Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Sasafuɛ Tranwlɛ'n (Like suanlɛ liɛ’n)  |  Fevrie 2017

Fluwa’n nun kannganfuɛ’m be kosan mun

Fluwa’n nun kannganfuɛ’m be kosan mun

Pɔlu seli kɛ Ɲanmiɛn “kplin-man su kɛ sa ng’ɔ sɔn-man amun nun’n ɔ tɔ amun su.” (1 Korɛntfuɛ Mun 10:13) ?Ndɛ sɔ’n kle kɛ Zoova siesie sa nga be kwla sɔn e nun’n, kpɛkun, ɔ kplin su kɛ be tɔ e su?

?Sɛ sran’m be bu i sɔ’n, i sɔ’n yó be sɛ? Wienun-ɔn, aniaan bian kun i wa’n w’a kun i wun. Yɛ i wla’n w’a bo i wun dan. Kosan ng’ɔ kwla fa usɛ i wun’n yɛle kɛ: ‘?Zoova si kɛ e wa’n wá yó sɔ? ?Yɛ ɔ si kɛ sa sɔ’n kwla sɔn e nin min yi e nun ti yɛ ɔ kplinnin su kɛ ɔ tɔ e su-ɔ?’ Mɛn tɛ nga nun’n, e nun sunman e wun ɲrɛnnɛn. ?I sɔ’n ti, é sé kɛ Zoova dun mmua sieli sran kun i sa liɛ ng’ɔ kwla sɔn i nun’n?

Maan e yiyi ndɛ ng’ɔ o 1 Korɛntfuɛ Mun 10:13 nun’n i nun kpa. I liɛ’n, é wún kɛ Biblu’n seman kɛ Zoova si sa ng’ɔ kwla sɔn e nun nin ng’ɔ kwlá sɔnman e nun naan w’a tɔ e su. Yɛ ɔ kleman sa ng’ɔ́ tɔ́ sran kun su’n. Sa nnan ti yɛ e kan sɔ-ɔ.

I klikli’n yɛle kɛ wafa nga Zoova yili e’n ti’n, e kwla fa e klunklo ajalɛ. Zoova kunndɛ kɛ e fa ajalɛ nga e klo’n. (Mmla’n 30:19, 20; Zozie 24:15) Sɛ e kunndɛ kɛ é fá ajalɛ ng’ɔ jɔ Zoova klun’n, ɔ fata kɛ e fa e wun wlɛ i sa nun naan ɔ kle e atin. (Nyanndra Mun 16:9) Sanngɛ, sɛ e fa ajalɛ tɛ’n, i bo’n gúa tɛ mán e. (Galasifuɛ Mun 6:7) ?Sɛ Zoova yɛ ɔ siesie sa nga be tɔ e su’n, é sé kɛ e kwla fa e klunklo ajalɛ?

I nɲɔn su’n yɛle kɛ “kɛ blɛ’n fa ti bɔ sa’m be fa ju’n, i su like” yɛ e wun i-ɔ. Afin, Zoova sasaman e sa ngba nun. (Akunndanfuɛ’n 9:11) I wie yɛle kɛ sanvuɛsa kwla ɲan sran kun. Cɛn kun’n, Zezi kannin sran 18 mɔ sanvuɛsa ɲannin be’n, be ndɛ. Sran sɔ mun’n, sua fleein kun bu tɔli be su kunnin be. Zezi kleli kɛ nán Ɲanmiɛn ti yɛ sran sɔ’m be wuli-ɔ. (Lik 13:1-5) I sɔ’n ti, sɛ sanvuɛsa ɲan sran wie mun naan be nun wie’m be wu’n, nán e bu i kɛ Ɲanmiɛn dun mmua siesieli i sɔ.

I nsan su’n yɛle kɛ, ɔ fata kɛ e tinuntinun e nanti seiin Zoova ɲrun. Satan seli kɛ like nga Zoova fa mɛn i sufuɛ mun’n, i ti yɛ be su i-ɔ. Ɔ seli kɛ sɛ ɔ tɔ kekle kpa’n, é yáci Zoova sulɛ. (Zɔb 1:9-11; 2:4; Sa Nglo Yilɛ 12:10) Sɛ Zoova sasa e naan sa fi w’a tɔman e su’n, Satan i ndɛ yó fɛ.

I nnan su’n yɛle kɛ, Zoova bɔbɔ kunndɛman kɛ ɔ́ sí sa kwlaa nga bé tɔ́ e su’n. Sɛ Zoova klo’n, ɔ kwla si sa nga bé tɔ́ e su’n. (Ezai 46:10) Sanngɛ, Biblu’n kle kɛ ɔ kunndɛman kɛ ɔ́ yó sɔ. (Bo Bolɛ 18:20, 21; 22:12) Zoova klo sran. Yɛ ɔ yo sa i nuan su. I sɔ’n ti, ɔ man e atin naan e fa e klunklo ajalɛ.—Mmla’n 32:4; 2 Korɛntfuɛ Mun 3:17.

