MAAN AMUN ƝIN TRAN SU!
?Blɛ kekle nun’n, ngue yɛ a kwla yo naan w’a di aklunjɔɛ-ɔ?—?I su ndɛ benin yɛ Biblu’n kan-ɔn?
Andɛ’n lika’n w’a yo kekle. Ɔ maan wie liɛ’n, sa nga y’a sunnzunman’n be tɔ e su. Sanngɛ kɛ ɔ ko yo sɔ’n kpɛ sunman’n ninnge nga e yo be’n yɛ be kwla yo maan e di aklunjɔɛ annzɛ y’a diman aklunjɔɛ-ɔ. Nán sa bɔbɔ ba ng’ɔ o tɔ e su’n niɔn. Biblu’n se kɛ kannzɛ sa kekle’m be tɔ sran nga i klun ti jɔwa’n i su’n sanngɛ “ɔ ti kɛ ɔ o cɛn dilɛ nun titi sa.” (Ɲanndra Mun 15:15, Nyanmiɛn Ndɛ’n) ?Ngue yɛ e kwla yo naan y’a di aklunjɔɛ kpa-ɔ? Afɔtuɛ nga be o Biblu’n nun’n be kwla uka e. Maan e fa e ɲin e sie be nun wie’m be su.
Nán koko dan
Biblu’n se kɛ: “Ngokɔɛ’n yo maan sran wunmɛn i wun fɛ, sanngɛ ndɛ fɛ’n yo maan ɔ di aklunjɔɛ.”—Ɲanndra Mun 12:25.
Biblu’n kwla uka ɔ naan w’a kokoman ngboko. Sɛ a kunndɛ kɛ á sí wafa nga Biblu’n kwla uka wɔ i sɔ yolɛ nun’n, kanngan ndɛ “Ngokoɛ’n i su ndɛ nga Biblu’n kan’n” nun.
Fa ɔ wun mantan sran
Biblu’n se kɛ: “Janvuɛ kpa’n, ɔ kle kɛ ɔ klo sran blɛ kwlaa nun, yɛ kɛ lika’n jran ɔ su’n, ɔ kaci ɔ niaan.”—Ɲanndra Mun 17:17.
Biblu’n nun afɔtuɛ wie’m be kwla uka ɔ naan w’a tra janvuɛ, naan kusu a nin ɔ janvuɛ sɔ mun amun afiɛn w’a mantan kpa. Sɛ a nian afɔtuɛ sɔ’m be su’n, ɔ su yoman ɔ kɛ ɔ ngunmin yɛ a o sa. É wlá ɔ fanngan kɛ a kanngan ndɛ “Tra janvuɛ naan ɔ wun w’a yoman ɔ kɛ ɔ ngunmin yɛ a o sa—Wafa nga Biblu’n kwla uka wɔ’n” nun.
Klo Ɲanmiɛn nin ɔ wiengu mun
Biblu’n se kɛ: “Fa ɔ awlɛn’n kwlaa, ɔ nin ɔ nguan’n kwlaa, ɔ nin ɔ akunndan’n kwlaa fa klo Zoova m’ɔ ti ɔ Ɲanmiɛn’n. [...] Klo ɔ wiengu kɛ a fa klo ɔ bɔbɔ wun’n sa.” a—Matie 22:37-39.
Ɲanmiɛn srɛlɛ’n kwla uka e naan y’a klo Ɲanmiɛn kpa y’a tra laa’n. Sɛ a kunndɛ kɛ á sí nun kpa ekun’n, kanngan ndɛ “?Ɲanmiɛn tie e srɛlɛ’n?” nun.
Sɛ e waan é klé kɛ e klo e wiengu mun’n, ɔ fata kɛ like kwlaa nga e klo kɛ be yo be man e’n, e kusu e yo e man be wie. A kwla wun i su ndɛ wie mun ekun, ndɛ “Qu’est-ce que la Règle d’or ?” nun.
Atrɛkpa’n, a kunndɛ kɛ á sí Biblu’n nun ndɛ wie mɔ be kwla uka ɔ naan w’a di aklunjɔɛ blɛ kekle nga nun’n mun ekun. É wlá ɔ fanngan kɛ a kplin su kɛ be kle wɔ Biblu’n nun like. A su tuɛmɛn i ti sika.
a Ɲanmiɛn i dunman bɔbɔ ba’n m’ɔ o Biblu’n nun’n yɛle Zoova. Jue Mun 83:18.