Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 NDƐ TRE 8

Be wanndili famiɛn klunwifuɛ kun

Be wanndili famiɛn klunwifuɛ kun

MATIE 2:13-23

  • ZEZI I SI NIN I NIN BE FƐ I WANNDILI BE ƆLI EZIPTI

  • ZOZƐFU FƐLI I AWLOBOFUƐ MUN KO TRANNIN NAZARƐTI

Cɛn kun’n, Zozɛfu tinngeli Mari ndɛndɛ kpa. Afin Zoova i anzi’n kannin ndɛ kun laliɛ nun kleli i. Anzi’n seli i kɛ: “Jaso, fa bakan’n nin i nin’n naan wanndi kɔ Ezipti mɛn’n nun lɔ. Ka lɔ lele saan m’an se wɔ kɛ a jaso lɔ, afin Erɔdu su wa kunndɛ bakan’n naan ɔ́ kún i.”​—Matie 2:13.

Zozɛfu nin Mari b’a sisiman be bo. Be fali be wa’n naan kɔnguɛ kunngba sɔ’n nun’n, b’a wanndi. I sɔ mɔ be yoli’n, ɔ yoli be ye dan. Afin Erɔdu tili i kɛ wunnzue yifuɛ’m b’a lɛkɛ i. Ɔ seli be kɛ sɛ be wun ba’n, be wa kan su kle i. Sanngɛ b’a yoman sɔ. Be fali atin uflɛ be ɔli. I sɔ’n ti’n, Erɔdu fali ya ble. Kɛ m’ɔ kunndɛ kɛ ɔ́ kún Zezi ti’n, ɔ seli kɛ be kun ba yasua kwlaa nga be o Bɛtleɛmun nin i asa kwlaa su’n, mɔ be le afuɛ nɲɔn annzɛ be nin-a ɲanman afuɛ nɲɔn bɔbɔ’n. Ndɛ nga wunnzue yifuɛ’m be kannin’n, i su yɛ ɔ niannin naan w’a kle ba nga i waan be kun be’n be afuɛ’n niɔn.

Nanwlɛ, ba yasua’m be kunlɛ sɔ’n ti ɲrɛnnɛn sa-o! E siman ba nga be kunnin be’n be nuan. Sanngɛ nga e si i’n yɛle kɛ ba sɔ’m be nin mun be boli awuyomo, be sunnin sunlɛ kpa. I lɛ’n nun’n, ndɛ kun mɔ Ɲanmiɛn nuan ijɔfuɛ Zeremin kannin’n kpɛnnin su.​—Zeremi 31:15.

Kɛ ɔ́ yó sɔ’n, nn Zozɛfu nin i awlobofuɛ’m b’a wanndi b’a ko tran Ezipti lɔ lalaa. I sin’n, cɛn kun kɔnguɛ’n, Zoova i anzi’n fiteli Zozɛfu ɲrun laliɛ nun ekun naan w’a se i kɛ: “Jaso, fa bakan’n nin i nin’n naan kɔ Izraɛli mɛn’n nun lɔ, afin be nga be kunndɛ kɛ bé kún bakan’n, b’a wu.” (Matie 2:20) Ɔ maan Zozɛfu wunnin i wlɛ kɛ siɛn’n, ɔ nin i awlobofuɛ’m be kwla sa be sin be klɔ lɔ. I lɛ nun’n, ndɛ kun ekun mɔ Ɲanmiɛn nuan ijɔfuɛ kun kannin’n, ɔ kpɛnnin su wie. Yɛle kɛ bé wá flɛ́ Ɲanmiɛn i Wa’n kɛ ɔ jaso Ezipti lɔ bla.​—Oze 11:1.

Atrɛkpa’n, Zozɛfu kunndɛli kɛ ɔ nin i awlobofuɛ’m bé kó trán Bɛtleɛmun i wun lɛ, Zide mɛn’n nun lɔ. Ka naan b’a wanndi b’a ɔ Ezipti’n, mɛn sɔ’n nun lɔ yɛ be o-ɔ. Sanngɛ ɔ wa tili i kɛ Erɔdu i wa Aakelaisi m’ɔ ti klunwifuɛ’n yɛ ɔ sie Zide mɛn’n siɛn’n niɔn. Laliɛ kun ekun nun’n, Ɲanmiɛn seli Zozɛfu kɛ ɔ niɛn i wun su kpa. Ɔ maan Zozɛfu fɛli i awlobofuɛ mun naan b’a wɔ Izraɛli nvle’n i nglo lɔ lika’n nun. Be ko trannin Nazarɛti klɔ’n m’ɔ o Galile mɛn’n nun lɔ’n su. Lika sɔ’n nin Zerizalɛmun klɔ’n be afiɛn’n ti nun kpa. Lɔ yɛ Zezi ɲinnin-ɔn. I lɛ nun’n, ndɛ kun mɔ Ɲanmiɛn nuan ijɔfuɛ kun kannin’n, ɔ kpɛnnin su wie. Ɔ seli kɛ: “Bé wá flɛ́ i Nazarɛtifuɛ.”​—Matie 2:23.