I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

?Wan mun yɛ be yo Zoova i klun sa’n andɛ ɔ?

 Like suanlɛ 20

?Junman benin yɛ Zoova i Lalofuɛ’m be Ɲrun dinfuɛ’m be anuannzɛ’n di ɔ?

?Junman benin yɛ Zoova i Lalofuɛ’m be Ɲrun dinfuɛ’m be anuannzɛ’n di ɔ?

Klistfuɛ klikli’m be blɛ su’n, be Ɲrun dinfuɛ’m be anuannzɛ’n

Be su kanngan fluwa nga Klistfuɛ’m be Ɲrun dinfuɛ’m be anuannzɛ klɛli’n nun

Klistfuɛ klikli’m be blɛ su’n, “be bɔ Jésus sunmannin be’n [ɔ] nin kpɛnngbɛn mun” mɔ be o Zerizalɛmu lɔ’n, yɛ be dili be ɲrun dinfuɛ junman’n niɔn. Ajalɛ cinnjin nga be fa’n, ɔ ti Klistfuɛ’m be kwlaa be liɛ. (Sa Nga Be Yoli’n 15:2) Ɔ maan, kɛ be nuan sɛ́ ajalɛ kun su lɛ’n, nn b’a dun mmua koko i su ajalɛ nga Biblu’n kle’n i su yalɛ. Kpɛkun be su fa atin nga Ɲanmiɛn wawɛ’n kleli’n, i su. (Sa Nga Be Yoli’n 15:25) Ajalɛ kunngba’n yɛ e fa su andɛ ɔ.

Ɲanmiɛn fa be di i junman. Aniaan nga Ɲanmiɛn i wawɛ’n kpali be sieli be ngunmin mɔ be o be Ɲrun dinfuɛ’m be anuannzɛ’n nun’n, be klo Ɲanmiɛn Ndɛ’n nun like suanlɛ’n kpa. Yɛ be si anuannzɛ’n ɔ nin asɔnun’n nun ninnge’m be siesie kpa wie. Asa ekun’n, be yia le mɔcuɛ kwlaa nun, naan b’a bu like nga ɔ mian be niaan Klistfuɛ onga mun’n i akunndan. Kɛ Klistfuɛ klikli’m be blɛ su sa’n, afɔtuɛ nga be man’n m’ɔ taka Biblu’n su’n, be klɛ i fluwa su ko man be, annzɛ be sin akpasua annzɛ nvle sunianfuɛ annzɛ sran uflɛ wie mun ekun be ja su naan w’a to asɔnun mun. I sɔ’n ti’n, Ɲanmiɛn i sufuɛ’m be akunndan’n ɔ nin be ninnge yolɛ wafa’n ti kun. (Sa Nga Be Yoli’n 16:4, 5) Asa ekun’n, Ɲanmiɛn i ndɛ ng’ɔ fata kɛ be fa uka Zoova i Lalofuɛ mun’n, be bu i akunndan. Yɛ be wla be kwlaa be fanngan kɛ be dun mmua bo Ɲanmiɛn Sielɛ’n i jasin fɛ’n. Sɛ ɔ ti mɔ be man Klistfuɛ yasua’m be junman asɔnun’n nun’n, be yɛ be mɛn i wun atin ɔn.

Atin nga Ɲanmiɛn wawɛ’n kle be’n yɛ be fa ɔ. Zoova i Lalofuɛ’m be Ɲrun dinfuɛ’m be anuannzɛ’n i nunfuɛ’m be kpɛ be ɲin Zoova m’ɔ sie like kwlaa’n, ɔ nin Zezi m’ɔ ti asɔnun’n i su kpɛn’n be wun lɔ, naan be kle be atin. (1 Korɛntfuɛ Mun 11:3; Efɛzfuɛ Mun 5:23) Ɔ maan, be buman be wun kɛ be ti Ɲanmiɛn i sufuɛ’m be su kpɛn naan be kpa tra be. I kpa bɔbɔ’n, sran sɔ’m be nin be wiengu nga be kpali be sieli be ngunmin’n, ‘lika kwlaa nga Bua Gbanflɛn’n [Zezi] kɔ́’n, be su i su.’ (Sa Nglo Yilɛ 14:4) Nanwlɛ, kɛ Zoova i Lalofuɛ’m be Ɲrun dinfuɛ’m be anuannzɛ’n i nunfuɛ’m be ti i kɛ be niaan Klistfuɛ’m be srɛ Ɲanmiɛn man be’n, ɔ yo be fɛ dan.

  • ?Klistfuɛ klikli’m be blɛ su’n, wan mun yɛ be o be Ɲrun dinfuɛ’m be anuannzɛ’n nun ɔn?

  • ?Wafa sɛ yɛ andɛ Zoova i Lalofuɛ nga be o be Ɲrun dinfuɛ’m be anuannzɛ’n nun’n, be kunndɛ Ɲanmiɛn i sin atin ɔn?