Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 NDƐ TRE 61

Zezi yoli ba mɔ mmusu wo i su’n i juejue

Zezi yoli ba mɔ mmusu wo i su’n i juejue

MATIE 17:14-20 MARKI 9:14-29 LIKI 9:37-43

  • Ɔ FATA KƐ ZEZI I SƆNNZƆNFUƐ’M BE LAFI ƝANMIƐN SU KPA NAAN B’A KWLA YO BA MƆ MMUSU WO I SU’N I JUEJUE

Zezi nin Piɛli nin Zaki nin Zan be fin oka’n su lɔ be jrali. Kɛ bé jrá’n, be wunnin sran kpanngban kpa wie mun. Mmla klɛfuɛ’m be o lɛ wie, be nin Zezi i sɔnnzɔnfuɛ’m be su kan ndɛnngan. Kɛ sran’m be wun Zezi’n, ɔ yo be fɛ dan, kpɛkun be wanndi be ko yo i like. Zezi usɛli i sɔnnzɔnfuɛ’m be kɛ: “?Ngue ndɛ yɛ amun nin be su kan-ɔn?”​—Marki 9:16.

Bian kun fin sran nga be o lɛ’n be afiɛn wa kotoli Zezi i bo naan w’a se i kɛ: “Like klefuɛ, n fali min wa’n n blɛli wɔ, afin mmusu kun wo i su. Ɔ maan ɔ kwlá ijɔman. Lika kwlaa ng’ɔ tɔ i su’n, ɔ tɛ i ase, i nuan nzue’n bo nglo, ɔ di i je, kpɛkun i wunmiɛn kwlaa wie i nun. N srɛli ɔ sɔnnzɔnfuɛ mun kɛ be fuɛn i, sanngɛ b’a kwlá fuɛnmɛn i.”​—Marki 9:17, 18.

Atrɛkpa’n, mmla klɛfuɛ’m be su kan Zezi i sɔnnzɔnfuɛ’m be wun ndɛ naan bé yó be finfin, afin b’a kwlá yoman ba’n i juejue. Zezi w’a tɛman bian’n i su trele. Sanngɛ ɔ kpɛli i ɲin be nga be o lɛ’n be wun lɔ naan w’a se kɛ: “Ɔo, blɛ nga nunfuɛ mun, amun lafiman Ɲanmiɛn su, kpɛkun amun a saci. ?E nin amun é trán lele jú cɛn onin? ?Yɛ ń trá min awlɛn amun wun lele jú cɛn onin?” Mmla klɛfuɛ mun yɛ Zezi kan ndɛ sɔ’n wɔli be-ɔ. Afin kɛ ɔ nunman lɛ’n, be kleli i sɔnnzɔnfuɛ’m be yalɛ. I sin’n, Zezi kpɛli i ɲin ba’n i si’n i wun lɔ. Kpɛkun ɔ seli kɛ: “Fa ɔ wa’n bla wa.”​—Liki 9:41.

Kɛ ba’n wúnnge Zezi wun lɔ’n, mmusu’n tɛli i ase, kpɛkun ɔ yoli maan ɔ usuli. Kɛ ɔ́ yó sɔ’n, nn i nuan nzue’n bó nglo. Zezi usali ba’n i si’n kɛ: “?Ɔ yo i sɔ w’a di afuɛ nɲɛ?” Ɔ tɛli su kɛ: “Kɛ ɔ fin i bakan nun’n, yɛ ɔ yo i sɔ-ɔ. Cɛn wie’n, ɔ fɛ i yi i sin nun, yɛ cɛn wie’n ɔ fɛ i yi i nzue nun naan ɔ́ kún i.” Bian’n srɛli Zezi kpa kɛ: “Sɛ a kwla yo like wie’n, si e aunnvuɛ naan uka e.”​—Marki 9:21, 22.

