Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 NDƐ TRE 9

Zezi ɲinnin Nazarɛti lɔ

Zezi ɲinnin Nazarɛti lɔ

MATIE 13:55, 56 MARKI 6:3

  • ZOZƐFU NIN MARI BE AWLOBO’N W’A TRƐ

  • ZEZI SUANNIN JUNMAN KUN

Zezi ɲinnin Nazarɛti lɔ. Klɔ sɔ’n ti kaan sa, yɛ sran’m be bumɛn i wie. Ɔ o Galile mɛn m’ɔ ti kongo lika’n i nun. Yɛ ɔ o fɛtɛ dan mɔ be flɛ i Galile Jenvie’n i wia atɔliɛ lɔ.

Atrɛkpa’n, kɛ Zozɛfu nin Mari bé fá Zezi Ezipti lɔ bé bá’n, nn ɔ le afuɛ nɲɔn. Blɛ sɔ nun’n, kɔlɛ i yɛ ɔ ti be wa kunngba cɛ-ɔ. Sanngɛ kɛ ɔ́ kɔ́ i ɲrun’n, be wa wuli ba yasua wie mun. Be yɛle Zaki nin Zozɛfu nin Simɔn, ɔ nin Zida. Zozɛfu nin Mari be wuli ba bla mun wie. Ɔ maan Zezi i niaan’m be kwla ju sran nsiɛn tra su bɔbɔ..

Sanngɛ Zezi le osufuɛ wie mun ekun. Be yɛle Elizabɛti nin i wa Zan, mɔ e kannin be ndɛ’n. Be tran nguangua lɔ, Zide mɛn’n nun lɔ. Kun ekun yɛle Salome. I liɛ’n, ɔ tran Galile mɛn’n nun lɔ. Kɔlɛ’n, Mari i niaan bla-ɔ. I wun’n suan Zebede. Be le ba yasua nɲɔn. Be yɛle Zaki nin Zan. Be nin Zezi be ti ngawangawa. Sɛ ba sɔ’m be bakan nun’n, be nin Zezi be trannin likawlɛ’n, e siman nun ndɛ. Sanngɛ kɛ be yoli kaklaka’n, be nin Zezi be afiɛn mantannin kpa, yɛ be kacili i akoto wie.

Zozɛfu i awlobo’n wa trɛli. Ɔ maan ɔ fata kɛ ɔ di junman kekle kpa naan w’a niɛn i awlobo’n i lika. Zozɛfu ti waka sɛfuɛ. Ɔ tali Zezi kɛ i bɔbɔ i klun ba sa. I sɔ’n ti’n, be wa flɛli Zezi kɛ ‘waka sɛfuɛ’n i wa.’ (Matie 13:55) Zozɛfu kleli Zezi waka sɛlɛ junman’n wie. I kusu fɛli i ɲin sieli su kpa.  I sɔ’n ti’n, ɔ sili junman sɔ’n i di. Ɔ maan sran’m be wa flɛli i kusu kɛ ‘waka sɛfuɛ’ wie.​—Marki 6:3.

Zoova i sulɛ’n yoli Zozɛfu nin i awlobofuɛ’m be cinnjin kpa. Kɛ nga Ɲanmiɛn Mmla’n seli kɛ siɛ nin niɛn’m be fa yo’n sa’n, Zozɛfu nin Mari be kannin Ɲanmiɛn i ndɛ kleli be mma mun titi. Kɛ ‘be ti be awlo lɔ-o, be kan, kɛ be o atin su be su kɔ lika-o, be kan, kɛ bé wá lá-o, kɛ bé tínnge-o, be kan.’ (Mmla’n 6:6-9) Asa ekun’n, Ɲanmiɛn sulɛ sua kun o Nazarɛti lɔ. Ɔ maan e kwla lafi su kɛ Zozɛfu nin i awlobofuɛ’m be ko suli Ɲanmiɛn lɔ titi. Asa kusu’n, Zozɛfu nin i awlobofuɛ’m be kɔ Zerizalɛmun, Zoova i sua’n nun lɔ titi. Kɛ be yo sɔ’n, ɔ yo be fɛ dan. Kɛ ɔ́ kɔ́ i ɲrun’n, Ɲanmiɛn Ndɛ’n se kɛ Zezi ɔli Ɲanmiɛn sulɛ sua’n nun lɔ ‘kɛ ng’ɔ fa yo i Wunmiɛn-lolɛ-cɛn kwlaa nun’n sa.’​—Liki 4:16.