Aniaan nga be su Zoova w’a cɛ’n be nun wie’m be o e asɔnun’m be nun. Aniaan sɔ’m be lafi Zoova su kpa, ɔ maan e kwla nian be ajalɛ’n su. E kwla se be kɛ be kan Zoova i anuannzɛ’n i ndɛ be kle e. Yɛ kɛ sa’m be tɔli be su’n wafa nga Zoova ukali be’n e kwla se be kɛ be kɛn i ndɛ kle e wie. Asa’n, kɛ e nin e awlofuɛ mun é sú Ɲanmiɛn’n e kwla yia aniaan oke’m be nun kun naan ɔ kan wafa ng’ɔ dili aklunjuɛ Zoova i sulɛ nun’n i ndɛ kle e.

Sɛ a su Zoova w’a cɛ’n, nán sisi ɔ bo naan w’a kan ɔ Ɲanmiɛn sulafilɛ’n i ndɛ w’a kle gbanflɛn nin talua nga be o asɔnun’n nun’n. Zakɔbu nin Zozɛfu be kannin ninnge nga Zoova yoli mannin be’n be ndɛ kleli be osu’n nunfuɛ mun. (Bo 48:21, 22; 50:24, 25) Zoova seli awlobo su kpɛn’m be kɛ be kan ninnge ng’ɔ yoli be’n be ndɛ kle be mma mun. (Mml 4:9, 10; Ju 78:4-7) Andɛ kusu’n, siɛ nin niɛn mun nin aniaan nga be o asɔnun’n nun’n, be kwla kan ninnge kpakpa nga Zoova sinnin i anuannzɛ’n i lika yoli be’n be ndɛ kle gbanflɛn nin talua mun.

BO VIDEO NGA BE FLƐ I KƐ SƐ BE SE E KƐ NÁN E SU ZOOVA KUN’N, MAAN E BO YO KUN TITI. I SIN’N AN TƐ KOSAN NGA’M BE SU:

• Nvle wie’m be nun’n be seli aniaan’m be kɛ be yaci Zoova sulɛ. ?Wafa sɛ yɛ Otrisi lɔ Betɛli’n ukali be-ɔ?

• ?Ngue yɛ aniaan sɔ’m be yoli naan be Ɲanmiɛn sulafilɛ’n i bo’n w’a wla ase kpa-ɔ?

• ?Ngue ti yɛ Rumanin lɔ aniaan sunman be nin Zoova i anuannzɛ’n be buli-ɔ? ?Yɛ ngue ti yɛ be wa sali be sin-ɔn?

• ?Wafa sɛ yɛ aniaan’m be su ndɛ’n uka e naan y’a kwla lafi Ɲanmiɛn su kpa ekun-ɔn?