Kɛ mɔ Zezi i sɔnnzɔnfuɛ’m b’a kwlá yoman ba’n i juejue ti’n, i sɔ’n boli i si’n i wla. Sanngɛ Zezi  guɛli i awlɛn su nzue seli i kɛ: “?Ngue ti yɛ a se kɛ ‘Sɛ a kwla yo’n’ niɔn? Afin sran ng’ɔ lafi Ɲanmiɛn su’n, ɔ kwla yo like kwlaa.” Kɛ Zezi seli sɔ’n, ba’n i si’n ka lɛ kpannin seli kɛ: “N lafi Ɲanmiɛn su! Uka min maan n lafi Ɲanmiɛn su kpa ekun.​—Marki 9:23, 24.

Zezi wunnin kɛ sran’m be su tu kpuu be bɛ i wun lɛ. Ɔ maan ɔ ijɔli mmusu’n, ɔ seli i kɛ: “Wɔ, mmusu mɔ a yo maan sran yo bobo nin sutrefuɛ’n, n se wɔ kɛ jaso i su! Yɛ nán sa ɔ sin trɛn i su kun!” Mmusu’n fiteli. Sanngɛ ka naan w’a fite’n, ɔ yoli maan ba’n kpannin, yɛ ɔ usuli kpa. Ba’n la lɛ kɛ w’a wu sa. Ɔ maan kɛ sran’m be wunnin i sɔ’n be nun sunman be seli kɛ: “W’a wu!” (Marki 9:25, 26) Sanngɛ Zezi trɛli i sa’n naan w’a mɛn i su. Kpɛkun “dɔ kunngba sɔ’n su’n, ba’n yoli juejue.” (Matie 17:18) Nanwlɛ, sa sɔ’n boli sran’m be nuan dan.

Kɛ Zezi sunmɛnnin i sɔnnzɔnfuɛ mun naan be ko kan Ɲanmiɛn ndɛ’n, ɔ mannin be tinnin naan be fuan mmusu mun wie. Ɔ yoli i sɔ’n i osu nin-a cɛman. I sɔ’n ti’n, kɛ Zezi wluli sua kun nun’n, i sɔnnzɔnfuɛ’m be toli i lɔ. Kpɛkun be usɛli i kɛ: “?Ngue ti yɛ y’a kwlá fuɛnmɛn i-ɔ?” Zezi seli be kɛ Ɲanmiɛn su mɔ b’a lafiman’n ti yɛ b’a kwlá fuanman mmusu’n niɔn. Ɔ kan guali su kɛ: “Saan Ɲanmiɛn srɛlɛ’n yɛ maan be kwla fuan mmusu wafa sɔ’n niɔn.” (Marki 9:28, 29) Mmusu sɔ’n le tinmin kpa. Ɔ maan sɛ Zezi i sɔnnzɔnfuɛ’m be kunndɛ kɛ bé fúɛn i’n, ɔ fata kɛ be lafi Ɲanmiɛn su kpa. Asa ekun’n, ɔ fata kɛ be srɛ Ɲanmiɛn naan ɔ uka be.

Zezi guɛli i ndɛ’n i bo seli kɛ: “Ń kán klé amun kɛ sɛ amun Ɲanmiɛn sulafilɛ’n i dan ju kɛ mutadi mma sa bɔbɔ’n, amún sé oka nga kɛ: ‘Tu ɔ wun bo wa kɔ le sa,’ yɛ ɔ́ tú i wun bo lɛ, yɛ ɔ leman like kun sa mɔ amun su kwlɛmɛn i yo-ɔ.” (Matie 17:20) Nanwlɛ, Ɲanmiɛn sulafilɛ’n kwla uka e kpa!

Ninnge annzɛ sa nga be kwla tanndan e ɲrun naan y’a suman Zoova kpa’n be sɔnnin. Kpɛkun be kwla yo e ɲrun kɛ oka jrɛiin wie sa. Sanngɛ sɛ e lafi Ɲanmiɛn su kpa’n, e kwla wun sa sɔ’m be trawlɛ.