Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Klistfuɛ mun nin be junman’n—Aɲia fluwa  |  Avrili 2017

 LIKE NGA KLISTFUƐ’M BE YO’N

A kwla uka Klistfuɛ ng’ɔ yacili jasin fɛ bolɛ’n w’a cɛ’n

A kwla uka Klistfuɛ ng’ɔ yacili jasin fɛ bolɛ’n w’a cɛ’n

Avrili i le 11 m’ɔ ti Jɔlɛ cɛn’n, Klistfuɛ nga be yacili jasin fɛ bolɛ’n w’a cɛ’n be nun kaka bé bá e Wla kpɛnlɛ cɛn aɲia’n i bo. Be boli nguan atin’n i su wanndilɛ bo wie. Sanngɛ sa wie’m be ti’n, be ja nun w’a glɔ. Be boli be nun wie’m be su fluwa Sa ɔ sin Zoova wun i nun. (Eb 12:1) Be nga be yacili jasin fɛ bolɛ’n w’a cɛ’n, be ndɛ te yo Zoova i cinnjin. Afin ɔ fɛli i Wa’n i mmoja’n fa toli be. (Yo 20:28; 1P 1:18, 19) ?Wafa sɛ yɛ e kwla uka be naan b’a sa be sin-ɔn?

Kɛ bua tafuɛ kun i bua kun mlin’n, ɔ kunndɛ i kpa. I sɔ yɛ asɔnun kpɛnngbɛn’m be yo-ɔ. Be kpɛ Klistfuɛ nga be yacili jasin bolɛ’n w’a cɛ’n be sin atin lele be wun be, kpɛkun be uka be. (Lk 15:4-7) I sɔ nun’n, be sɔnnzɔn wafa nga Zoova niɛn i bua’m be su’n. (Ze 23:3, 4) Nán asɔnun kpɛnngbɛn’m be ngunmin yɛ be kwla uka be-ɔ. E ngba e kwla uka be. E ɲin nga e mian e yo sran ye’n, ɔ nin i wunsu sa wie mun’n, ɔ jɔ Zoova klun yɛ e kwla ɲɛn i su ye dan. (Nya 19:17; Yo 20:35) I sɔ’n ti’n, bu be nga a kwla uka be’n, be akunndan naan uka be ndɛndɛ kpa!

AN NIAN VIDEO MAAN E UKA KLISTFUƐ NGA BE YACILI JASIN FƐ BOLƐ’N W’A CƐ’N. I SIN’N, AN TƐ KOSAN NGA’M BE SU:

  • ?Kɛ Abi nin Zoova i Lalofuɛ kun mɔ i bɔbɔ simɛn i’n be yiali’n, ngue yɛ ɔ yoli-ɔ?

  • ?Sɛ e kunndɛ kɛ é úka aniaan kun m’ɔ yacili jasin fɛ’n bolɛ’n w’a cɛ’n, ngue ti yɛ ɔ fata kɛ e wun asɔnun kpɛnngbɛn’m be wun-ɔn?

  • ?Kwlaa naan Abi w’a ko nian Lora osu ekun’n, ngue yɛ ɔ dun mmua yoli-ɔ?

  • ?Lora i ukalɛ nun’n, wafa sɛ yɛ Abi w’a siman afɛ, ɔ trɛli i awlɛn, yɛ ɔ kleli kɛ ɔ klo sran-ɔn?

  • ?Ngue yɛ sunnzun ase nga Zezi fali m’ɔ o Lik 15:8-10 nun’n, ɔ kle e-ɔ?

  • ?Kɛ aniaan’m be bo yoli kun be ukali Lora’n, wafa sɛ yɛ i bo guali klanman-ɔn?