrali asiɛ’n su wa. Be kacili klɔ sran. Kpɛkun, be jali bla. Kusu nn, Ɲanmiɛn w’a yiman be kɛ be yo sɔ.—Zid 6; Bo Bolɛ 6:1-4; 1 Piɛr 3:19, 20.

?Anzi sɔ’m be liɛ yoli sɛ? Kɛ anannganman su nzue’n tɔ́’n, anzi sɔ’m be kacili aolia nun sran ekun. Kpɛkun be sali be sin ɲanmiɛn su lɔ. Sanngɛ, Ɲanmiɛn w’a kplinman su kɛ be tran ‘junman ng’ɔ sieli be su’n’ i su ekun. Ɔ ci be guali “aosin tuun kpa’n nun.” Yɛle kɛ be nin Ɲanmiɛn be afiɛn sacili mlɔnmlɔn. (Zid 6; 2 Piɛr 2:4) Anzi sɔ mun yɛ be flɛ be kɛ mmusu’n niɔn. “Mmusu’m be wlengbi’n,” annzɛ be min’n yɛle Satan. Yɛ “Satan bɔbɔ kaci i wun kɛ anz b’ɔ kpaja’n sa.”—Matie 12:24; 2 Korɛntfuɛ Mun 11:14.

Biblu’n kle kɛ Ɲanmiɛn sieli Mɛsi’n i famiɛn afuɛ 1914 nun ɲanmiɛn su lɔ. * I sin’n, ɔ kannin Satan nin mmusu’m be bo guɛli i asiɛ’n su. Yɛ be kwlá saman be sin ɲanmiɛn su lɔ kun. Sa tɛtɛ nga e wun be asiɛ’n su’n, be kle kɛ anzi tɛ sɔ’m be o wa sakpa naan be su tu be klunngbɔ.—Sa Nglo Yilɛ 12:9-12.

Sa tɛtɛ nin sa klekle nga b’a yi asiɛ’n piɛ yɛ’n, be kle kɛ anzi tɛtɛ sɔ’m be liɛ su wa wie. Ɔ ka kan’n, Ɲanmiɛn maan be su kwlá yoman like fi kun. Zezi wá síe sran mun afuɛ 1.000. Blɛ sɔ nun’n, asiɛ’n káci lika klanman. Kɛ afuɛ 1.000 ko wie’n, bé yáci anzi klunwifuɛ sɔ’m be nun kan naan be laka sran mun. I sin’n, Ɲanmiɛn núnnún be mlɔnmlɔnmlɔn.—Matie 25:41; Sa Nglo Yilɛ 20:1-3, 7-10.

^ ndɛ kpɔlɛ 6 Sɛ a kunndɛ kɛ á sí Mɛsi’n i famiɛn dilɛ’n i su ndɛ’n, nian fluwa ?Ngue like yɛ Biblu’n kle i sakpasakpa ɔ? i ndɛ tre 8 nun. Zoova i Lalofuɛ mun yɛ be yili-ɔ. A kwla ko fɛ i www.jw.org/bci su.

SUAN LIKE UFLƐ EKUN

JASIN FƐ KPA KUN FIN ƝANMIƐN!

?Ngue ti yɛ Ɲanmiɛn yiman sa tɛ’n nin ɲrɛnnɛn’n niɔn?

?Wafa sɛ yɛ sa tɛ’n bali mɛn’n nun ɔn? ?Yɛ ngue ti yɛ Ɲanmiɛn nin a yiman ɔn? ?Naan ɲrɛnnɛn wunlɛ’n wíe cɛn kun?