Pɔlu seli kɛ: “[Zoova] kplin-man su kɛ sa ng’ɔ sɔn-man amun nun’n ɔ tɔ amun su.” ?Ndɛ sɔ’n i bo’n yɛle benin? Kɛ sa’m be tɔ e su’n, like nga Zoova yo’n i ndɛ yɛ Pɔlu kan-ɔn. Nán like ng’ɔ dun mmua yo naan sa’m b’a tɔ e su’n i ndɛ yɛ ɔ kan-ɔn. Sɛ e lafi Zoova su’n, sa’n kwlaa nun’n, ɔ́ jrán e sin. (Jue Mun 55:23) Maan e kan sa nɲɔn nga ti yɛ Pɔlu kannin sɔ’n i ndɛ.

Sa klikli’n, yɛle kɛ sa nga be tɔ e su’n, nán ‘e ngunmin yɛ be tɔ e su-ɔ.’ Satan i mɛn nga nun’n, saan sa keklekle’m bé tɔ́ e su. Sanngɛ, sɛ e lafi Zoova su’n, é kwlá jrán kekle. Yɛ é nánti seiin. (1 Piɛr 5:8, 9) 1 Korɛntfuɛ Mun ndɛ tre 10 i mma 6 lele 11 nun’n, Pɔlu kannin sa ng’ɔ tɔli Izraɛlifuɛ’m be su aawlɛ flɛnnɛn’n nun lɔ’n i ndɛ. Blɛ sɔ nun’n, Izraɛlifuɛ nga b’a lafiman Zoova  su’n, b’a nantiman sein. Sanngɛ, be nga be lafili i su’n, be jrannin kekle.

Sa nɲɔn su’n, yɛle kɛ e “kwla fa e wla’n kwlaa guɛ i Nyanmiɛn su.” Zoova niannin be nga be suli i laa’n be lika. Kɛ e wun i sɔ liɛ’n, e wun i wlɛ kɛ be nga “be klo i [mɔ] be fɛ i mmla’m be su’n,” ɔ nian be lika. (Mmla’n 7:9) E si kɛ like nga Zoova se kɛ ɔ́ yó’n, ɔ yo i titi. (Zozie 23:14) I sɔ’n ti, e lafi su kɛ (1) Zoova su kplinman su kɛ sa ng’ɔ o e su’n, ɔ yo kekle tra ng’ɔ kwla sɔn e nun’n. (2) Ɔ́ ‘yó sa nga mɔ maan é kwlá fíte nun’n.’

“Sa kwlaa b’ɔ tɔ e su’n, [Zoova] yɛ ɔ fɔnvɔ ye-ɔ.”

?Kɛ Pɔlu se kɛ Zoova ‘yó sa nga mɔ maan é kwlá fíte nun’n,’ i bo’n yɛle benin? Zoova kwla yo naan sa ng’ɔ o sran kun su’n ɔ wie. Sanngɛ, Pɔlu seli kɛ sɛ sa tɔ e su’n, Zoova ‘yó maan ɔ́ sɔ́n e nun yɛle kɛ ɔ́ yó sa nga mɔ maan é kwlá fíte nun’n.’ Blɛ sunman’n, like nga Zoova yo naan y’a fite nun’n, yɛle kɛ ɔ wla e fanngan naan y’a kwla su i titi. Maan e kan wafa ng’ɔ yo sɔ’n i ndɛ.

  • “Sa kwlaa b’ɔ tɔ e su’n, [Zoova] yɛ ɔ fɔnvɔ ye-ɔ.” (2 Korɛntfuɛ Mun 1:3, 4) Zoova fɛ i nuan ndɛ’n, nin i wawɛ’n, ɔ nin sran kpa nanwlɛfuɛ m’ɔ si ngwlɛlɛ’n fɔnvɔ e naan e wla’n gua ase.—Matie 24:45; Zan 14:16; Rɔmfuɛ Mun 15:4.

  • Zoova kwla fɛ i wawɛ’n man e naan e wun ajalɛ ng’ɔ fata kɛ e fa’n. (Zan 14:26) Ɲanmiɛn wawɛ’n ti’n, e wla kwla kpɛn Biblu’n nun ndɛ wie su, annzɛ i mmla wie su. Ɔ maan, e kwla fa ajalɛ ng’ɔ ti kpa’n.

  • Zoova kwla sunmɛn i anzi mun naan be uka e.—Ebre Mun 1:14.

  • Zoova kwla sin e niaan’m be lika naan be uka e. Ndɛ nga be kan’n, ɔ nin like nga be yo man e’n kwla wla e fanngan.—Kolɔsfuɛ Mun 4:11.

?Ngue yɛ ndɛ ng’ɔ o 1 Korɛntfuɛ Mun 10:13 nun’n, ɔ kle e-ɔ? Yɛle kɛ, Zoova siesieman sa nga bé tɔ́ e su’n. Sanngɛ, sɛ e fa e wla’n gua Zoova su’n, é kwlá jrán kekle sa’n kwlaa nun. Asa ekun’n, Zoova yó sa nga mɔ maan é kwlá fíte nun’n, naan y’a kwla su i kpa titi.