I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

SASAFUƐ TRANWLƐ'N UTU 2016

Fluwa’n nun kannganfuɛ’m be kosan mun

Fluwa’n nun kannganfuɛ’m be kosan mun

?Ngue ti yɛ Zezi i kpɔfuɛ’m be fali be sa nun wunzinlɛ’n yoli ndɛ ɔ?

Zezi i kpɔfuɛ’m be seli Zezi nin i sɔnnzɔnfuɛ mun kɛ be wunnzinman be sa nun naan b’a di like. Moizi Mmla’n kle like ng’ɔ kwla wla sran kun fiɛn nun’n. I wie yɛle loliɛ, nin bla i wun mmoja m’ɔ gua’n, nin kokowe, ɔ nin sran fuɛn annzɛ nnɛn fuɛn. Kpɛkun, ɔ kle like ng’ɔ fata kɛ sran sɔ’n yo’n. I wie yɛle kɛ, ɔ fata kɛ ɔ yi tɛ, annzɛ ɔ wunnzin, annzɛ be fa nzue ng’ɔ tu fiɛn’n be guɛ i wun.Saun Yolɛ ndɛ tre 11–15; Kalɛ ndɛ tre 19.

Zuifu’m be like klefuɛ’m be kpɛli mmla uflɛ be guali Ɲanmiɛn mmla sɔ’m be su. Fluwa kun se kɛ be kleli ninnge tɛkɛtɛkɛ wie mɔ be kwla wla sran fiɛn nun’n. Kpɛkun, wafa nga sran kun kwla wlɛ i wiengu kun fiɛn nun’n, be kleli be wie. Kpongbo, nin talie nin klowa nga be kwla yo fiɛn annzɛ be kwlá yoman fiɛn’n, be kpɛli i su mmla mun. Asa ekun’n, like ng’ɔ fata kɛ sran kun yo naan w’a jaso fiɛn’n nun’n, be kpɛli i su mmla wie mun.

Farizifuɛ’m be usali Zezi kɛ: “?Nzu ti yɛ ɔ sɔnnzɔnfuɛ’m be fa-man lalafuɛ kpɛnngbɛn’m be nzuɛn’n su bɔ be fa be sa fiɛn di like-ɔ?” (Mark 7:5) Kwlaa naan sran kun w’a di like’n, ɔ wunnzin i sa nun. Sanngɛ, Farizifuɛ’m be liɛ’n, sɛ sran kun wá dí like’n, ɔ fata kɛ sran uflɛ yɛ ɔ fa nzue’n guɛ i sa’n su ɔ. Sɛ w’a yoman sɔ’n, nn w’a fɔn mmla. Fluwa nga e kɛnnin i ndɛ’n seli kɛ: ‘Like nga bé fá sá nzue’n nin nga i nun yɛ bé wúnnzin be sa nun’n, ɔ nin nzue ng’ɔ fata kɛ be fa wunnzin be sa nun’n, ɔ nin sran ng’ɔ fata kɛ ɔ fa nzue’n gua sran’n i sa’n su’n, ɔ nin be sa’n i lika ng’ɔ fata kɛ be wunnzin ju’n, be kpɛli be su mmla fanunfanun.’

?Wafa sɛ yɛ Zezi buli mmla tɛkɛtɛkɛ sɔ mun ɔn? Ɔ seli Farizifuɛ mun kɛ: “Dunman klofuɛ mun, amun wun ndɛ bɔ Ezai klɛli’n ti nanwlɛ, afin ɔ klɛli i kɛ: ‘Sran nga’m be kɛn i be nuan bui su kɛ be bu n sran, sanngɛ be anwlɛn’n nun-man n su, be manman min ngbɛn, yɛ be kle like nga sran’m be kan’n kɛ ɔ ti Nyanmiɛn mmla’n.’ [...] An yaci Nyanmiɛn mmla’n an jran lalafuɛ’m be nzuɛn’n su.”Mark 7:6-8.