Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Sasafuɛ Tranwlɛ'n  |  No. 6 2017

 FLUWA NUN KANNGANFUƐ’M BE USA KƐ...

?Ɔ fata kɛ Klistfuɛ’m be di Nowɛli?

?Ɔ fata kɛ Klistfuɛ’m be di Nowɛli?

Asiɛ wunmuan’n su’n, sran miliɔn kpanngban kpa be bu i kɛ Nowɛli’n ti Zezi i awuliɛ cɛn’n i dilɛ. ?Sanngɛ, Zezi i sɔnnzɔnfuɛ klikli m’ɔ nin be sannin nun’n, be dili Nowɛli? ?Awuliɛ cɛn dilɛ’n i su ndɛ benin yɛ Biblu’n kan-ɔn? Ɔ fata kɛ e wun kosan sɔ’m be su tɛlɛ’n. I liɛ’n, sɛ ɔ fata kɛ Klistfuɛ’m be di Nowɛli’n, é wún i wlɛ.

Biblu’n kleman kɛ Zezi, annzɛ laa Ɲanmiɛn i sufuɛ kpa kun dili i awuliɛ cɛn. Sran ng’ɔ kan be ndɛ kɛ be dili be awuliɛ cɛn’n, be ti sran nɲɔn. Yɛ be timan Ɲanmiɛn i sufuɛ. Kɛ bé dí be cɛn sɔ’n kusu’n, be yoli sa tɛ. (Bo Bolɛ 40:20; Mark 6:21) Fluwa kun se kɛ ‘awuliɛ cɛn dilɛ’n fin be nga be suman Ɲanmiɛn’n,’ yɛ Klistfuɛ klikli’m b’a diman wie le.

Biblu’n kleman cɛn trele nga i nun yɛ be wuli Zezi’n. Be flɛ fluwa sifuɛ kun kɛ MakKlintɔk. Yɛ kun suan Strɔngu. Be fluwa kun se kɛ: ‘Biblu’n i bue nga be flɛ i kɛ Aenguɛ Uflɛ’n, annzɛ fluwa wie fi kleman Zezi i awuliɛ cɛn’n.’ Sɛ Zezi kunndɛli kɛ i sɔnnzɔnfuɛ’m be di i awuliɛ cɛn’n, nn ɔ yoli maan be sili cɛn nga i nun yɛ be wuli i’n.

?Cɛn benin yɛ be wuli Zezi-ɔ?

Biblu’n kleman kɛ Zezi bɔbɔ, annzɛ i sɔnnzɔnfuɛ kun dili Nowɛli. Katoliki’m be fluwa kun se kɛ kpɛ klikli nga bé kán Nowɛli dilɛ ndɛ’n, ‘Rɔmunfuɛ kun yɛ ɔ kɛnnin i ndɛ i fluwa kun nun-ɔn. Afuɛ 336 nun yɛ ɔ klɛli fluwa sɔ’n niɔn.’ Blɛ sɔ nun’n, nn Ɲanmiɛn maan b’a wie i nuan ndɛ’n i klɛ. Yɛ Zezi wuli w’a cɛ. MakKlintɔk nin Strɔngu be fluwa kunngba’n se kɛ ‘Ɲanmiɛn w’a seman kɛ sran’m be di Nowɛli, yɛ Aenguɛ Uflɛ’n kɛnmɛn i ndɛ.’ *

?Cɛn benin yɛ Zezi seli i sɔnnzɔnfuɛ mun kɛ be di naan be wla kpɛn i su-ɔ?

Zezi m’ɔ ti like klefuɛ dan’n, ɔ kleli i sɔnnzɔnfuɛ mun like ng’ɔ fata kɛ be yo’n. Yɛ Ɲanmiɛn maan be klɛ sieli i Biblu’n nun. W’a seman kɛ be di Nowɛli. Kɛ sran kun kle i wiengu kun i like’n, ɔ kunndɛ kɛ i wiengu sɔ’n fa like ng’ɔ kleli i’n su. I wafa kunngba’n, Zezi kunndɛ kɛ i sɔnnzɔnfuɛ’m be fa Ɲanmiɛn i nuan “ndɛ nga be klɛli’n” su.—1 Korɛntfuɛ Mun 4:6.

Zezi kleli i sɔnnzɔnfuɛ mun cɛn cinnjin kpa kun m’ɔ fata kɛ be di’n. Yɛle kɛ, maan be wla kpɛn i wie cɛn’n su. Blɛ ng’ɔ fata kɛ be di cɛn sɔ’n, ɔ nin wafa ng’ɔ fata kɛ be di’n, ɔ kleli be weiin. Biblu’n kɛn i kwlaa sɔ’n i ndɛ.—Lik 22:19; 1 Korɛntfuɛ Mun 11:25.

Y’a wun kɛ Nowɛli’n ti awuliɛ cɛn dilɛ. Be nga be suman Ɲanmiɛn’n, be yɛ be kpɛli i ba-ɔ. Klistfuɛ klikli’m b’a diman wie le. Asa ekun’n, Biblu’n kleman kɛ Zezi bɔbɔ, annzɛ i sɔnnzɔnfuɛ kun dili Nowɛli. I kwlaa sɔ’n ti, asiɛ wunmuan’n su’n, Klistfuɛ miliɔn kpanngan kpa be diman Nowɛli.

^ ndɛ kpɔlɛ 6 Sɛ a kunndɛ kɛ á sí nun ekun’n, nian afuɛ 2014, Desanblu 1, blɔfuɛ nun Sasafuɛ Tranwlɛ’n i bue 11 nun. Annzɛ kɔ ɛntɛnɛti adrɛsi www.jw.org/fr su.