Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 NDƐ TRE 101

Zezi dili like Simɔn i awlo, Betanin lɔ

Zezi dili like Simɔn i awlo, Betanin lɔ

MATIE 26:6-13 MARKI 14:3-9 ZAN 11:55–12:11

  • ZEZI SƐLI I SIN BETANIN, ZERIZALƐMUN WUN LƐ

  • MALI FALI NGO FANNINFANNIN GUALI ZEZI I TI NIN I JA’M BE SU

Kɛ Zezi jasoli Zeriko lɛ’n, ɔ ɔli Betanin. Lɔ kɔlɛ’n timan pɔpɔ, afin lika’n ti kpɔlɛkpɔlɛ. Yɛ Zeriko nin Betanin’n be afiɛn ti nun kilo ablaɔn (20). Betanin klɔ’n ti kaan yɛ ɔ o Olivie oka’n i wia afiliɛ lɔ. Lɔ yɛ Lazaa nin i niaan bla nɲɔn’n be tran-ɔn. Betanin nin Zerizalɛmun be afiɛn ti nun kilo kɔe nsan kun.

Zuifu kpanngban be dun mmua juli Zerizalɛmun lɔ ka naan Delɛ cɛn’n w’a ju. Ɔ maan sɛ be kannin fuɛn annzɛ be yoli like wie naan fiɛn kan be’n, be kwla yo “be wun sanwun” ka naan Delɛ cɛn’n w’a ju. (Zan 11:55; Kalɛ 9:6-10) Sran sɔ’m be nun wie’m be ko yiali Ɲanmiɛn i sua’n nun lɔ. Be usali be wun sɛ Zezi bá Delɛ cɛn’n i bo wie annzɛ sɛ ɔ su baman wie-o.​—Zan 11:56.

I sɔ’n ti’n, sran’m be sili Zezi i balɛ’n i su akplowa dan kpa. Zuifu’m be Ɲanmiɛn sulɛ wafa’m be su kpɛnngbɛn wie’m be kunndɛli kɛ bé trɛ́ i naan bé kún i. I sɔ’n ti’n, be seli kɛ sɛ sran kun si lika nga Zezi o’n, maan ɔ kan “naan be ko trɛ i.” (Zan 11:57) Kɛ Zezi cɛnnin Lazaa’n, Zuifu’m be Ɲanmiɛn sulɛ wafa’m be su kpɛnngbɛn sɔ’m be kunndɛli kɛ bé kún Zezi. (Zan 11:49-53) Ɔ maan atrɛkpa sran wie’m be seli be wun kɛ Zezi su yimɛn i wun nglo nzra nun.

“Cɛn ba nsiɛn ka naan Zuifu’m b’a di Delɛ cɛn’n,” Zezi juli Betanin. Cɛn sɔ’n ti Ya cɛn. (Zan 12:1) Kɛ wia’n tɔ’n yɛ Wunmiɛn-lolɛ-cɛn’n m’ɔ ti Nizan i cɛn ba mɔcuɛ su’n, ɔ bo i bo-ɔ. I sɔ’n kle kɛ Zezi juli Betanin lɛ kwlaa naan Wunmiɛn-lolɛ-cɛn’n w’a bo i bo. Zuifu’m be mmla’n nun’n, ɔ fataman kɛ sran tu ajalɛ wɔ lika mmua Wunmiɛn-lolɛ-cɛn’n nun. Afin Wunmiɛn-lolɛ-cɛn’n ɔ bo i bo Ya cɛn nnɔsua wia atɔliɛ lele fa ju Fue cɛn nnɔsua wia atɔliɛ. Ɔ maan Zezi w’a tuman ajalɛ blɛ sɔ’n nun. Atrɛkpa kɛ Zezi juli Betanin’n, Lazaa i awlo lɔ yɛ ɔ ko sikeli-ɔ, afin w’a sike lɔ le.

Be flɛ bian kun kɛ Simɔn, ɔ tran Betanin lɛ wie. Ɔ yiali Zezi nin i sɔnnzɔnfuɛ mun nin Lazaa kɛ be ko di like i awlo lɔ. Kɛ ɔ́ yó sɔ’n nn be o Fue cɛn nnɔsua. Simɔn sɔ’n, be flɛ i ekun kɛ ‘kokowefuɛ.’ Afin atrɛkpa’n laa ɔ ti kokowefuɛ, yɛ Zezi wa yoli i juejue. Mati niannin aofuɛ’m be lika, afin i wun kpɛ kpa. Sanngɛ Mari liɛ’n, ɔ yoli like uflɛ. Yɛ like sɔ’n, w’a yoman sran ngba fɛ.

Mari tikeli buteli kaan kun su. Ngo o nun. “Ngo sɔ’n bɔn fannin kpa. Naa yɛ be fa yoli-ɔ, b’a faman like uflɛ b’a sannganman nun.” (Zan 12:3) Ngo sɔ’n le gua kpa. Ɔ ti denie ya nsan (300). Ɔ fata kɛ sran kun di junman lele afuɛ nuan kun naan w’a ɲɛn i sɔ sika’n! Mari fali ngo sɔ’n guɛli i Zezi i ti’n nin i ja’m be su, kpɛkun ɔ fɛli i timuɛn’n nunnunnin i ja’n wun. Ngo fannin sɔ’n i nvan’n deli sua wunmuan’n.

Kɛ ɔ yoli sɔ’n, Zezi i sɔnnzɔnfuɛ’m be fali ya. Be seli kɛ: “?Ngue ti yɛ be saci ngo fanninfannin nga sa-ɔ?” (Marki 14:4) Zida Iskariɔti liɛ’n, ɔ seli kɛ: “?Ngue ti yɛ b’a yoman ngo fannin sɔ’n i atɛ denie ya nsan (300) naan b’a fɛ i sɔ sika’n b’a man yalɛfuɛ  mun-ɔn?” (Zan 12:5) Nán kɛ yalɛfuɛ’m be ndɛ lo i ti yɛ ɔ seli sɔ-ɔ. Sanngɛ ɔ ti awiefuɛ. I yɛ ɔ sie Zezi i sɔnnzɔnfuɛ’m be sika guawlɛ’n niɔn. Sanngɛ ɔ wua nun sika titi.

Kɛ Zezi wunnin kɛ be su kɛn i sɔ ndɛ’n, ɔ jrannin Mari sin. Ɔ seli be kɛ: “?Ngue ti yɛ amun kunndɛ kɛ amún klé bla’n i yalɛ-ɔ? Like kpa yɛ ɔ yo mannin min-ɔn. Afin amun nin yalɛfuɛ’m be o wa titi, sanngɛ min liɛ’n, amun nin min su tranman titi. Kɛ ɔ fali ngo fannin’n guali min wun’n, min sielɛ’n i su like yɛ ɔ yoli i lɛ-ɔ. Nanwlɛ, ń kán klé amun kɛ mɛn wunmuan’n nun’n, lika kwlaa nga bé wá bó jasin fɛ nga’n, sran’m bé kán like nga bla nga yoli’n i ndɛ wie naan be wla kpɛn i su.”​—Matie 26:10-13.

Kɛ ɔ́ yó sɔ’n, nn sran’m b’a ti i kɛ Zezi o Betanin lɛ. Afin kɛ ɔ bali’n, ɔ su wa di cɛn ba nɲɔn. I sɔ’n ti’n, Zuifu kpanngban kpa be bali Simɔn i awlo lɛ. Sanngɛ nán Zezi i ngunmin ti yɛ be bali-ɔ. Lazaa mɔ “[Zezi] cɛnnin i’n,” i nianlɛ wie ti yɛ be bali-ɔ. (Zan 12:9) Ɔ maan kɛ ɔ fɛ i lɛ’n, Ɲanmiɛn ɲrun jranfuɛ’m be su kpɛn’m be buli Zezi nin Lazaa be kunlɛ akunndan. Afin be waan kɛ mɔ Zezi cɛnnin Lazaa ti yɛ sran kpanngban be lafi Zezi su-ɔ. Nanwlɛ, be klun yo wi-o!